Nɔmbaa 36:1-13
-
Sawaa a nɔɔ okɔɔ le waŋ laanduaa loo nyɛm kiɔɔŋ nda (1-13)
36 Mi yuŋgula leboltaŋ o pulale Kiliaadi leŋ choo mal, ma kɔ soo naa Muuse chua, a o wanaa wa kaalaŋ Isɔluɛi bolle wa lo. Kiliaadi yɛ, Makaya velu ndu ni, po Manaasɛ wo fulaa o yuŋgula puaa Choosɛ wa choo.
2 Ma dimi aa: “Masanɔ naa, mi Chɛhowa dimul num le ma wuu kooŋ, ma piɔu Isɔluɛiya lɛŋndeŋ mi le wa nyɛm kɛŋ nda. Nduyɛ, mi Chɛhowa dimul num vɛlɛ le ma chua nyɛm kɛŋ Sɛlofɛhadi wanayɛi nɛi, ma ke chuauwaa nduaa laanduaa.
3 Te waŋ laanduaa haa chal pɛ puaa Isɔluɛiyaa cho o kaala cheleŋ niŋnda o ba o nɔɔ niŋ, nyɛm kɛŋ ndaŋ bɛɛ cho faŋaŋ o nyɛm kɛŋ finyaa naa choo, miŋ handuŋ o kaala wanaa nda cho ichali o ba o nɔɔ niŋnda choo. Okoŋ, mi nyɛm kɛŋ nda wuu kooŋ ma ke naa woŋ faŋaŋ lechoo.
4 Te Wɔsi Baŋaŋndo le Isɔluɛiya fuuluu pɛ, nyɛm kɛŋ waŋ laanduaa haa cho vɛlɛ faŋaŋ o nyɛm kɛŋ kaale finyaa naa choo, miŋ handuŋ o nyɛm kɛŋ kaale wanaa nda cho ichali o ba o nɔɔ niŋnda choo.”
5 Okoŋ, mi Muuse dimul Isɔluɛiya nyɛ Chɛhowa dimul ndu wo. Mbo dimul nda aa: “Nyɛ kaale puaa Choosɛ wa dimi wo cho tonya.
6 Nyɛ Chɛhowa dimi a chuaa laanduaa Sɛlofɛhadi wa okɔɔ wo cho hoo ni: ‘Wana o wana nda yeema pɛ a chal ndu o ba o nɔɔ niŋ. Kɛ, wanaa fula o yuŋgu kaale finya nda leŋ niŋnda nda nɔ ni ma chal o ba o nɔɔ niŋ.
7 Nyɛm kɛŋ Isɔluɛiya nɔ miŋ chɛŋ o kaaleŋ ndeŋ niŋ, miŋ kuɛ o kaale cheleŋ niŋ te. Kanifuule, Isɔluɛiya nɔ ma manda nyɛm kɛŋ finyaa ndaa mamaa.
8 Wana lanɔ kɛ kɛ sɔla pɛ nyɛm kiɔɔŋ o kaalaŋ Isɔluɛi tɛɛŋ, o nɔ mbo chal wana cho o kaale finya ndɔ leŋ niŋndo o ba o nɔɔ niŋ, le halikpeŋ mi Isɔluɛiya manda nyɛm kɛŋ finyaa ndaa mamaa.
9 Nyɛm kiɔɔŋ nɔ miŋ chɛŋ o kaaleŋ ndeŋ niŋ, miŋ kuɛ o kaale cheleŋ niŋ te. Kanifuule, kaale kɛ kɛ o Isɔluɛi niŋ nɔ mi le manda nyɛm kɛŋ ndɔŋ.’”
10 Mi chuauwaa Sɛlofɛhadi wa tosa mɛɛ Chɛhowa dimul Muuse yɛ.
11 Okoŋ mi chuaa laanduaa Sɛlofɛhadi wa haa, Maala, Tiɛsa, Hɔkila, Milika, a Nuuwa, chal puaa wanayaŋ finya nda woŋ o ba o nɔɔ niŋ.
12 Le hei, ma simnuŋ laandaa puaa fula o yuŋgula Manaasɛ laŋ choo wa, po Choosɛ wo. Okoŋ, mi nyɛm kɛŋ ndaŋ lo o kaale yuŋgu finya nda leŋ choo.
13 Sawalaŋ ndaŋ a nɛila chɔmaalaŋ ndaŋ Chɛhowa ke Isɔluɛiya ni sanaa a Muuse. A teleŋ koŋ, a wa o dɛŋgbɔɔ niŋ Mowaabi, o Pioo Chɔɔdaŋ, Chɛluiko ikɛi.
