Nɔmbaa 4:1-49
4 Mi Chɛhowa suaa naa Muuse nda Elɔŋ chua. Mbo dimul nda aa:
2 “La poonyiaa puaa Livaiyaa fula o pulale Kohati leŋ choo wa diolaŋ a yuŋgula leboltaŋ, vɛlɛ a yuŋgula ndalaŋ kpɛ kpɛ,
3 a cho wɔsilaŋ chɔŋ 30 haaa 50 ma wa wallo o tɛndii bɔŋaŋndo wa.
4 “Wali puaa fula o pulale Kohati leŋ choo wa nɔ ma tosa wo cho hoo ni, nduyɛ wali hiou diondɔɔ wo o cho ni.
5 Te Isɔluɛiya wa pɛ faŋaŋndo o dɔɔŋgɔɔ le kɔlaŋ o fondaŋ cheleŋ, Elɔŋ nda puaa nduaa nɔ ni ma kɔ tusi kola cho o landaa o tɛndiiyo niŋndo, ma kumbu Kɔfu Kpemaa a ndu.
6 A nɔ ma kuumbuu yau visi nɔ yiiŋnde tɔlɔkɔ wo lechoo, nduyɛ ma pɛŋgɛla kola bulii lusulɛiyo lechoo, okoŋ ma wou yɔmii nda kua a ndu ve o fondaŋnda i nɔ le waa laŋ.
7 “A nɔ vɛlɛ ma pɛŋgɛla kola buliiyo o tibii* nda kɛsi beedii cho o yɔŋgaŋ o Mɛlɛka lo wo choo. A nɔ vɛlɛ ma kɛsi nyɛm laandoŋ, taalalaŋ, hɛŋgɛilaŋ, a taalala bɛndula nda wou sala mamuɛiyo laŋ lechoo. Beedii wa o yɔŋgaŋ teleŋ o teleŋ o Mɛlɛka lo wo nɔ mbo lo o kɛsiaa lechoo.
8 A nɔ ma pɛŋgɛla kola siaŋa sɔɔtɔtɔɔ o nyɛm muŋ choo, nduyɛ ma kuumbuu yau visi nɔ yiiŋnde tɔlɔkɔ wo lechoo, okoŋ ma wou yɔmii nda kua a ndu ve o fondaŋnda i nɔ le waa laŋ.
9 A nɔ ma chua kola buliiyo ma pɛŋgɛla ndu o nyɛ kɛsiaa la lambuiyo choo a lambuila ndɔlaŋ, a kpanyala nda saa saabɛilaŋ ndaŋ, a nyɛla chuaa leyiŋndaŋ, a nyɛ o nyɛ nda wou chuɛiyaŋ leniŋ le mi lambuilaŋ la wa biyɔɔ.
10 Okoŋ ma simbu ndu a nyɛm laanduŋ cho leniŋ ndoŋ kpou o yau visi nɔ yiiŋnde tɔlɔkɔ wo niŋ, ma handu ndu o yɔm nda cho lakɔ a ndu wo choo.
11 A nɔ ma pɛŋgɛla kola buliiyo o bandu luamaa lasala ŋkooliiyo choo, ma kumbu ndu a yau visi nɔ yiiŋnde tɔlɔkɔ wo, okoŋ ma wou yɔmii nda kua a ndu ve o fondaŋnda i nɔ le waa laŋ.
12 Okoŋ kɔɔli, ma chua nyɛm laanduŋ nda soliŋ kpeku le wallo tosaa teleŋ o teleŋ o fondaŋ diandaa woŋ kpou, ma wou muŋ o kola buliiyo niŋ, ma kumbu muŋ a yau visi nɔ yiiŋnde tɔlɔkɔ wo, ma handu muŋ o yɔm nda cho lakɔ a muŋ ndoŋ choo.
13 “A nɔ ma faaŋiaa pultaŋ* o bandu luamaa lasalaa choo, okoŋ ma pɛŋgɛla kola yim yimndo lechoo.
14 Nyɛm laanduŋ kɛ kɛ nda soliŋ kpeku le wallo tosaa o bandu luamaa lasalaa choo, a nɔ ma handu muŋ lechoo. Muŋ cho ni: nyɛm chuaa leyiŋndoŋ, chula saŋgilaŋ, siɔbuilaŋ,* a hɛŋgɛilaŋ. Nduyɛ, a nɔ ma pɛŋgɛla yau visi nɔ yiiŋnde tɔlɔkɔ wo lechoo, okoŋ ma wou yɔmii nda kua a ndu ve o fondaŋnda i nɔ le waa laŋ.
15 “Tuupa mi Isɔluɛiya faŋaŋ o dɔɔŋgɔɔ le kɔlaŋ o fondaŋ cheleŋ, Elɔŋ nda puaa nduaa nɔ fɛlɛŋ ma luɛi ma kumbu kumbuu nyɛm cho o fondaŋ diandaa woŋ, a nyɛm laanduŋ kɛ kɛ cho loŋ. Okoŋ, mi puaa Kohati wa luɛi ma kɔ chua muŋ. Kɛ, a nɔ ma pilaŋ nyɛm cho o fondaŋ diandaa woŋ te, yɔŋii nda wu. Puaa Kohati wa nɔ kalaŋndo ni le nyɔɔŋ muŋ chuaa o tɛndii bɔŋaŋndo niŋ ma kuɛ a muŋ.
16 “Elɔŋ wana soliaa lasalaa, Ɛlieesa po ndɔ nɔ kalaŋndo ni le waa chuɛima lambuiyaŋ hɔlteŋ, nyɛm chuŋ kɛndɔŋ, sala ŋkul nda soli lepaa o lepaa wo, a chuɛiyaŋ le pɔyaa. Ndu nɔ ni mbo wa tɛndiiyo hɔlteŋ a nyɛ o nyɛ cho leniŋ, kɔ bii a fondaŋ diandaa vɛlɛ a nyɛm laanduŋ kɛ kɛ cho leniŋ.”
17 Mi Chɛhowa suaa vɛlɛ naa Muuse nda Elɔŋ chua. Mbo dimul nda aa:
18 “La wa yuŋgula fula o pulale Kohati leŋ choo laŋ hɔlteŋ, yɔŋii nda chuu Livaiya tɛɛŋ.
19 Kɛ nyɛ ŋ nɔ ma tosa le nda ma wa yoomu wo cho hoo ni, yɔŋii nda sɔɔŋguu nyɛm hiou diondɔɔ woŋ ikɛi, okoŋ ma sɔla piɔmndo. Elɔŋ nda puaa nduaa nɔ ni ma luɛi ma chɔm wana o wana wali o nɔ mbo tosa wo, a nyɛ o nɔ mbo chua wo.
20 Puaa Kohati wa nɔ ma luɛi ma del nyɛm cho ŋ diandaa woŋ hɔlteŋ nyɛɛmbɔ bɛɛ le, yɔŋii nda sɔla piɔmndo.”
21 Mi Chɛhowa suaa vɛlɛ naa Muuse chua. Mbo dimul ndu aa:
22 “Poonyiaa puaa fula o pulale Kɛɛsiɔŋ ndeŋ choo wa diolaŋ a yuŋgula leboltaŋ, vɛlɛ a yuŋgula ndalaŋ kpɛ kpɛ.
23 Poonyiaa a cho wɔsilaŋ chɔŋ 30 haaa 50, ma wa wallo o tɛndii bɔŋaŋndo wa diolaŋ.
24 Yuŋgula fula o pulale Kɛɛsiɔŋ ndeŋ choo laŋ, walta nda nɔ ma tosa laŋ, a nyɛm nda nɔ ma kuɛ woŋ cho muŋ ni:
25 Nda nɔ ni ma kuɛ a tɛndii bɔŋaŋndo, kolaa a yau visi nda lɛɛnduu leniŋ ndaŋ, kola nda kumbu lechoo wo, yau visi nɔ yiiŋnde tɔlɔkɔ le kumbɔɔ lechoo wo, kolaa o dio tɛndii bɔŋaŋndo,
26 kolala nda lɛɛnduu o luŋ tɛndiiyo laŋ, kola nda landu le luɛiyɔɔ o luŋ balu tɛndiiyo a bandu luamaa lasalaa wo, yuei tɛndiiye, vɛlɛ a nyɛ o nyɛ nda soliŋ kpeku le wallo o tɛndiiyo. Walta nda nɔ le tosaa laŋ la cho laŋ ni.
27 Wali o wali puaa Kɛɛsiɔŋ nda nɔ le tosaa, a wolɔɔla nda nɔ le chuaa laŋ, Elɔŋ nda puaa nduaa nɔ ni ma wa laŋ hɔlteŋ. Waltaŋ ndaŋ kpou nya nɔ ni mi la ke nda le tosaa.
28 Waltaŋ ndaŋ yuŋgula fula o pulale Kɛɛsiɔŋ ndeŋ choo laŋ la nɔ le tosaa o tɛndii bɔŋaŋndo ni. Nduyɛ, Elɔŋ wana soliaa lasalaa, Itamaa po ndɔ o ba bɛŋgu nda cho wa walta ndalaŋ tosaa ni.
29 “Puaa Meluali wa bɛɛ, a nɔ ma poonyiaa nda diolaŋ a yuŋgula leboltaŋ, vɛlɛ a yuŋgula ndalaŋ kpɛ kpɛ.
30 Poonyiaa a cho wallo o tɛndii bɔŋaŋndo, ma nɔ wɔsilaŋ chɔŋ 30 haaa 50 wa diolaŋ.
31 Nyɛm nda nɔ le chuaa o tɛndii bɔŋaŋndo le kɔlaŋ a muŋ ndoŋ cho muŋ ni: wundɛila* tɛndii bɔŋaŋndo, kandula ndɔlaŋ, suŋgbuma nduaŋ, nyɛla nda simi suŋgbuaŋ leniŋ ndaŋ,
32 suŋgbuma balu luŋ tɛndiiyo waŋ, nyɛla nda simi maŋ leniŋ ndaŋ, chiliŋuŋ siombu siombuŋ nda tuandu tɛndiiyo woŋ, yuei tɛndiiye latulu a nyɛm ndɔŋ kpou, vɛlɛ a wali kɛ kɛ wa a muŋ okɔɔ. Wana o wana ŋ veelu pɛ diolaŋ, a ke ndu nyɛ o nɔ mbo kuɛ a ndu wo.
33 Mɛɛ nuaa yuŋgula puaa Meluali laŋ la nɔ mi la tosa wallo o tɛndii bɔŋaŋndo ni. Nduyɛ Elɔŋ wana soliaa lasalaa, Itamaa po ndɔ o ba bɛŋgu nda cho wa walta ndalaŋ tosaa ni.”
34 Okoŋ mi Muuse, Elɔŋ, a waŋ banaa o Isɔluɛi niŋ poonyiaa puaa fula o pulale Kohati leŋ choo wa diolaŋ a yuŋgula leboltaŋ, vɛlɛ a yuŋgula ndalaŋ kpɛ kpɛ,
35 a wa wɔsilaŋ chɔŋ 30 haaa 50, ma wa wallo o tɛndii bɔŋaŋndo wa.
36 Wanaa nda poonyiaa diolaŋ a yuŋgula ndalaŋ kpɛ kpɛ wa, a wa kpou kpou 2,750.
37 Waŋnda haa nda poonyiaa diolaŋ o yuŋgula Kohati laŋ niŋ ni, ma wa wallo o tɛndii bɔŋaŋndo. Nduyɛ, Muuse nda Elɔŋ poonyiaa nda diolaŋ ni a mɛɛ Chɛhowa dimul Muuse yɛ.
38 Ma poonyiaa puaa Kɛɛsiɔŋ nda diolaŋ a yuŋgula ndalaŋ, vɛlɛ a yuŋgula ndala leboltaŋ kpɛ kpɛ,
39 a wa wɔsilaŋ chɔŋ 30 haaa 50, ma wa wallo o tɛndii bɔŋaŋndo wa.
40 Wanaa nda poonyiaa diolaŋ a yuŋgula ndalaŋ vɛlɛ a yuŋgula ndala leboltaŋ kpɛ kpɛ wa, a wa kpou kpou 2,630.
41 Waŋnda haa nda poonyiaa diolaŋ o yuŋgula puaa Kɛɛsiɔŋ ndaŋ niŋ ni, ma wa wallo o tɛndii bɔŋaŋndo. Nduyɛ, Muuse nda Elɔŋ poonyiaa nda diolaŋ ni a mɛɛ Chɛhowa dimul nda yɛ.
42 Ma poonyiaa puaa Meluali wa diolaŋ a yuŋgula ndalaŋ vɛlɛ a yuŋgula ndala leboltaŋ kpɛ kpɛ,
43 a wa wɔsilaŋ chɔŋ 30 haaa 50, ma wa wallo o tɛndii bɔŋaŋndo wa.
44 Wanaa nda poonyiaa diolaŋ nda tɛɛŋ a yuŋgula ndalaŋ kpɛ kpɛ wa, a wa kpou kpou 3,200.
45 Waŋnda haa nda poonyiaa diolaŋ o yuŋgula puaa Meluali laŋ niŋ ni. Nduyɛ, Muuse nda Elɔŋ poonyiaa diolaŋ ni a mɛɛ Chɛhowa dimul Muuse yɛ.
46 Mi Muuse, Elɔŋ, a waŋ banaa o Isɔluɛi niŋ poonyiaa Livaiya kpou diolaŋ a yuŋgula ndalaŋ, vɛlɛ a yuŋgula ndala leboltaŋ kpɛ kpɛ,
47 a wa wɔsilaŋ chɔŋ 30 haaa 50 wa. Nduyɛ, nda ndaa nɔ le wallo tosaa o tɛndiiyo ni vɛlɛ a kɔlaŋ a wolɔɔla tɛndii bɔŋaŋndo.
48 Wanaa nda poonyiaa diolaŋ nda, a wa kpou kpou 8,580.
49 Ma poonyiaa nda diolaŋ a mɛɛ Chɛhowa dimul Muuse yɛ. Wana o wana a wali ndɔɔ, vɛlɛ a wolɔɔla o nɔ le chuaa laŋ. Ma poonyiaa nda diolaŋ mɛɛ Chɛhowa ndoo dimul Muuse yɛ.
Tɛɛsiaalaŋ
^ Ɔɔ “tabali.”
^ Ɔɔ “pulta machuɛilaŋ.” Koŋ cho ni, pulta chuɛima salaa liviaa laŋ.
^ Ɔɔ “peelelaŋ.”
^ Ɔɔ “finɛtelela.”
