Nɔmbaa 8:1-26
8 Mi Chɛhowa dimul Muuse aa:
2 “Dimul Elɔŋ aa, ‘Te a mɛndul pɛ lambuila ŋɔmmɛula cho o nyɛ kɛsiaa la lambuiyo choo laŋ, kɛsi laŋ mi la wa nyɛ teŋgaa yɔŋgoo o fondaŋ cho nyɛ kɛsiaa la lambuiyo lachi wo.’”
3 Nyɛ Elɔŋ tosa wo wa hoo ni: Mbo mɛndul lambuila laŋ le fondaŋ cho nyɛ kɛsiaa la lambuiyo lachi wo. Mbo tosa mɛɛ Chɛhowa dimul Muuse yɛ.
4 Mɛɛ nda toosiaa nyɛ kɛsiaa la lambuiyo yɛ cho hoo ni: Kooliiye nda lo lɔɔ a haamɛiyo* ni haaa ma toosiaa ndu. Nduyɛ chɔŋ o tumndo mbo hel a nyɛla nda toosiaa maa lapeeŋge laŋ, lende nda toosiaa ndu ni. Mɛɛ Chɛhowa chɔm Muuse yilaŋnde yɛ, lende nda toosiaa nyɛ kɛsiaa la lambui koŋ ni.
5 Mi Chɛhowa dimul vɛlɛ Muuse aa:
6 “Hɛli Livaiya Isɔluɛiya tɛɛŋ, ma dindi nda.
7 Mɛɛ ŋ nɔ ma dindi nda yɛ cho hoo ni: Vesul nda mɛŋma faŋa hakioo waŋ choo, okoŋ mi Livaiya sendi yiinde o dialuŋ ndaŋ kpou, ma tɔɔ nyɛla ndalaŋ, nduyɛ ma dindi ndapila.
8 Okoŋ kɔɔli, ma chua nau fɔŋndɔɔ a kpeyaŋ kɛndɛ kɛndɛ nda muuliaŋ a chuɛiyaŋ ndo le sala ŋkullo. Nduyɛ mi num bɛɛ chua nau fɔŋndɔ cheleŋ le sala hakioo.
9 Huŋ a Livaiya o tɛndii bɔŋaŋndo lachi, okoŋ ma chuuŋgiaa Isɔluɛiya* kpou naapilɛ.
10 Te a hiŋ pɛ a Livaiya Chɛhowa lachi, Isɔluɛiya nɔ ma handu nda balaŋ choo.
11 Elɔŋ nɔ mbo yɔŋgu Livaiya o Chɛhowa lo maa sala keeliaa le Isɔluɛiya, nduyɛ nda cho wa wali Chɛhowa wo tosaa ni.
12 “Okoŋ, mi Livaiya handu nauwa balaŋ o lebol, ma soli o pilɛ sala hakioo, nduyɛ ma soli o pilɔɔ sala luamaa o Chɛhowa lo le mi Livaiya sɔla malɔɔ hakioo.
13 Tosa mi Livaiya sim Elɔŋ nda puaa nduaa lachi, nduyɛ ma yɔŋgu nda o Chɛhowa lo maa sala keeliaa.
14 Soli Livaiya Isɔluɛiya tɛɛŋ, mi Livaiya wa le ya.
15 Okoŋ kɔɔli, mi Livaiya kuɛ o tɛndii bɔŋaŋndo, ma wa wallo loŋ. Nuaa ŋ nɔ ni ma dindi nda, okoŋ ma yɔŋgu nda maa sala keeliaa.
16 Kanifuule, nda cho a hɛliaŋ Isɔluɛiya tɛɛŋ ni, ma wa a yɔŋgaŋ o ya lo. Nda ya cho chua sɔŋgɔ chuauwaa tasiaa o Isɔluɛi niŋ kpou ni, ma wa le ya.
17 Kanifuule, chuauwaa tasiaa o Isɔluɛi niŋ kpou, chɔŋ a waŋnda chieeya mbo kɔ bii a chɔluaa, ya nɔ nda ni. Paale ya diu chuauwaa tasiaa kpou o lɛŋnde Ichipi leŋ niŋ ndeŋ, mi hɛli* nda le yapila.
18 I cho Livaiya hɛli le ma wa le ya sɔŋgɔ chuauwaa tasiaa Isɔluɛiya kpou.
19 I cho Livaiya chua Isɔluɛiya tɛɛŋ mi ke Elɔŋ nda puaa nduaa, le ma wa wallo tosaa o tɛndii bɔŋaŋndo le Isɔluɛiya, nduyɛ ma tosa mi Isɔluɛiya sɔla malɔɔ hakioo. Okoŋ Isɔluɛiya
sɔɔŋguu lɛ o fondaŋ diandaa ikɛi, mi kpundɛ komal nda le.”
20 Mi Muuse, Elɔŋ, a Isɔluɛiya* kpou tosa lende a Livaiya. Nyɛ o nyɛ Chɛhowa ndoo dimul Muuse a Livaiya okɔɔ, lende Isɔluɛiya tosa a nda ni.
21 Mi Livaiya dindiŋ, ma tuaa nyɛla ndalaŋ, okoŋ mi Elɔŋ yɔŋgu nda o Chɛhowa lo maa sala keeliaa. Mi Elɔŋ soli salaa le ma sɔla malɔɔ hakioo nduyɛ ma wa a diandaa.
22 Okoŋ kɔɔli, mi Livaiya kua o tɛndii bɔŋaŋndo le wali ndaa tosaa Elɔŋ nda puaa nduaa lachi. Mɛɛ Chɛhowa dimul Muuse a Livaiya okɔɔ yɛ, lende nda tosa a nda ni.
23 Okoŋ mi Chɛhowa dimul Muuse aa:
24 “Le Livaiya hei cho ni: Wana pɔnɔ kɛ kɛ chɔŋ wɔsilaŋ 25 kɔ kɛ, o nɔ mbo sɔɔŋguu wanaa cho wa wallo o tɛndii bɔŋaŋndo wa choo.
25 Kɛ te o fuuluu pɛ wɔsilaŋ 50, o nɔ mbo pɛŋgi. O nɔ lɛ mbo hiou lachi a wallo tosaa o tɛndii bɔŋaŋndo le.
26 Kɛ, o tiuba mbo mala wanaa cho wallo o tɛndii bɔŋaŋndo wa le walta ndalaŋ tosaa. Kɛ nduyɛ, i cho lɛ ndu kuee le wali tosa loŋ te. Mɛɛ nuaa ŋ nɔ ni ma tosa a Livaiya vɛlɛ a kalaŋnda ndalaŋ.”
Tɛɛsiaalaŋ
^ Ɔɔ “malatoo.”
^ Ɔɔ naapum, “waŋ banaa Isɔluɛiya.”
^ Ɔɔ “mi dindi.”
^ Ɔɔ naapum, “waŋ banaa Isɔluɛiya.”