Nɔmbaa 9:1-23
9 Mɛɛ Isɔluɛiya fula o lɛŋnde Ichipi leŋ niŋ, mi Chɛhowa suaa o Muuse lo o paŋgii tasei niŋ o wɔsi diiŋ ndɔɔ niŋ o pollo niŋ Sanai. Mbo dimul ndu aa:
2 “Isɔluɛiya nɔ ma bɛɛndiaa salaa le Bɔŋaŋ Hiouwɔɔ Choo Wo a teleŋ o nɔ mbo bɛɛndiaŋ ndo.
3 La nɔ mi la bɛɛndiaa ndu a teleŋ o nɔ le bɛɛndiaŋndo wo o paale 14 leŋ choo o paŋgei hei niŋ, a paale delaa leŋ. La nɔ mi la bɛɛndiaa ndu a mɛɛ sawala ndɔlaŋ vɛlɛ a nɛila chɔmaalaŋ kpou la cho yɛ.”
4 Mi Muuse dimul Isɔluɛiya le ma bɛɛndiaa salaa le Bɔŋaŋ Hiouwɔɔ Choo Wo.
5 Okoŋ ma bɛɛndiaa salaa le Bɔŋaŋ Hiouwɔɔ Choo Wo, o paŋgii tasei niŋ malɔ 14 a paale delaa leŋ, o pollo niŋ Sanai. Mi Isɔluɛiya bɛɛndiaa ndu mɛɛ mɛɛ Chɛhowa ndoo dimul Muuse yɛ.
6 Kɛ puaa pum wa loŋ, ma simnuŋ a nɔɔlɛi le mɛɛ nda pilaŋ dialuŋ vilɛiyoŋ yɛ. Le hei, ndaa nɔla ma bɛɛndiaa salaa le Bɔŋaŋ Hiouwɔɔ Choo Wo o paale leŋ choo le. Okoŋ, mi puaa haa kua naa Muuse nda Elɔŋ chua o paale leŋ choo.
7 Ma dimul Muuse aa: “Ŋ cho a nɔɔlɛi, kanifuule ŋ pilaŋ dialuŋ vilɛiyoŋ. Le yɛɛnɛ mi hei kuuna naa salaa solioo o Chɛhowa lo a teleŋ naŋ nɔ miŋ soli ndu a Isɔluɛiyaa tuaa latulu wo?”
8 Okoŋ mi Muuse dimul nda aa: “La chumndɔ loŋ. I nyuna wɔ Chɛhowa, mi tuei nyɛ o cho dimi a nya okɔɔ wo.”
9 Mi Chɛhowa dimul Muuse aa:
10 “Dimul Isɔluɛiya aa, ‘O yɔŋ bɛɛ mi waŋndo o nya tɛɛŋ ɔɔ o yuŋgula cho hunɔɔ o chilaŋ niŋndaŋ simnuŋ o nɔɔlɛi le mɛɛ o pilaŋ dialuŋ vilɛiyoŋ yɛ, ɔɔ mbo wa o tiŋ vilɛiyo tɛɛŋ, a koŋ kpou, o nɔ mbo bɛɛndiaa salaa le Bɔŋaŋ Hiouwɔɔ Choo Wo le ya Chɛhowa.
11 A nɔ ma bɛɛndiaa ndu o paŋgii diiŋ nduɛi niŋ malɔ 14, a paale delaa leŋ. A nɔ ma de ndu latulu a beedii nɔ yiisii* leniŋ te wo, vɛlɛ a pei lolɛiye.
12 A nɔ ma mɛi nyɛ o nyɛ mbo lɔl kuya le, nduyɛ a nɔ ma pɛl paa ndɔɔ le. A nɔ ma bɛɛndiaa ndu a mɛɛ sawala cho a Bɔŋaŋ Hiouwɔɔ Choo Wo okɔɔ laŋ la cho yɛ.
13 Kɛ te waŋndo wa pɛ o diandaa ɔɔ mbo ve o kela niŋ te, mbo kɛɛ le salaa bɛɛndiaa le Bɔŋaŋ Hiouwɔɔ Choo Wo a siɛlɛi fuu, wana koŋ nɔ mbo sɔla piɔmndo le mɛɛ o kɛɛ le salaa solioo o ya Chɛhowa lo a teleŋ o nɔ mbo soli ndu wo yɛ. Ndupila nɔ mbo muli le haki ndɔɔ.
14 “‘Nduyɛ te miallo wa nya pɛ tɛɛŋ, ndu bɛɛ o nɔ mbo toosiaa sala Bɔŋaŋ Hiouwɔɔ Choo Wo le ya Chɛhowa. O nɔ mbo bɛɛndiaa ndu a mɛɛ sawalaŋ vɛlɛ a nɛila chɔmaalaŋ la cho yɛ. Sawaa o pilɛ kpe cho wa le nya a mialaa cho nya tɛɛŋ nda ni.’”
15 Paale nda simi tɛndiiyo leŋ, mi yumbu yumboo kumbu tɛndiiyo kpu, koŋ cho ni, tɛndii laSawaa. Kɛ a nyumndaŋ, mi yumbu yumbu wa maa leyiŋ ndo lo isisi o tɛndiiyo choo haaa mi paaleŋ le sia.
16 Hei ndii tosaŋ teleŋ o teleŋ ni: Ipala, mi yumbu yumboo ndoo kumbu ndu kpu. Nduyɛ ichɔl, mi ndoo simnuŋ maa leyiŋ.
17 Teleŋ o teleŋ yumbu yumboo ndoo faŋaŋ pɛ o tɛndiiyo choo, Isɔluɛiya ndaa chɛŋ chɔ chɔ le kɔlaŋ. Nduyɛ fondaŋ o fondaŋ yumbu yumboo ndoo sim pɛ, loŋ Isɔluɛiya ndaa kila dɔɔŋgɔɔ ni.
18 Chɛhowa ndoo dimul Isɔluɛiya ni le ma faŋaŋ o dɔɔŋgɔɔ, nduyɛ Chɛhowa ndoo dimul nda vɛlɛ ni le ma kila dɔɔŋgɔɔ. Te yumbu yumboo ndoo feŋaŋ o tɛndiiyo choo le, Isɔluɛiya bɛɛ ndaa feŋaŋ o dɔɔŋgɔɔ le.
19 Yumbu yumboo ndoo wa bɛɛ o tɛndiiyo choo le palɛi bɔɔbɔɔ, mi Isɔluɛiya ndaa diikuŋ Chɛhowa, ndaa feŋaŋ o dɔɔŋgɔɔ le.
20 Lepum, le palɛi biŋgi koni yumbu yumboo ndoo wa o tɛndiiyo choo ni. Chɛhowa ndoo dimul nda ni le ma wa o dɔɔŋgɔɔ, nduyɛ Chɛhowa ndoo dimul nda vɛlɛ ni le ma faŋaŋ o dɔɔŋgɔɔ.
21 Lepum yɛ, chɔŋ idiiyo haaa ichɔllo kinɛi yumbu yumboo ndoo wa o tɛndiiyo choo ni. Nduyɛ te yumbu yumboo ndoo faŋaŋ pɛ idiiyo, ndaa chɛŋ le kɔlaŋ. O wa ipala ɔɔ ichɔl, te yumbu yumboo ndoo faŋaŋ dɔɔ pɛ, ndaa chɛŋ le kɔlaŋ.
22 O yɔŋ bɛɛ aa palɛi i ŋiiŋ, paŋgei i pilɛ, ɔɔ le teleŋ vilɛi yumbu yumboo ndoo wa o tɛndiiyo choo ni, Isɔluɛiya ndaa feŋaŋ o dɔɔŋgɔɔ le. Kɛ te ndoo faŋaŋ dɔɔ pɛ, nda bɛɛ faŋaŋ.
23 Chɛhowa ndoo dimul nda ni le ma kila dɔɔŋgɔɔ, nduyɛ Chɛhowa ndoo dimul nda vɛlɛ ni le ma faŋaŋ o dɔɔŋgɔɔ. Ma hiau lachi a Chɛhowa diikɔŋndo sanaa a nyɛ Chɛhowa dimul Muuse wo.
Tɛɛsiaalaŋ
^ Ɔɔ “bulu nɔ lɛvɛŋ.”
