Nɛhimaya 1:1-11
1 Ya Nɛhimaya* po Hakalaya wo, diomnda ya dimi laŋ la cho laŋ ni: O wɔsi 20 niŋ a paŋgii Kisili* ve, I wa Susaŋ* o chiɛi lemasa nda taŋgul o kala kala wo niŋ.
2 A teleŋ koŋ, mi Hanani pɔmbɔ* ni chaŋ Chuda nda puaa apum ma huŋ ya yilɔɔ. Okoŋ, mi nyuna nda a Chuuwaa ndaa lo yoomu ma fula o biyɔɔ niŋnda okɔɔ, vɛlɛ a Chulusalɛm.
3 Ma muli aa: “Wanaa lo yoomu ma fula o biyɔɔ niŋ nduyɛ ma wa o buŋgɛi keŋ niŋnda, sɔɔŋ bɛnda a nda le. A cho o siɔmbula bɛndulaŋ niŋ. Kpakioo Chulusalɛm cho o piɔlɛi, nduyɛ diola ndɔlaŋ la cho la ŋualɛi chilikɔ.”
4 Dimioo nuaa mi tuɛi nyɛ nda dimi wo, mi chal lɛŋ mi kandu chaŋndo. Mi bii mɔnɛi le palɛi bɔɔbɔɔ, mi bii sumndo, nduyɛ mi piɛi o Mɛlɛka cho choo choo wo lo.
5 Mi dimi aa: “Oo Chɛhowa, Mɛlɛka cho o choo choo niŋndo, Mɛlɛka waŋnda nɔ ma nɔ siooŋii nduɛi yo, a cho o bɛndu, nduyɛ ma lo o kpema numndo choo. Wanaa kaala num, ma bii sawala numndaŋ nda, ma chɔm nda kaala lo lechoo wo.
6 Yandii, yaŋ nilaŋ ma tuei piɛile ya buɛi numndo cho hau o numndo leŋ. Idii a ichɔl, I cho piɛileŋ le buɛiyaa numnda, waŋnda Isɔluɛi. Nduyɛ, I cho hakila nda tosa laŋ chɔɔmuuwo o numndo. Ya ni, chiɛi finya nuu ni, ŋ tosa hakioo.
7 Ŋ tosa yɔŋ wɔɔŋndo miŋ tɛɛmbuu num kɔllo. Nduyɛ sawalaŋ a nyɛ o nyɛ ŋ ke buɛi numndo Muuse, ŋ diikuŋ ndu le.
8 “Yandii, loonuŋ nyɛ ŋ dimul* buɛi numndo Muuse wo. Ma dimul ndu aa: ‘Te la kɛɛ lo lechoo wo chɔmndo pɛ, I cho nya saŋɔɔ waŋnda tɛɛŋ.
9 Kɛ te la miiŋgu pɛ ya o ibuŋ, mi la bii sawala nilaŋ, nduyɛ mi la diikuŋ ndaŋ, o yɔŋ bɛɛ mi la wa a saŋnaŋ haaa o chieeŋndo mɛɛlulaŋ, I cho nya chuuŋgiaa mi hiŋ a nya o fondaŋ ya hɛli le mi diola nilaŋ la wa loŋ ndo.’
10 Buɛiyaa numnda nda cho ni, nduyɛ wanaa numnda nda cho ni. Nda ŋ piŋi a ba num kpaaya bɛndoo ni.
11 Oo Chɛhowa, a yandii, yaŋ nilaŋ o piɛile buɛi numndo a piɛile buɛiyaa num aa nɔ siooŋnde le diola numndaŋ nda cho num ndeŋ. Nduyɛ a yandii, tosa mi masaa chɔm ya nyiɛɛye mbo chɛl nyɛ ya cho ndu hau dimul lo.”
Nduyɛ ya yaa talal masaa muɛiyaŋ ni.
Tɛɛsiaalaŋ
^ Diolaŋ ndaŋ la sim, “Chɛhowa Yɔŋgu Kɔl Dɛɛniaa Ni.”
^ Tofa Tɛɛsiaa B15.
^ Ɔɔ “Susa.”
^ O Hibuluiye niŋ, a chɔm wana kpeekpei chuu chaaŋ okɔɔ wo le.
^ Ɔɔ “sila ŋ ke.”
