Nɛhimaya 13:1-31
13 O paale leŋ choo, ma veelu diomndaŋ o yau laSawa Muuse wo niŋ, mi wana o wana tuɛi. Nduyɛ, ma saaluŋ maa fɛɛŋ bɛɛ Amɔnaitiiya ɔɔ Mowabaitiiya nɔ ma luɛi wanaa Mɛlɛka tonyaa tɛɛŋ te.
2 Kanifuule, a ke Isɔluɛiya nyɛdiaa a mɛŋndaŋ te. Okoŋ kɔɔli, ma paawa Belam le mbo handu nda sendioo choo. Kɛ, mi Mɛlɛka naa tosa mi sendi koŋ simnuŋ salaa.
3 Dimioo nuaa mi Isɔluɛiya tuɛi nyɛ Sawala Mɛlɛka laŋ la dimi wo, ma kandu wanaa fula o lɛŋii cheleŋnde niŋnda* kpou solioo nda tɛɛŋ.
4 Tuupa mi hei yɔŋnuŋ, wana soliaa lasala wa chilaŋ le lumuila nda kɛsi wolɔɔlaŋ o chiɛi Mɛlɛka naa niŋndo wa Iliaasibi ni, wanayɛi Tobaya ve.
5 Mi Iliaasibi ke Tobaya lumui bɛndu bɛndoo. Loŋ ndaa kɛsi sala ŋkullo, filaŋkiŋsɛŋ, wolɔɔla ndaa tosa wallo o chiɛi Mɛlɛkaa laŋ, o tɔ ndɔɔ o kulloŋ choo, muɛima sɛnɛiyaŋ, chuɛiyaŋ, vɛlɛ a toolula ndaa yɔŋgu le wanaa soliaa lasalaa laŋ. Nduyɛ le Livaiya, wanaa soliaa ŋchonduaa, a wanaa ndaa manda diola kpakilaŋ nda fondaŋndo hoo wa ni.
6 Boondii sɔɔŋ muŋ kpou yɔŋnuŋ nde, I ve Chulusalɛm te. Yaa miiŋgu o masaa lo o wɔsi 32 Masaa Atasaasi wa o masaleŋ choo Babilɔŋ ndo. Nduyɛ mɛɛ teleŋndo hiou tiŋ, mi nyuna masaa le mi miiŋgu.
7 Mɛɛ ya miiŋgu Chulusalɛm, mi cha suɛi wɔɔŋii Iliaasibi tosa ve. Mbo ke Tobaya lumui nda kɛsi wolɔɔlaŋ o luŋ chiɛi Mɛlɛka tonyaa wo.
8 Mi hei tɛɛmbuu ya kɔllo tau tau. Le hei, mi sooluu nyɛ o nyɛ Tobaya ndoo nɔ o lumui nda kɛsi wolɔɔlaŋ ndo niŋ, mi vii vii muŋ o bɛɛ.
9 Okoŋ kɔɔli, mi dimul waŋnda ma dindi lumuila nda kɛsi wolɔɔlaŋ ndaŋ. Nduyɛ wolɔɔla nda tosa wallo o chiɛi Mɛlɛkaa laŋ, sala ŋkullo, a filaŋkiŋsɛŋ, mi miŋgi laŋ kɛsi leniŋ.
10 Mi saaluŋ vɛlɛ maa nyɛm nda nɔ ma ke Livaiya woŋ, a ve nda muŋ ke le. Le hei, mi Livaiya a wanaa soliaa ŋchonduaa mal wali nda wa tosaa wo, mi o kɛ kɛ kuaŋnuŋ o chiɛi nduɛi niŋ.
11 Okoŋ, mi pɛɛsa wanaa cho masaa ikɛiya mi nyuna nda aa: “Le yɛɛnɛ nya mal lɛ chiɛi Mɛlɛka tonyaa?” Okoŋ mi chuuŋgiaa wanaa wa wallo wa, mi miŋgi nda o fondaŋnda ndalaŋ.
12 Nduyɛ mi waŋnda o Chuda niŋ kpou huŋ a o tɔ ndɔɔ o kuluŋ ndaŋ choo, muɛima sɛnɛiyaŋ, a chuɛiyaŋ, o lumuila nda kɛsi wolɔɔlaŋ ndaŋ niŋ.
13 Okoŋ mi hɛli Siɛlɛmaya wana soliaa lasalaa, Sadɔki wana miŋgi diom Mɛlɛkaa poonyiaa wo, a Pɛdaya Livainɔɔ, mi yulu nda iso le ma wa lumuila nda kɛsi wolɔɔlaŋ ndaŋ chilaŋ. Nduyɛ Henaŋ po Sakɔɔ wo, po mama Mataniya wo wa wana nda malaa ni. Puaa haa wa wanaa wana nɔla ma tiindaŋ. Kalaŋ ndaa i wa ni, le puaapiliaa ndaa nyɔɔŋ piɔuwo.
14 Oo Mɛlɛka nuu, yandii loonuŋ a ya le nyɛ ya tosa wo. Puɛɛnuŋ a kaala lo lechoo ya chɔm le chiɛi numndo a walta cho tosaŋndo loŋ ndaŋ te.
15 O palɛi keŋ niŋ, mi cha waŋnda Chuda muɛiyaŋ toosiaa o doolala* ndalaŋ o Paale Pɛŋgiaaleŋ choo. A wa kuluŋ ndaŋ dovioo o bɔlɔlaŋ niŋ ma hɛɛnduu sofɛliaa o lakɔɔ le hunɔɔ a muŋ. A wa vɛlɛ hunɔɔ a muɛiyaŋ, kilepiiyaŋ, fikiiyaŋ, a wolɔɔla suu o suu cheleŋ o Chulusalɛm niŋ o Paale Pɛŋgiaaleŋ choo. Lelaŋ, mi sila nda maa a nɔ ma pisi nyɔɔŋ o paaleŋ ndeŋ choo le.*
16 Nduyɛ, waŋnda Taaya a wa o chioo niŋnda wa hunɔɔ a suuwa a yulale suu o suu, ma pisi waŋnda Chuda a waŋnda Chulusalɛm o ba o Paale Pɛŋgiaaleŋ choo.
17 Okoŋ mi pɛɛsa laŋgbaa kalla o Chuda niŋ, nduyɛ mi nyuna nda aa: “Le yɛɛ nya cho yɛ sɔɔŋ wɔɔŋndoŋ muŋ tosaa, mi la nɔɔliaa Paale Pɛŋgiaaleŋ?
18 Baa o cho sɔɔŋ waa nuaa le finyaa nyaa mamaa tosa mi Mɛlɛka tusi naa a chiee naa sɔɔŋ palaŋ muŋ choo kpou le? Nɔɔliaa nya cho hoo Paale Pɛŋgiaaleŋ ndo cho tosaa mi Mɛlɛka wa chɔɔloo tumboo dɔɔnɔŋndo a naa waŋnda Isɔluɛi.”
19 Mi dimul waŋnda maa te Paale Pɛŋgiaaleŋ le wa pɛ maa siɔndii, a nɔ ma kiindiaa diola kpakilaŋ Chulusalɛm kpou a paale yɔŋgaŋndeŋ. Mi dimul nda vɛlɛ maa a nɔ ma kumbi diolaŋ ndaŋ te haaa mi Paale Pɛŋgiaaleŋ le hiou. Okoŋ mi simi buɛiyaa niaa a tiŋ o diola kpakilaŋ, le halikpeŋ waŋnda hiŋ a wolɔɔlaŋ o Paale Pɛŋgiaaleŋ choo ma luɛi le.
20 Mi wanaa leyulaa ndaa pisi nyɛm yɛ yiɔɔŋ nda a wanaa piandaa lɔl o kpakioo Chulusalɛm kɔɔli le pilɛ ɔɔ bɛmbɔɔ le diiŋ.
21 Okoŋ mi sila nda, mi dimul nda aa: “Le yɛɛnɛ nya cho yɛ luaaŋ o dio kpakioo hɔlndɔ? Te la lɔl niŋ nanuŋ pɛ, I cho nya touwɔɔ.” Chɔŋ niŋ a teleŋ koŋ, a hiŋ ndɛ o Paale Pɛŋgiaaleŋ choo le.
22 Nduyɛ mi dimul Livaiya le ma wa ndapila dindioo teleŋ o teleŋ, ma hiŋ ma huŋ manda diola kpakilaŋ, le mi Paale Pɛŋgiaaleŋ le wa le diandaa. Oo Mɛlɛka nuu, yandii loonuŋ vɛlɛ a ya le hei. Tuiinuŋ ya inyiɛɛ, kanifuule kaala lo lechoo numndo cho bɔɔ.
23 O palɛi keŋ niŋ, mi cha vɛlɛ Chuuwaa chua waŋ laanduaa Asidɔdaitiiya, Amɔnaitiiya, a Mowabaitiiya o nɔlaŋ* niŋnda.
24 Chuauwaa ndaa tɛndaa tɛɛŋ, suɛi maŋgalɛi Asidɔdaitiiya ndaa dimi ni, a tuaa yɛ, sɔɔŋ maŋgalaŋ wanaa cheleŋ ndaa dimi ni. Kɛ o pilɛ bɛɛ ndoo dimi suɛi maŋgalɛi Chuuwa le.
25 Mi pɛɛsa Chuuwa haa nduyɛ mi handu nda sendioo choo. Mi luaa puaa apum, mi suiŋgi nda yiiŋnde, mi tosa ma mɛnaŋ o Mɛlɛka lo, mi dimul nda aa: “La nɔ mi la ke puaa ndaa chuauwaa nyaa laanduaa le, nduyɛ la nɔ mi la chua chuauwaa ndaa laanduaa le puaa nyaa ɔɔ nyapila le.
26 Baa o cho le suɛi waa nuaa le Sɔlɔmɔŋ, masaa le Isɔluɛi tosa hakioo le? Lɛŋii wa o chieeŋndo choo ve kpou, masa o masa ve maa ndu le. Mɛlɛka ndoo kaala ndu. Le hei, mbo siiŋguu ndu masaa le Isɔluɛi kpou. Kɛ laanduaa o chua o lɛŋii cheleŋnde niŋnda tosa ni mbo tosa hakioo.
27 O bɛnda pɛŋ le tueiyɔɔ maa la tosa haki wɔɔŋ waa nuaa, mi la kɛɛ lo lechoo wo chɔmndo o Mɛlɛka naa lo, a mɛɛ nya cho waŋ laanduaa chuaa o lɛŋii cheleŋnde niŋ o nɔlaŋ niŋ yɛ le.”
28 Mi puaa Chowaada wa o pilɛ simnuŋ lefoo Saŋbala, Hɔlɔnaitiinɔɔ. Le hei, mi tuau ndu. Chowaada yɛ, finya ndɔ wa Iliaasibi ni, masa wanaa soliaa lasalaa.
29 Oo Mɛlɛka nuu, yandii loonuŋ a nda. Kanifuule, a nɔɔliaa kunda wanaa soliaa lasalaa, ma nɔɔliaa vɛlɛ kpema ŋ yii a kunda wanaa soliaa lasalaa vɛlɛ a Livaiya wo.
30 Okoŋ mi dindi nda, mi tosa ma soli balaŋ o sɔɔŋ nɔɔlɛi wanaa wa o lɛŋii cheleŋnde niŋnda wa tosaa woŋ niŋ. Nduyɛ mi ke wanaa soliaa lasalaa a Livaiya waltaŋ, mi wana o wana miiŋgu wali ndɔɔ tosaa.
31 Mi kɛɛsiaa le ma wa hunɔɔ a yɔmnde, vɛlɛ a kɔmnde tasele tɔlɔɔla ndalaŋ, a teleŋ nda nɔ le hunɔɔ a nyɔɔŋ muŋ ndo.
Oo Mɛlɛka nuu, loonuŋ a ya, nduyɛ ma dɔu ya sala.
Tɛɛsiaalaŋ
^ Ɔɔ “kayii muuliaŋnde.”
^ Ɔɔ “yindɛila.”
^ Ɔɔ naapum, “mi sila nda o paaleŋ ndeŋ choo maa a nɔ ma pisi nyɔɔŋ te.”
^ Ɔɔ “chiɛila ndalaŋ.”
