Nɛhimaya 4:1-23
4 Dimioo nuaa mi Saŋbala tuɛi maa ŋ cho kpakioo miŋgioo taŋgullo, mbo tuulu kɔl ŋama ŋama,* mbo hiau lachi a Chuuwa mamɔɔ.
2 Nduyɛ puaapiliaa nduaa a puaa chɔuwa Sameeliaa wa o hɔlndɔ mbo wa dimioo aa: “Yɛɛ Chuuwaa siɛlɛiya haa cho yɛ tosaa? Baa a nɔla pa ma tosa wallo hoo a ba nda? Baa salalaŋ nda cho soli ni? A nɔla pa ma chii ndu taŋgul o paaleŋ niŋ? Baa a nɔla niŋ pa ma sooluu poutaŋ o bembelaŋ ndaŋ niŋ ma soliŋ ndaŋ vɛlɛ kpeku?”
3 Mi Tobaya Amɔnaitiinɔɔ, o wa ndu isisi ikɛiyo dimi aa: “Kpaki nda cho koŋ taŋgullo a poutaŋ ndo, siifaa bɛɛ hel lechoo pɛ, kombaa o komba ni.”
4 Oo Mɛlɛka naa, tueiyɔ se mɛɛ nda cho naa yioulaŋ yɛ. Tosa mi nda bɛɛ sɔla yioulaŋ mɛɛ nda cho naa yioulaŋ yɛ, nduyɛ mi yaamɔɔwaa ndaa bii nda ma kuɛ a nda o chɛleŋ niŋ.
5 Le mɛɛ nda yiou yiou wanaa taŋgulaa yɛ, viaŋ yɔŋnda ndala wɔɔŋndaŋ ɔɔ ma wɔɔsuu hakila ndalaŋ te.
6 Okoŋ, miŋ hiau lachi a kpakioo miŋgioo taŋgullo haaa miŋ bɔŋa ndu kpɔkɔsu, nduyɛ miŋ fuuluu tɛɛŋ a ndu heeloo. Mi waŋnda hiau lachi a wallo tosaa a kɔl ndaa kpou.
7 Mɛɛ Saŋbala, Tobaya, Aluabuiya, Amɔnaitiiya, a waŋnda Asidɔɔ tuei maa ŋ cho hiouwɔɔ lachi a kpakioo Chulusalɛm miŋgioo taŋgullo vɛlɛ a tɛɛŋgula ndɔlaŋ peeloo, ma tuulu kɔl ŋama ŋama.
8 Ma kɛɛsiaa le ma chuuŋgiaŋ diompilɛ ma huŋ del Chulusalɛm choo a sɔŋgɔɔ, nduyɛ ma mal wooluŋ wooluŋndo loŋ.
9 Kɛ miŋ piɛi o Mɛlɛka naa lo, okoŋ miŋ kɛsi waŋnda le ma wa mɛŋgɛlaa ipala a ichɔl le nda.
10 Kɛ mi waŋnda Chuda wa dimioo aa: “Yoomuaŋ ma chuu wanaa cho wallo wa fiou, nduyɛ puuloo cho bɔɔ. Fɛɛŋ bɛɛ ŋ nɔla lɛ miŋ taŋgul kpakioo hoo le.”
11 Nduyɛ yaamɔɔwaa naa wa hiouwɔɔ lachi a dimioo aa: “Tuupa ma sina a ndi okɔɔ ɔɔ ma che naa, ŋ cho nda lakɔ luɛiyɔɔ tɛɛŋ miŋ diu nda, okoŋ miŋ kuuna nda wali koŋ tosaa.”
12 Chuuwaa wa nda ikɛiya ndaa hiŋ pɛ, mi ndaa dimul naa teleŋ o teleŋ* aa: “A cho wa fulaa ba o ba fee le naa hunɔɔ chiŋalaŋndo.”
13 Lelaŋ, mi kɛsi puaa o kpakioo kɔɔli, o fondaŋnda i wa tɛtɛlɛ le mi waŋnda kei laŋ. Mi kɛsu kɛsuu nda a yuŋgula ndalaŋ kpɛ kpɛ. Nduyɛ yuŋgu kɛ kɛ ndoo nɔ mɔɔŋ faŋndoŋ, baltaŋ, a chiɔulaŋ.
14 Mɛɛ ya che maa siooŋnde bii nda, mi chaŋ o lepilɛ niŋ kpe mi dimul laŋgbaa kalla, wanaa cho masaa ikɛiya, a wanaa tuaa kpou aa: “Siooŋii bii nya le nda le. La loonuŋ maa Chɛhowa cho o bɛndu, nduyɛ Mɛlɛka waŋnda nɔ ma nɔ siooŋii nduɛi yo o cho ni. Lelaŋ, la sɔŋga le puaapiliaa nyaa, puaa nyaa, chuauwaa nyaa laanduaa, laandaa nyaa, a chiɛila nyalaŋ.”
15 Okoŋ kɔɔli, mɛɛ yaamɔɔwaa naa tuei maa ŋ sina yiyaŋ ndaa nduyɛ maa Mɛlɛka tonyaa tɛɛmbuu kɛɛsiaa ndaa, mi naa kpou miiŋgu vɛlɛ le kpakioo taŋgullo.
16 Chɔŋ niŋ a paale leŋ kɔ kɛ, puaa niaa walla a tiŋ wa wallo, mi a tiŋ wa isisi a baltaŋ o laba, boola puaa chɔuwa bii o laba laŋ, chiɔulaŋ, a domala chɔulaŋ. Nduyɛ masaa waa wa isisi waŋnda Chuda kɔɔli,
17 a wa kpakioo taŋgullo wa. Wanaa wa wolɔɔlaŋ vilioo wa wa wallo tosaa a baa pilɛ, nduyɛ ma wa nyɛm chɔuwoŋ* biyɔɔ a baa pilɔɔ.
18 Wanaa wa taŋgullo wa, o kɛ kɛ muɛi faŋnde wa ndu i saiyaŋ o chaŋ mbo tosa wallo. Nduyɛ wana wa le buloo hɔŋndo wo wa ya isisi ikɛi.
19 Okoŋ, mi dimul laŋgbaa kalla, wanaa cho masaa ikɛiya, a wanaa tuaa kpou aa: “Wallo cho tau, nduyɛ o cho o kuaŋnaŋ kɛ kɛ le tosaa. Ŋ cho a tiuwaa kpakioo kpou, nduyɛ miŋ waŋnaŋ landaŋ landaŋ.
20 Te la tuei pɛ mi buloo soo, la huŋ diompilɛ naa naŋ cho wa wa. Mɛlɛka naa cho sɔŋga le naa.”
21 Miŋ hiau lachi a wallo, nduyɛ mi apum wa baltaŋ biyɔɔ o laba, chɔŋ idii puŋ haaa mi nyumndaŋ ma tol okoŋ mi looŋ fula.
22 Mi dimul waŋnda a teleŋ koŋ aa: “Wana pɔnɔ kɛ kɛ nda buɛi ndɔɔ a nɔ ma wa mɛŋgɛlaa ichɔl Chulusalɛm le naa mandaa, nduyɛ ma wa wallo ipala.”
23 Le hei, ya, puaapiliaa niaa, buɛiyaa niaa, a wanaa mɛŋgɛlaa wa ya kɔɔli wa, wana o wana siŋga nyɛla wa ndu lekɔɔ laŋ te, nduyɛ mi wana o wana bii nyɛm ndɔŋ chɔuwoŋ a ba ndɔ kɛndɔɔ.
