Nɛhimaya 5:1-19
5 Kɛ, puaa a laandaa ndaa wa chaŋndaŋ choo choo kpeleŋ a nyɛ puaapiliaa ndaa Chuuwa wa nda tosallo wo.
2 Apum wa dimioo aa: “Naapila, puaa naa, a chuaa naa laanduaa, ŋ cho bɔɔ faŋga. Ŋ nɔ miŋ sɔla nyɛdiaa le dioo, le halikpeŋ miŋ wa yoomu.”
3 Acheleŋnda wa dimioo aa: “Ŋ cho yondola naalaŋ, kpelela naala makilepiilaŋ, a chiɛila naalaŋ lendullo, le halikpeŋ miŋ sɔla nyɛdiaa a teleŋ nyɛdiaa lepɛŋndo.”
4 Acheleŋnda wa vɛlɛ dimioo aa: “Ŋ biu biu kueelaŋ le paawa* masaa malɔɔ, nduyɛ miŋ yɔŋgu wanaa kaŋ yondola naalaŋ a kpelela naala makilepiilaŋ o landei niŋ.
5 Puaapiliaa naa haa yɛ, kooma piliaŋ kpe naŋ cho ni, nduyɛ chuauwaa naa cho a sɔvɛ mɛɛ chuauwaa ndaa bɛɛ cho yɛ. Kɛ a koŋ kpou, puaa naa a chuauwaa naa laanduaa, ŋ nɔ miŋ yɔŋgu nda o chɛleŋ niŋ. Nduyɛ chuauwaa naa laanduaa apum cho niŋ nda pɛŋ o laba o chɛleŋ niŋ. Kɛ ŋ nɔ kpaaya le hei kuunaa le, kanifuule yondola naalaŋ a kpelela naala makilepiilaŋ la cho niŋ wanaa cheleŋnda o laba.”
6 Mi tambu kɔl tau mɛɛ ya tuei chaŋnda ndalaŋ a nyɛ nda dimi wo.
7 Mɛɛ ya yiyaŋ o suɛi hei choo nyɛkɛndɛi, mi bii laŋgbaa kalla a wanaa cho masaa ikɛiya tɔɔyaŋ. Mi dimul nda aa: “La cho puaapiliaa nyaa kueelaŋ kioo, mi la dimul nda le ma handu nyɛ lechoo.”
Le hei, mi kɛɛsiaa le miŋ bii bɔŋaŋ bɛndoo le bahawɛiyo hoo solioo.
8 Mi dimul nda aa: “Miŋ tosa nyɛ o nyɛ naŋ tiuba le puaapiliaa naa Chuuwaa wa o chɛleŋ niŋnda baŋaa. La yeema vɛlɛ mi la pisi puaapiliaa nyaa okoŋ miŋ miŋgi nda piondɔɔ?” Mɛɛ nda tuei hei, ma mei doŋ, nduyɛ ndaa nɔ lɛ nyɛ o nyɛ nda dimi le.
9 Okoŋ mi dimul nda aa: “Nyɛ nya cho tosaa wo niŋ kposoŋ te. La nɔ mi la nɔ siooŋnde le Mɛlɛka naa, yɔŋii yaamɔɔwaa naa cho o lɛŋii cheleŋnde niŋnda mam naa.
10 Nduyɛ ya ni, puaapiliaa niaa ni, a buɛiyaa niaa, ŋ cho waŋnda kanioŋ* a nyɛdiaa kueelaŋ kioo, kɛ ŋ cho nda dimul le ma handu nyɛ lechoo le. Lelaŋ a yandii, ŋ malnuŋ waŋnda kueelaŋ kioo le ma handu nyɛ lechoo.
11 A yandii, la miŋgul nda yondola ndalaŋ, kpelela ndala makilepiilaŋ, kpelela ndala ma ɔlifiilaŋ, a chiɛila ndalaŋ paale hauleŋ ndeŋ. Nduyɛ kanioŋ, nyɛdiaa, muɛima sɛnɛiyaŋ, a chuɛima nya wuu nda kueelaŋ ndaŋ, la miŋgul nda nyɛ nya handu lechoo wo.”*
12 Okoŋ ma dimi aa: “Ŋ cho nda nyɔɔŋ muŋ miŋgi o laba, nduyɛ ŋ cho lɛ nda nyuna le nyɛ o nyɛ cheleŋ te. Ŋ cho tosa mɛɛ ŋ dimi yɛ.” Le hei, mi veelu wanaa soliaa lasalaa mi dimul puaa haa ma mɛnaŋ nda o hɔl le ma tosa nyɛ nda dimi wo.
13 Mi kuaŋ vɛlɛ bɔɔle doma nuu, mi dimi aa: “Wana o wana kɛɛ pɛ le nyɛ o dimi hoo wo tosaa, nuaa Mɛlɛka tonyaa cho chiɛi ndɔɔ koŋɔɔ ni, mbo mɛi ndu fondo fuu.” Mi waŋnda kpou dimi aa: “Amiina!”* Nduyɛ ma saŋgala Chɛhowa, okoŋ ma tosa mɛɛ nda dimi yɛ.
14 Chɔŋ a wɔsi 20 haaa wɔsi 32 Masaa Atasaasi wa o masaleŋ choo nduyɛ mbo siiŋguu ya masa ibuŋgaa le lɛŋnde Chuda leŋ ndo, o cho niŋ hau wɔsilaŋ 12, ya ni, puaapiliaa niaa ni, nyɛdiaa waŋnda nɔ ma ke masa ibuŋgaa wo, ŋ bii ndu wana o wana o ba le.
15 Masaa ŋbuŋgaa wa ya paandu lachi wa, mi ndaa saaŋgiaa waŋnda tau. Lepaa o lepaa, mi ndaa bii nda kaniŋ humbuŋ siɛkɛlloŋ 40* o laba le nyɛdiaa a muɛiyaŋ. Buɛiyaa ndaa bɛɛ wa waŋnda nyɛpalaa tusioo choo. Kɛ ya, I tosa lende le, kanifuule I nɔ siooŋnde le Mɛlɛka.
16 O faŋaŋ okoŋ kɔɔli, ya ni, a buɛiyaa niaa kpou, miŋ sɔɔŋguu le kpakioo taŋgullo. Nduyɛ yondoleŋ bɛɛ ŋ kindiŋ le sɔla le.
17 Chuuwa a wanaa cho masaa ikɛiya, kpou kpou 150 dia nyɛdiaa o tibii* nuu choo ni. Nduyɛ wanaa fula o lɛŋii cheleŋnde niŋnda bɛɛ, mi ndaa de nyɛdiaa o tibii nuu choo.
18 Lepaa o lepaa, mi yaa dimul waŋnda* le ma yau nauwo, saa kɛndɛ kɛndiaa a ŋɔmpum, a youwa. O palɛi tɔ kɛ kɛ bɛŋgu, mi naŋ sɔla muɛima suu o suu le pilɛ, nduyɛ mi maa waŋnuŋ ma hɔbɛi. Kɛ a koŋ kpou, nyɛdiaa waŋnda nɔ ma ke masa ibuŋgaa wo, i bii ndu wana o wana o ba le. Kanifuule, walta kala kalalaŋ la wa niŋ waŋnda kindilaa.
19 Oo Mɛlɛka nuu, yandii loonuŋ a ya ma dɔu ya sala, le sɔɔŋ ya tosal waŋnda haa woŋ kpou.
Tɛɛsiaalaŋ
^ Ɔɔ “mulu.”
^ Ɔɔ “wolioŋ.”
^ Hibuluiye, “o pilɛ o kɛmɛ kɛ kɛ choo.”
^ Ɔɔ “Maa I Yɔŋnuŋ Lende Fɔ!”
^ Tofa Tɛɛsiaa B14.
^ Ɔɔ “tabali.”
^ Ɔɔ “yɔŋgu nyɛ ni sɔlaa.”