Nɛhimaya 6:1-19
6 Dimioo nuaa mi Saŋbala, Tobaya, Kiisiɛm Aluabuiinɔɔ, a yaamɔɔwaa naa cheleŋnda tuei maa I miŋgi kpakioo taŋgul nduyɛ mi peelu tɛɛŋgula ndɔlaŋ (mi che bɛɛ a teleŋ koŋ yaa wou wɔ diola kpakilaŋ te),
2 o lepilɛ niŋ kpe, mi Saŋbala nda Kiisiɛm yɔŋ ya yooŋgoo hoo aa: “Huŋ miŋ kɛɛsiaŋ teleŋndo, miŋ bɔɔŋiaŋ o sɔndɔkɔlɔ pilɛ o lɛŋnde dɛŋgbɛleŋ niŋ Ono.” Kɛ kaŋgalaa nda wa tosaa ni le ya suɛi wɔɔŋnde tosallo.
3 Mi yɔŋ waŋnda a yooŋgoo naa nda chua, mi dimul nda aa: “I kandu wali sɔvɛ sɔviɔɔ tosaa. Lelaŋ, I nɔla mi mal ndu mi kuɛ le. Le yɛɛnɛ mi simi wallo le kɔlaŋ naa nya chua?”
4 Ma yɔŋ ya yooŋgu pilɔɔ hoo bɛmbɔɔ le hiɔɔlu kpulukuu. Kɛ teleŋ o teleŋ, nyɛpilɔɔ koni ya wa nda mulullo ni.
5 Okoŋ kɔɔli, mi Saŋbala yɔŋ buɛi ndɔɔ a yooŋgu pilɔɔ hoo kpe. Nduyɛ bɛmbɛ le ŋuɛɛnoo wa hoo ni. A teleŋndo hoo niŋ, yau o yɔŋ ndo wa buɛi ndɔɔ o ba o kumbiaa.
6 Mbo poonyiaa o yauwo hoo niŋ aa: “Waŋnda o lɛŋii balu naa ve niŋ cho dimioo maa, num ni, Chuuwa ni, la yeema mi la simul masaa. Nduyɛ Kiisiɛm bɛɛ cho ndi dimioo. Le sabu koŋ nya cho kpakioo taŋgullo ni. Ŋ tuei o konaa hoo niŋ maa num cho simnɔŋ masa ndaa ni.
7 Nduyɛ, a hɛli wanaa suaa le Mɛlɛka wa le ma yonda a num okɔɔ o Chulusalɛm niŋ kpou aa, ‘Masaa cho niŋ o Chuda niŋ!’ Ŋ cho masaa dimul a sɔɔŋ muŋ okɔɔ. Lelaŋ, huŋ miŋ huŋ chalnuŋ o sɔɔŋ muŋ choo.”
8 Kɛ mi mulul ndu aa: “Sɔɔŋ ŋ dimi muŋ ndoŋ kpou, i pilɛ bɛɛ cho tonya le. Numpila chal ni ma kɛɛsiaŋ muŋ o kɔl.”
9 Nda kpou wa kindiŋndo le naa siooŋnde lueiyo, ma dimi aa: “A cho kɔl tambu, okoŋ ma pɛŋgi wali kalaa tosaa.” Mi piɛi o Mɛlɛka lo le mbo ke ya kɔl simulaa.*
10 Mi kua o chiɛi Siɛmaya wo, po Dɛlaaya wo, po mama Mɛhitabɛɛ wo. Nduyɛ a teleŋ koŋ, ndoo feŋaŋ o chiɛi ndɔɔ le. Mbo dimul la aa: “Ŋ kɛɛsiaa teleŋndo miŋ kuɛ o chiɛi Mɛlɛka tonyaa niŋ, miŋ kɔ kiindiaŋ diolaŋ kɔɔli. Kanifuule, a cho hunɔɔ le num diyɔɔ. A cho num hunɔɔ diyɔɔ chuɛllɛŋ.”
11 Kɛ mi dimi aa: “Ya laŋunɔ kala waa nuaa nyaanuŋ ni? Ya cho hoo wo luɛi o chiɛi Mɛlɛkaa niŋ ni mi lo yoomu? I cho lakɔ loŋ te.”
12 Okoŋ mi sina maa o cho Mɛlɛka le vem ndu le. Kɛ Tobaya nda Saŋbala paawa* ndu ni, le mbo dimi sɔɔŋ muŋ a ya okɔɔ.
13 Paawaa nda paawa ndu ni le ya siooŋnde lueiyo le halikpeŋ mi tosa hakioo, okoŋ ma sɔla fondaa le tɔɔ nuu tɛɛmbuuwo, nduyɛ ma tusi ya siɔmbulaŋ.
14 Oo Mɛlɛka nuu, puɛɛnuŋ a sɔɔŋ Tobaya nda Saŋbala tosa woŋ te. Nduyɛ puɛɛnuŋ vɛlɛ a Nowadaya, wana lanɔ suaa le Mɛlɛka wo a wanaa cheleŋaa suaa le Mɛlɛka wa, a wa kindiŋndo le ya siooŋnde lueiyo wa le.
15 Miŋ chii kpakioo taŋgul a paŋgii Ilu* ve malɔ 25. Nduyɛ palɛi 52 naŋ chua ni le wallo hoo tosaa.
16 Dimioo nuaa yaamɔɔwaa naa a wanaa balu naa wa kpou tuei a ndi okɔɔ, nduyɛ ma cha maa wallo hoo chuu, mi siɔmbula bɛndulaŋ la bii nda. Okoŋ, ma sina maa Mɛlɛka naa kpeekpei mala naa ni miŋ chii wallo hoo.
17 O teleŋ koŋ niŋ, laŋgbaa kalla Chuda wa Tobaya yaulaŋ poonyiallo tau, nduyɛ mi Tobaya bɛɛ mulul nda.
18 Mi wanaa bɔɔbɔɔ o Chuda niŋ chua buŋgɛi i kala kala le Tobaya tooloo. Kanifuule, lefoo Siɛkanaya o wa ni, po Eluaa wo. Nduyɛ mi po ndɔɔ Chɛhohanaŋ chua chua Mɛsiulam ndo o nɔɔ niŋ, po Bɛluakaya wo.
19 Teleŋnda bɔɔbɔɔ, mi ndaa dimul la vɛlɛ sɔɔŋ kɛndɔŋ a Tobaya okɔɔ, nduyɛ nyɛ o nyɛ yaa dimi pɛ, a kɔ doonuŋ ndu kona. Okoŋ, mi Tobaya ndoo poonyial la yaulaŋ le ya siooŋnde lueiyo.
