Nɛhimaya 9:1-38
9 O paŋgii ŋɔmmɛu ve hei niŋ malɔ 24, mi Isɔluɛiya chuuŋgiaŋ diompilɛ. Ma bii sumndo, ma wounuŋ nyɛla labɛkilaŋ, nduyɛ ma wounuŋ chundoo choo.
2 Mi wanaa wa Isɔluɛiyaa kpeekpeiya wa piɔuwaŋ a mialaa wa nda tɛɛŋ nda kpou. Okoŋ, ma sim ma chɔɔmuu hakila ndalaŋ a hakila finyaa ndaa.
3 Okoŋ kɔɔli, ma sim o fondaŋ ndaa, ma veelu diomndaŋ o yau laSawa Chɛhowa Mɛlɛka ndaa niŋ choo choo, le hawɛilaŋ la yaa.* Nduyɛ le hawɛila yaa cheleŋ, a wa yɔŋnda ndala wɔɔŋndaŋ chɔɔmuuwo o Chɛhowa Mɛlɛka ndaa lo, ma tunduŋ ndu lachi.
4 Mi Chɛsuaa, Bani, Kadimiɛɛ, Siɛbanaya, Buni, Siɛluɛbaya, Bani, a Chɛnani kɔ sim o biŋ nda taŋgul le Livaiya wo choo, ma piɛi choo choo kpeleŋ o Chɛhowa Mɛlɛka ndaa lo.
5 Nduyɛ mi Livaiya haa, Chɛsuaa, Kadimiɛɛ, Bani, Hasiabinɛya, Siɛluɛbaya, Hodaya, Siɛbanaya, a Pɛtahaya dimi aa: “La chɔŋ mi la saŋgala Chɛhowa Mɛlɛka nyaa le fɛɛŋ a fɛɛŋ. Maa a saŋgala diola tɔɔmala numndaŋ Mɛlɛka, diola numnda cho la bɛndu, wana nɔla laŋ bɛɛ saŋgala le laŋ.
6 “Numpilɛ kpe cho Chɛhowa ni. Choo choo cho bɛɛ o kuaŋnaŋ kɛ kɛ wo a nyɛ o nyɛ cho leniŋ, num toosiaa ndu ni. Lɛŋndeŋ a nyɛ o nyɛ cho lechoo, pee mɛŋma ihɛllo a nyɛ o nyɛ cho leniŋ, num toosiaa muŋ ni. Nduyɛ num tosa ni mi nyɛ o nyɛ wa yoomu. Nyɛ o nyɛ cho o choo choo niŋ, o cho num wulaŋ beŋndo.
7 Num cho Chɛhowa, Mɛlɛka tonyaa ni. Num hɛli Ebilam ma soli ndu Ɔɔ o lɛŋnde Kaadiaŋ ndeŋ niŋ, ma ke ndu diolaŋ aa Ebilaham ni.
8 Ma saaluŋ maa o dɔu laalaŋndo o num niŋ a kɔl ndɔɔ kpou, okoŋ ma yii kpemaa a ndu le ma ke ndu a chuauwaa* nduaa lɛŋnde Kenanaitiiya, Hitaitiiya, Amɔluaitiiya, Pɛluisaitiiya, Chɛbusaitiiya, a Kikasaitiiya. Nduyɛ ma lo o lediom, kanifuule Mɛlɛka sakpoo ŋ cho ni.
9 “Ma cha saŋga finyaa naa mamaa wa niŋ Ichipi wo, nduyɛ ma tuɛi chaŋnda ndalaŋ o Pee Siaŋa Mɛŋma Ihɛllo.
10 Okoŋ ma tosa sɔɔŋ kɔndɔfilloŋ a kaamaalaŋ le Felo, buɛiyaa nduaa, a waŋnda o lɛŋnde ndɔleŋ niŋ kpou nyɛpalaa tusioo choo. Kanifuule, ma sina kɛsɛ maa a saaŋgiaa wanaa numnda. Ma tosa mi diola numndaŋ la fula tɔɔ haaa a paale hauleŋ ndeŋ.
11 Ma piɔu mɛŋma ihɛllaŋ tɛɛŋ kpala nda lachi, le ma keeku o lɛŋnde vesɛileŋ choo ma taŋ. Nduyɛ ma miisuu wanaa wa nda kiltaŋ kɔɔli wa o mɛŋma yiŋgilɛiyaŋ niŋ, mɛɛ pouwo tual nuaa o mɛŋma kpaaya bɛnduaŋ bɛŋgu yɛ.
12 A wa nda nɛiyo chɔmndo ipala a yumbu yumbu ikpuŋgbaa, nduyɛ ichɔl a yumbu yumbu leyiŋndo, le halikpeŋ ma sɔla nyɛ wawoŋndo, ma che naa nda cho kɔlaŋ nda.
13 Ma tual o Pembii Sanai Ve, nduyɛ a lo o choo choo niŋ ma suaa o nda lo. Ma ke nda sawala numnda cho sakpo laŋ, sawala tonyalaŋ,* a nyɛ o nyɛ nda nɔ le tosaa.
14 Ma pɛɛku nda le ma biilu Paale Pɛŋgiaaleŋ, mi le wa le diandaa. Nduyɛ, ma ke nda sawala numndaŋ a nyɛ o nyɛ nda nɔ le tosaa sanaa a buɛi numndo Muuse.
15 Mɛɛ yiaaŋ ma wa nda nɛiyo, ma ke nda nyɛdiaa fulaa o choo choo niŋ. Nduyɛ mɛɛ kolɔɔ bii nda, ma soli mɛŋndaŋ o pouwo niŋ. Ma dimul nda le ma kɔ chal o lɛŋnde ŋ mɛnaŋ* le nda kioo leŋ niŋ.
16 “Kɛ mi finyaa naa mamaa tosa kaa yoŋgaa, ma simnuŋ wanaa bolii kala,* a yeŋ nilaŋ o sawala numndaŋ te.
17 Ma kɛɛ le nilaŋ yaŋɔɔ, nduyɛ a loonuŋ pɛŋ sɔɔŋ kɔndɔfiliŋ ŋ tosa nda tɛɛŋ ndoŋ te. Ma simnuŋ wanaa bolii kala,* ma yulu waŋndo iso le mbo sim nda lachi, ma miiŋgu o chɛleŋ niŋ Ichipi. Kɛ Mɛlɛka cho o bɛɛndiaŋ lɔɔlɔɔ le waŋnda malɔɔ haki wo ŋ cho ni. A nɔ nyiɛɛye, a doonuŋ tumbe chɔ chɔ le, nduyɛ kaala lo lechoo numndo* cho bɔɔ. Le hei, a mel nda le.
18 Ma toosiaa vɛlɛ nau fɔŋndɔɔ a chiliŋnde,* ma wa dimioo aa, ‘Mɛlɛka naa cho hoo ni, o soli naa Ichipi wo.’ Nduyɛ a chɔm lebɛɛ kposoŋ le num te.
19 Kɛ a koŋ kpou, le mɛɛ ŋ nɔ nyiɛɛye tau yɛ, a mel nda o pollo niŋ te. Yumbu yumbu ikpuŋgbaa feŋaŋ nda choo ipala le nda nɛiyo chɔmndo le, nduyɛ yumbu yumbu leyiŋndo feŋaŋ nda choo ichɔl le nda chɔmndo naa nda cho kɔlaŋ nda le.
20 Ma ke nda nyina num diandaa le ma sɔla taasioo. A soli nda manɛiyo o sondo le. Nduyɛ mɛɛ kolɔɔ bii nda, ma ke nda mɛŋndaŋ.
21 Ma ke nda nyɛdiaa o pollo niŋ le wɔsilaŋ 40. Nyɛ o nyɛ ve nda lepɛŋ te. Nyɛla ndalaŋ la siɔŋ te, nduyɛ peluŋ hiinduu nda le.
22 “A ke nda masɛi a waŋnda, nduyɛ ma piɔu nda lɛŋndeŋ a buŋgaŋ, le halikpeŋ ma chal o lɛŋnde Saihɔŋ ndeŋ niŋ, koŋ cho ni, masaa le Hɛsibɔŋ, a o lɛŋnde Ɔku leŋ niŋ, masaa le Baasiaŋ.
23 Nduyɛ ma tosa mi puaa ndaa kui tau tau mɛɛ looŋ cho nuaa o choo choo niŋ yɛ. Okoŋ, ma huŋ a nda o lɛŋnde ŋ chuel finyaa ndaa mamaa buŋgɛi leŋ niŋ le ma chal loŋ.
24 Mi puaa ndaa kua ma kɔ bii lɛŋnde leŋ, nduyɛ ma mal Kenanaitiiya nda o ba, a wa ichali o lɛŋnde leŋ niŋnda. Masaa ndaa ni, wanaa wa o lɛŋnde leŋ niŋnda ni, ma mal nda nda o ba le ma tosa a nda mɛɛ nda yeema yɛ.
25 Nduyɛ ma bii chieeŋ ndaŋ bɛnduŋ nda taŋgul a kpakila kala kalalaŋ ndoŋ, a lɛŋnde ndale kɛndɛleŋ. Okoŋ, ma chal o chiɛila wa la piaa a nyɛm kɛndɛ kɛndɔŋ ndaŋ niŋ. Sooŋnda mamɛŋndaŋ la wa niŋ la tuauwaa, kpelela makilepiilaŋ, kpelela ma ɔlifiilaŋ, a kpelela yɔmii cheleŋnde la waŋnuŋ la hɔbɛi. Ma dia ma pum cha, ma chelul, nduyɛ ma tuɛi kɛndɛi num ii bɛnduei yeela.
26 “Kɛ a diikuŋ num te. Nduyɛ ma simul num, okoŋ ma mulul sawala numndaŋ kɔɔ.* Ma diu wanaa suaa le numnda, a wa nda silaa le ma miiŋgu num o ibuŋ nda. Nduyɛ, a chɔm lebɛɛ kposoŋ le num te.
27 Lelaŋ ma mal nda yaamɔɔwaa ndaa o ba, le ma hiou lachi a nda nyɛpalaa tusioo choo. Boondii ndaa wa o nyɛpalaa niŋnde, mi ndaa chaŋ naa num chua, nduyɛ ma tuei naa ŋ cho o choo choo niŋnda. Kɛ le mɛɛ ŋ nɔ nyiɛɛye tau yɛ, mi num oo ke nda wanaa piŋiaa, mi ndaa baŋa nda yaamɔɔwaa ndaa o ba.
28 “Kɛ te ndaa sɔla dɔɔ baŋaa pɛ, a miiŋgu vɛlɛ sɔɔŋ wɔɔŋndoŋ tosaa num o hɔl. Okoŋ ma mal nda vɛlɛ yaamɔɔwaa ndaa o ba, ma tusi nda vɛlɛ nyɛpalaa choo.* Okoŋ kɔɔli, ma muliŋ o numndo le malaa. Nduyɛ le mɛɛ ŋ nɔ nyiɛɛye tau yɛ, ma tuei nda diom naa ŋ cho o choo choo niŋnda, okoŋ ma baŋa nda.
29 Mi che bɛɛ mi num oo sila nda le ma tol sawala numndaŋ kɔɔli, kɛ ma chɔm kaa yoŋgaa, ma kɛɛ le laŋ nilaŋ yaŋɔɔ. Nduyɛ le mɛɛ nda kɛɛ sawala numndaŋ diikɔŋndo yɛ, ma tosa hakioo. Kanifuule, sawala numndaŋ diikɔŋndo tosa ni mi wanachioo wa yoomu. Ma tosa bolle kalaleŋ,* nduyɛ ma mulul num kɔɔ, a yeŋ num lani le.
30 Ma biunuŋ nda le wɔsiŋ bɔɔbɔɔ. Nduyɛ a wa wanaa suaa le num nda nyina numndo kioo le nda silaa, kɛ a yeŋ num lani le. O mɛɛlulaŋ kpɔŋ, ma mal nda wanaa wa o lɛŋii keŋ niŋnda o ba.
31 Le mɛɛ ŋ nɔ nyiɛɛye tau yɛ, a chɛl ma sɔla tambei ɔɔ ma mal nda le. Kanifuule, Mɛlɛka nɔ kɛndɛi a nyiɛɛye wo ŋ cho ni.
32 “Oo Mɛlɛka naa, Mɛlɛka bɛndoo, Mɛlɛka kpaayaa, Mɛlɛka waŋnda nɔ ma nɔ siooŋii nduɛi yo ŋ cho ni. Ma lo o kpema numndo choo, nduyɛ ma chɔm kaala lo lechoo wo. Puɛɛnuŋ a nyɛpalaa komal naa, masaa naa, laŋgbaa naa kalla, wanaa naa soliaa lasalaa, wanaa naa suaa le numnda, finyaa naa mamaa, a wanaa numnda kpou le, chɔŋ a teleŋ masaa yɛ yiaa o Asiiliaa niŋ haaa a paale hauleŋ ndeŋ.
33 Wana sakpoo ŋ cho ni. O sɔɔŋ keeku naa choo woŋ niŋ kpou, a wa sakpo a naa. Kɛ naŋ tosa sɔɔŋ wɔɔŋndoŋ a num ni.
34 Kanifuule masaa naa, laŋgbaa naa kalla, wanaa naa soliaa lasalaa, a finyaa naa mamaa diikuŋ sawala numndaŋ a sila ŋ wa nda le nyɛ nda nɔ ma tosa wo le.
35 Mi che bɛɛ mi wanaa ndaa wa nda choo ŋmasa, ma duau nda sala tau tau, nduyɛ ma ke nda lɛŋnde kɛndɛleŋ le kuaŋnaŋ kɛ kɛ, kɛ a piɛi num te. Nduyɛ ma hiau lachi a sɔɔŋ wɔɔŋndoŋ tosaa.
36 Nuawɔ mɛɛ naŋ simnuŋ niŋ hau chiaa yɛ. A tonya, ŋ simnuŋ chiaa o lɛŋnde ŋ ke finyaa naa mamaa le ma de komɔɔla ndɔlaŋ vɛlɛ a nyɛm kɛndɛŋ cheleŋ cho leniŋ ndoŋ.
37 Le hakila naalaŋ, nyɛm kɛndɛŋ bɛnduŋ cho fulaa o lɛŋndeŋ ndeŋ niŋndoŋ, masaa ŋ chɛl le ma wa naa choo wa nɔ niŋ muŋ ni. A cho kpaaya ndaa soliŋndo kpeku naa choo a chɔluaa naa mɛɛ nda hɛnaŋ yɛ. Lelaŋ naŋ cho o nyɛpalaa bɛndoo niŋ ni.
38 “Le sɔɔŋ yɔŋnuŋ muŋ ndoŋ kpou, ŋ chua buŋgɛi i kala kala, miŋ poonyiaa o yau choo, okoŋ mi laŋgbaa naa kalla, Livaiyaa naa, a wanaa naa soliaa lasalaa pila sooŋ lechoo.”
Tɛɛsiaalaŋ
^ Ɔɔ “lɛɛlɛlaŋ la yaa.” Hibuluiye, “paaleŋ tɛndaa tɛɛŋ sala hiɔɔlu, kumbuei i pilɛ.”
^ Hibuluiye, “kulle.”
^ Ɔɔ “sawala wana tiindaŋ ndaŋ.”
^ Hibuluiye, “heelu baa.”
^ Hibuluiye, “ma tosa kɛsuŋ ndaŋ kaŋgadaa.”
^ Hibuluiye, “ma tosa kɛsuŋ ndaŋ kaŋgadaa.”
^ Ɔɔ “kɛndɛi kaalɛi numnde.”
^ Ɔɔ “chiliŋii teeŋgiɛi.”
^ Hibuluiye, “ma viau sawala numndaŋ nda amakɔɔ.”
^ Ɔɔ “ma chuii nda mululu.”
^ Hibuluiye, “ma tosa kɛsuŋ ndaŋ kaŋgadaa.”
