Sɔɔŋ Chɔɔmaŋndoŋ 11:1-19
11 Ma ke ya tɛŋgɛleŋ maa sioŋnde tuwaa. Ma dimul la aa: “Chɔŋ ma tuu chiɛi Mɛlɛkaa,* a bandu luamaa lasalaa, a wanaa cho Mɛlɛka piɛiyo leniŋ nda.
2 Kɛ, bɛɛ chiɛi Mɛlɛkaa ndu ndu, tuu ndu le. Mal ndu lende, kanifuule a chii wanaa cho ŋChuu le wa ndu ke. Nduyɛ waŋnda haa cho chiee diandaa niɔu niɔu le paŋgoŋ 42.
3 I cho tosa mi seiyaa niaa ŋiɔɔŋnda chuɛɛnuŋ nyɛla imɔnɔ laŋ, ma dimi yooŋgu nuu le palɛi 1,260.”
4 Seiya haa sim le yɔmii ɔlifii ŋiiŋnde, a nyɛla kɛsiaala lambuila tiɔɔŋndaŋ. Nduyɛ a cho isisi Masanɔɔ le chieeŋndo lachi.
5 Te waŋndo yeema pɛ le nda nyɛ yɔŋ, yiŋndeŋ le fula nda o lasondo, le lom yaamɔɔwaa ndaa. Wana o wana kindiŋ pɛ le nda nyɛ yɔŋ, lende wana koŋ nɔ ni mbo sɔla piɔmndo.
6 Seiya haa nɔ kpaayaa le ma kinda choo choo, piɔɔ o piɔɔ se teleŋ nda wa yooŋgu Mɛlɛkaa dimioo wo le. A nɔ kpaayaa ma siiŋguu mɛŋndaŋ koowaŋ, nduyɛ a nɔla ma tusi kpundɛla suu o suu o chieeŋndo choo mɛɛ nda yeema yɛ.
7 Te a chii pɛ yooŋgu ndaa dimi, visi biyaa fula o sooŋ yiŋgilɛi nɔ lamɛɛlu le wo niŋndo cho nda chiŋalaŋ a sɔŋgɔɔ, mbo yem nda, nduyɛ mbo dii nda.
8 Dialuŋ ndaŋ vilɛiyoŋ cho wa o nɛi bɛndoo choo, o chiee bɛndu nda dii Masanɔ ndaa o yɔmndo choo wo. Nduyɛ Sodɔm a Ichipi sim le chioo hoo ni.
9 Waŋnda suu o suu, a lekaa o lekaa, a isɔɔ o isɔɔ maŋgalaa, a waŋnda lelɛŋ o lelɛŋ cho hunɔɔ dialuŋ ndaŋ tofa le palɛi i yaa a tɛndaa tɛɛŋ. A chɛl niŋ ma kumbu nda le.
10 Wanaa cho o chieeŋndo choo wa duaunuŋ niŋ nyaale le piɔm seiyaa ŋiɔɔŋnda haa sɔla wo. A tosa niŋ kɔl kɛndɔɔ, ma keŋnaŋ nyɔɔŋ, kanifuule wanaa ŋiɔɔŋaa ndaa suaa haa le Mɛlɛka wa, nyɛpalaa pila nda tusi wanaa cho o chieeŋndo choo wa choo ni.
11 Mɛɛ palɛi yaa keŋ a tɛndaa tɛɛŋ hiou, mi Mɛlɛka miŋgi nda hueiyii* yoomɛi niŋ, okoŋ ma sim o peluŋ ndaŋ choo. Mi siooŋii bɛnduei bii wanaa che nda wa.
12 Mi tuɛi diomndo o choo choo niŋ kpeleŋ. Mbo suaa o nda lo aa: “La hel nanuŋ.” Okoŋ ma helnuŋ choo choo o yumbu yumboo niŋ, nduyɛ mi yaamɔɔwaa ndaa cha nda.
13 A teleŋ koŋ kinɛi, mi lɛŋndeŋ le nyiiya tau tau. Chioo piɔuwo sala tɔ, mi kumbuei ipilɛ komba wɔlɔ wɔlɔ. Waŋnda 7,000 lɛŋnde nyiiya leŋ ndeŋ le dii ni. Mi siooŋnde bii waŋnda a tuaa kpou, okoŋ ma saŋgala Mɛlɛka cho o choo choo niŋndo.
14 Kpundɛ diiŋ ndɔɔ hiou hoo ni. Kpundɛ yaa ndɔɔ nɔ le hunɔɔ suŋ suŋ.
15 Mi maalikɛinɔ ŋɔmmɛuwo huaŋ bulu ndɔɔ. Okoŋ mi diomndaŋ la suaa o choo choo niŋ kpeleŋ aa: “Masale chieeŋndo le simnuŋ Masale Mɛlɛka naa a Kiliti, nduyɛ Mɛlɛka cho wa masaa le fɛɛŋ a fɛɛŋ.”
16 Bɛnduaa 24 wa ichali o kpeŋgbeila* ndala lemasalaŋ choo Mɛlɛka lachi wa, ma baŋ wulaŋ a hɔlla a tundaa ma piɛi Mɛlɛka.
17 Ma wa dimioo aa: “Ŋ mel num balika Chɛhowa,* Mɛlɛka Kpaaya Kpou Kpou Wo, kanifuule a soliŋ kpaaya num bɛndoo kpeku, ma kandu masaleŋ. Num cho pɛŋgoo hoo, nduyɛ ma wa kani masindɛ ni.
18 Mi waŋnda o lelɛŋ o lelɛŋ niŋ duaunuŋ tumbe, kɛ mi num bɛɛ duaunuŋ tumbe a nda. Mi teleŋndo fuuluu le ma kɔɔsa a wanaa vi wa, nduyɛ ma fanda buɛiyaa numnda. Nda cho ni, wanaa suaa le num nda, a wanaa diandaa, a wanaa nɔ siooŋnde le diola numndaŋ nda, wana pɔmbɔ ni, wana bɛndu ni. Okoŋ ma tɛɛmbuu wanaa cho chieeŋndo tɛɛmbuuwo wa.”
19 Mi chiɛi Mɛlɛkaa o choo choo niŋ kumbiŋ, okoŋ mi kɔfu kpemaa o chiɛi ndɔɔ niŋ chɔɔmuŋ kpendekele. Okoŋ kɔɔli, mi nyɔɔ kiolu ŋualalɛi, mi tuɛi diomndaŋ a taŋndaŋ deŋioo. Mi lɛŋndeŋ le nyiiya, nduyɛ mi looŋ kpuŋgbaŋ deli tau tau.
Tɛɛsiaalaŋ
^ Koŋ cho ni, Fondaŋ Hiou Diondɔɔ o chiɛi Mɛlɛkaa niŋndo.
^ Kilikiiye, “nyina.”
^ Ɔɔ “kpɛŋɛla.”
^ Tofa Tɛɛsiaa.
