Sɔɔŋ Chɔɔmaŋndoŋ 21:1-27
21 Mi cha choo choo sɛnɛiyo a chieeŋ sɛnɛiyo, kanifuule choo choo paandoo a chieeŋ paandoo faŋaŋ. Nduyɛ pee mɛŋma ihɛllo cho lɛ le.
2 Mi cha vɛlɛ chiee diandaa, Chulusalɛm Sɛnɛiyo. O wa chɔnɔŋndo o Mɛlɛka lo choo choo, mbo wa tolɔɔ. O wa o bɛɛndiaa nyɛkɛndɛ kɛndɛi le pɔnɔ ndɔ.
3 Okoŋ, mi tuɛi diomndo fulaa o kpeŋgbei* lemasaa. Mbo dimi choo choo kpeleŋ aa: “Naa chalaa* Mɛlɛkaa cho ŋwaŋnda chiee tɛɛŋ. O cho wa latulu a nda, nduyɛ ma wa wanaa ndɔ. Mɛlɛka pila cho wa nda tɛɛŋ.
4 O cho nda mamɛmɛ o mamɛmɛ wɔɔsuu o hɔl fo. Piɔm ve lɛ niŋ te, chaŋ ve lɛ niŋ te, kɔl tambɛi ve lɛ niŋ te, kɛlɛŋgaa mi nyɛ nɛiyaa wa, kanifuule nyɛ o nyɛ paandu chuu faŋaŋ.”
5 Mi wana wa ichali o kpeŋgbei lemasaa choo wo dimi aa: “I cho nyɛ o nyɛ fee miŋgi o sɛnɛi.” Mbo chɔɔlu ya dimul aa: “Poonyiaa, kanifuule tonya diomndaŋ ndaŋ la cho ni, nduyɛ wana nɔla ma tiindaŋ ndaŋ.”
6 Mbo dimul la aa: “Nyɛ o nyɛ chuu yɔŋnɔŋ! Ya cho Alifa a Omeka ni.* Wana o wana kolɔɔ bii pɛ, I cho ndu ke mɛŋma yɔŋgu yoomoo waŋ o pee buuloo mbo kol, o paawa* nyɛ o nyɛ le.
7 Wana o wana yem pɛ, I cho ndu nyɔɔŋ muŋ ke. I cho simnɔŋ Mɛlɛka ndɔ, mi ndu simnuŋ po ni.
8 Kɛ wanaa isiooŋ nda kinɛi, a wanaa nɔ laalaŋ te wa, a wanaa wou balaŋ o kaala nɔɔlɛilaŋ niŋnda, a wanaa diu diu waŋnda wa, a wanaa kaa ihini nɔɔlɛiya,* a wanaa cho o walta nyinaa wɔɔŋnda niŋnda, a wanaa sooluu piɔmnda wa, a wanaa lachoowaa kpou, a cho nda wuu o fondaŋ yiŋnde wule wule bɛndoo niŋ. Piɔm diiŋ ndɔɔ cho koŋ ni.”
9 Okoŋ, mi maalikɛiyaa ŋɔmmɛuwa opilɛ, a hɛŋgɛila ŋɔmmɛulaŋ la wa o laba a kpundɛla ŋɔmmɛula mɛɛlaalaŋ la piaa leniŋndo huŋ, mbo dimul la aa: “Huŋ mi chɔm num lanɔ Saa Fɔŋndɔɔ nɔ le chuaa o nɔɔ niŋndo.”
10 Mi maalikɛinɔɔ hoo soliŋ nyina diandaa kpeku, mbo kua a ya o pembii vilɛi bɛndu bɛnduei choo. Mbo chɔm ya chiee diandaa, diolaŋ Chulusalɛm. Chioo hoo wa chɔnɔŋndo choo choo o Mɛlɛka lo, mbo wa tolɔɔ.
11 O wa woli wolioo a biilu Mɛlɛkaa. O wa ŋɛlɛŋgi ŋɛlɛŋgi naŋ chaa pou baa kala bɛndoo ni. O wa diondɔɔ naŋ chaa pou chasipaa* wo ni, mɛɛ mɛɛ sani humboo diandu nuaa fo fo yɛ.
12 Kpaki vilɛi bɛndoo wa chioo hoo o balaa kpɔkɔsu. Ndoo nɔ diolaŋ 12 le luɛiyɔɔ, nduyɛ maalikɛiya 12 wa isisi o diola laŋ. Ma poonyiaa diola kayii 12 nde o Isɔluɛi niŋ o diola luɛiyaalaŋ ndaŋ.
13 Ba paaleŋ le chaŋndo diolaŋ la yaa, ba luaŋndo diolaŋ la yaa, ba touwo diolaŋ la yaa, ba paaleŋ le del lo diolaŋ la yaa.
14 Chiyii kpakioo hoo ndii nɔ poutaŋ 12. Diola kiilaa 12 Saa Fɔŋndɔɔ la wa la poonyiaa o pouta 12 nda laŋ choo.
15 Wana wa suɛi o ya lo wo ndoo nɔ sioŋnde tuwaa leŋ o ba. A kooliiyoŋ nda toosiaa leŋ ni. Nduyɛ le wa le chioo hoo tuuwo, diolaŋ le luɛiyɔɔ, a kpaki ndɔɔ.
16 Kpeŋguŋ hiɔɔluŋ chioo hoo ŋ wa kpeŋ kpeŋ. Mɛɛ chioo hoo bandu yɛ koni o toŋgu ni. Mbo tuu ndu a sioŋndeŋ, nduyɛ bandii nduɛi wa le kilolaŋ 2,220.* Bandii chioo hoo, a toŋgii nduɛi, a helɔɔ ndɔɔ, nyɛ pilɛ kpe o cho ni.
17 Mbo tuu vɛlɛ kpaki chioo hoo. O wa helɔɔ le nɛiyo 210.* Nduyɛ, a nyɛ waŋchieeya tuuwo maalikɛinɔɔ hoo tuu chiee koŋ ni.
18 A pou chasipaa wo nda taŋgul kpakioo hoo ni. Chioo pila ndu, a kooliŋ kɛndɛ kɛndɔŋ nda taŋgul ndu ni, mɛɛ mɛɛ sanioo wa nuaa o humbu fo fo yɛ.
19 Chiyii kpaki chioo hoo yɛ, a pouta baa kalala suu o suu nda chɔu ndi ni. Pou tase nda chɔu ndi wo cho chasipaa ni. O diiŋ ndɔɔ, safaya. O yaa ndɔɔ, kalisidoni. O hiɔɔloo, ɛmilɔɔ.
20 O ŋuɛɛnoo, sadonisi. O ŋɔmpumndo, sadiɔɔsi. O ŋɔmmɛuwo, kilisolati. O ŋɔmaawo, bɛlui. O ŋɔmahiɔɔloo, topaasi. O tɔ ndɔɔ, kilisopileesi. O tɔ a opilɛ ndɔɔ, hayasiŋ. O tɔ a o diiŋ ndɔɔ, amɛtisi.
21 Nduyɛ pouta baa kalalaŋ 12 la wa o diola luɛiyaala 12 ndaŋ. Ndaa toosiaa dio kɛ kɛ a pou baa kalaa opilɛ. Nɛi bɛndu keeku o chioo hoo niŋndo, a kooliŋ kɛndɛ kɛndɔŋ nda toosiaa ndu ni, mɛɛ mɛɛ sanioo wa nuaa o humbu fo fo yɛ.
22 I chi chiɛi Mɛlɛkaa o chioo hoo niŋ te, kanifuule Chɛhowa,* Mɛlɛka Kpaaya Kpou Kpou Wo, a Saa Fɔŋndɔɔ, nda cho chiɛi ndɔɔ ni.
23 Chioo hoo heu ba a paaleŋ ɔɔ a paŋgei le nyɛ wawoŋ te, kanifuule biilu Mɛlɛkaa tosa ni mi nyɛ wawoŋndo wa, nduyɛ Saa Fɔŋndɔɔ cho lambui ndɔɔ ni.
24 Kaalaŋ kpou la cho wa kɔlaŋ o nyɛ teŋgaa ndɔɔ niŋ. Nduyɛ masaa o chieeŋndo niŋ cho hunɔɔ a biilu ndaa o chioo hoo niŋ.
25 Diolaŋ le luɛiyɔɔ o chioo hoo, la cho wa la kumbiaa le paaleŋ kpɛŋ. La kindaŋ niŋ te, kanifuule nyumma cho wa loŋ te.
26 Waŋnda cho hunɔɔ a bɛɛleŋ vɛlɛ a biiloo o chioo hoo niŋ.
27 Kɛ nyɛ o nyɛ nɔɔlɛi luei niŋ loŋ te. Nduyɛ wanaa nɔ balaŋ o sɔɔŋ nɔɔlɛiyoŋ niŋ, a o choolaŋ niŋnda, nda bɛɛ a luei niŋ loŋ te. Wanaa diola ndalaŋ la cho la poonyiaa o yau yoomoo niŋnda, Saa Fɔŋndɔɔ yau ndɔɔ, nda kinɛi luɛi niŋ loŋ ni.
Tɛɛsiaalaŋ
^ Ɔɔ “kpɛŋɛ.”
^ Ɔɔ “tɛndii.”
^ Ɔɔ “Kandɔŋndo a Mɛɛlulaŋ.”
^ Ɔɔ “sala.”
^ Tofa Tɛɛsiaa.
^ Waŋnda apum dimi maa dɛɛmuiye pouwo hoo cho ni.
^ Kilikiiye, “Fondaŋnda bɛndula luaa bɔltaŋ 12,000.” Fonda luaa bɔllo opilɛ, o wa le nɛiyo 606 a nyɛ lechoo. Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
