Sɛfanaya 1:1-18
1 Boondii Choosaya po Amɔŋ ndo wa masaa Chuda wo, mi Chɛhowa suaa o Sɛfanaya* lo, po Kusaiyo. Nduyɛ Kusai, finya ndɔ wa Kɛdalaya ni. Kɛdalaya, finya ndɔ wa Amaluiya ni. Amaluiya, finya ndɔ wa Hɛsikaya ni. Mbo dimul ndu aa:
2 “I cho hunɔɔ nyɛ o nyɛ cho o chieeŋndo choo bɛɛsuu tɛɛ,” Chɛhowa dimi lende ni.
3 “I cho hunɔɔ waŋnda chieeya a visiaa tɛɛmbuu,
Mi tɛɛmbuu vɛlɛ youwa, a suuwaa cho o pee mɛŋma ihɛllo niŋnda.I cho hunɔɔ nyɛm tosa mi waŋnda boŋ ndoŋ* faŋa a wanaa dɛnɛ wɔɔŋnda latulu.Nduyɛ, I cho hunɔɔ waŋnda chieeya faŋa bau o chieeŋndo choo,” Chɛhowa dimi lende ni.
4 “I cho hunɔɔ waŋnda Chuda,A waŋnda Chulusalɛm kpou nyɛpalaa tusi choo.Nyɛ o nyɛ cho mbo chiɛɛliaŋ a Baal, I cho ndu hunɔɔ faŋa o fondaa hoo,Nduyɛ, mi faŋa wanaa soli salalaŋ le mɛlɛkaa lachoowaa wa, latulu a wanaa soliaa lasalaa cheleŋ.
5 Wanaa baŋ wulaŋ o chiɛilaŋ tullo ma piɛi nyɛm cho o choo choo niŋndoŋ nda,A wanaa baŋ wulaŋ ma piɛi Chɛhowa, kɛ ma sooluu vɛlɛ mɛlɛka nɔ diolaŋ aa Malikam ndo wa,I cho nda hunɔɔ tɛɛmbuu.
6 Wanaa faŋaŋ Chɛhowa kɔɔli wa,A wanaa kɛɛ le Chɛhowa nuuviaa ɔɔ nyunaa le nɛi chɔmaa wa, I cho nda hunɔɔ tɛɛmbuu.”
7 La mei doŋ Chɛhowa lachi, Mɛlɛka Kpuluŋguma Bɛndoo, kanifuule paale Chɛhowa leŋ le cho niŋ kpɛɛluŋ.
Chɛhowa toosiaa salaa, nduyɛ o chii wanaa o veelu le ndu wa dindi.
8 “O paale ya Chɛhowa cho salaa soli leŋ choo, I cho waŋ banaa,Chuauwaa masaa, a wana o wana chuɛɛnuŋ chuɛɛnɔŋ mialla yamɛi kilul.
9 O paale leŋ choo, I cho wana o wana hel o biŋndo* choo,A wanaa pei chiɛi masanɔ ndaa cha a sɔŋgɔlaŋ, vɛlɛ a kafalaŋ nda yamɛi kilul.”
10 Chɛhowa dimi aa: “O paale leŋ choo,Chaŋndaŋ la cho wa fulaa o Dio Kpaki Suuwa.A cho wa koŋullo o Fondaŋ Sɛnɛiyo o chioo niŋ,Nduyɛ mi bɔɔluu bɛndoo wa fulaa o pemboŋ choo.
11 Nya waŋnda Makitɛsi,* la koŋul choo choo a chaŋndo,Kanifuule, yulaa* kpou chuu wu.*Wanaa tuu kaniŋ humboŋ nda kpou sɔla tambei.
12 A teleŋ koŋ, I cho nuuviaa tɛɛ tɛɛ o Chulusalɛm niŋ a lambuilaŋ,Okoŋ mi tusi wanaa buulaŋ te wa* nyɛpalaa choo, kanifuule a cho dimioo o kɔlta ndalaŋ niŋ aa,‘Chɛhowa tosa niŋ ikɛndɛ le, nduyɛ o tosa niŋ iwɔɔŋ te.’
13 A cho sulta ndalaŋ poondiaa, nduyɛ ma tɛɛmbuu chiɛila ndalaŋ.
A cho chiɛilaŋ taŋgul, kɛ a cho wa leniŋ te.A cho kpelela makilepiilaŋ tosa, kɛ a cho muɛima cho wa fulaa loŋ ndaŋ kolɔɔ le.
14 Paale bɛndule Chɛhowa leŋ le cho niŋ kpɛɛluŋ!
Le cho niŋ kpɛɛluŋ, nduyɛ le cho hunɔɔ chɔ chɔ!
Bɔɔluu cho wa o paale Chɛhowa leŋ choo wo cho wa o lolɛi kpali.
O paale leŋ choo, kuubaa chɔuwa cho deŋi choo choo kpeleŋ.
15 Paale kɔl tuuleŋ pila paale leŋ le wa niŋ ni,Paale kpundɔɔ a nyɛpalaa,Paale hueiyii fuku fukuei a paale tɛɛmbaa leŋ,Paale nyumma bɛnduaŋ ma cho tolɔɔ kpiŋgbi leŋ,Paale yumbu yumboo o halaa niŋ cho piimiaa kpilo kpilo wo,
16 Paale buloo a wooluŋ wooluŋ chɔuwo suaa niŋ,Le chieeŋ kala kalaŋ, vɛlɛ a bandula vilɛila cho o sɔŋgila kpaki chioo laŋ tɛɛmbuuwo wo.
17 I cho waŋnda chieeya nyɛpalaa tusi choo,Okoŋ ma wa balɔɔ maa wanaa sumɛi,Kanifuule, a tosa hakioo a Chɛhowa.
Kooma ndaŋ ma cho tala lɛŋ maa chundu,Nduyɛ dialuŋ* ndaŋ cho wa maa poola visiaa.
18 Kaniŋ ndaŋ humboŋ a kooliŋ ndaŋ nɔla niŋ nda piŋi o paale kɔl tuule Chɛhowa leŋ choo le.Kɔl ndɔ tuu cho maa leyiŋ ndo cho lɛŋndeŋ kpou lomɔɔ,Kanifuule, o cho hunɔɔ waŋnda o lɛŋndeŋ choo tɛɛmbuu, nduyɛ o ve niŋ tɛɛmbuu bɛɛŋ bɛɛŋ te.”
Tɛɛsiaalaŋ
^ Diolaŋ ndaŋ la sim, “Wana Chɛhowa Veŋ Ndo (Che o Sɔvɛ Wo).”
^ Naapum nyɛm ɔɔ kaala chiɛɛliaŋ a piɔmnda sooluuwo laŋ.
^ Ɔɔ naapum, biŋ kpeŋgbei ɔɔ kpɛŋɛ lemasaa cho wo.
^ Naapum fondaa o Chulusalɛm niŋ o Dio Kpaki Suuwa ikɛi.
^ Ɔɔ “yulaa bɛnduaa.”
^ Hibuluiye, “mei doŋ.”
^ Hibuluiye, “wanaa chalnuŋ kpɛ maa kii mamuɛi ya.”
^ Hibuluiye “puluŋ.”
