Sɛfanaya 2:1-15
2 Nya wanaa nɔ haa lasiɔmbu le wa, la chuuŋgiaŋ naapilɛ,A tonya, la chuuŋgiaŋ naapilɛ.
2 Tuupa mi sɔɔŋ dimiŋ ndoŋ yɔŋnuŋ,Tuupa mi paale leŋ le hiou maa latɛfɛ,Tuupa mi kɔl tuu bɛndu Chɛhowa wo hiŋ nya choo,Tuupa mi paale kɔl tuule Chɛhowa leŋ le hiŋ nya choo,
3 La nuuviaa Chɛhowa, nya wanaa tusiaŋnda kpou o lɛŋndeŋ choo,Nya cho sawala ndɔla diandaa laŋ biyɔɔ wa.
La nuuviaa sakpoyɛi, nduyɛ mi la nuuviaa tusiŋndo.
Kɛlɛŋgaa dɔɔ mi la sɔla naa viaŋnaŋnda o paale kɔl tuule Chɛhowa leŋ choo.
4 Kanifuule, chiee bɛndoo Kaasa cho simnɔŋ pɔmndo,Nduyɛ mi Asikɛlɔŋ sɔla tambei.
A cho waŋnda Asidɔɔ touwɔɔ ipala deŋ,Okoŋ mi Ɛkulɔŋ sɔla tambei kpata kpata.
5 “Kpundɔɔ cho le nya Kɛluitaitiiyaa cho o pee mɛŋma ihɛllo ikɛiya!
Chɛhowa chii nya yamɛi kilul.
Nya waŋnda Kenaŋ o lɛŋnde Filiitiaa leŋ niŋ, I cho nya tɛɛmbuu,Okoŋ wana pilɛ bɛɛ cho lo le.
6 Fondaŋ cho o pee mɛŋma ihɛllo ikɛi yo cho simnɔŋ yondo saa kua diolaŋ ndo,O cho nɔ sooŋnda mamɛŋndaŋ le wanaa mandaa lasaa, vɛlɛ a fondaŋ saa lɔl lo.
7 O cho simnɔŋ tandaa le wanaa cho lo yoomu o yuŋgu Chuda wo niŋnda.Loŋ nda cho wa nyɛdiaa sɔlaa le dioo ni.
O chiɛila waŋnda Asikɛlɔŋ niŋ nda cho wa luaŋ ichɔl ni,
Kanifuule, Chɛhowa Mɛlɛka ndaa cho nda hɔlla mulul,Nduyɛ mbo chuuŋgiaa a nda kuɛ o biyɔɔ niŋnda naapilɛ.”
8 “I tuei mɛɛ waŋnda Mowaabi cho wanaa niaa tɔɔ tɛɛmbuuwo, nduyɛ a mɛɛ Amɔnaitiiya cho nda yioulaŋ yɛ.A chua wanaa niaa chɔdɔ, nduyɛ ma wa yoŋgaa kiolɔɔ le nyɛ nda cho tosa o tanda ndaa niŋndo.”
9 Chɛhowa, Mɛlɛka puaa chɔuwa,* Mɛlɛka Isɔluɛiya dimi aa: “Lelaŋ, mɛɛ i cho kpendekele maa I cho yoomu yɛ,Mowaabi cho simnɔŋ maa Sodɔm,Nduyɛ mi Amɔŋ simnuŋ maa Komoolua.O cho simnɔŋ fondaŋ ŋyɔɔ, sooŋ ihɛllo, nduyɛ mbo simnuŋ bembelaŋ lefafɛɛŋ.
Wanaa niaa cho lo yoomu wa cho nyɛm ndaŋ poondiaa,Nduyɛ, lɛŋii ndɛi cho wa le wanaa niaa cho lo yoomu wa.
10 Hei cho nda yɔŋnɔŋ ni le yoŋga nda kelu wo,Kanifuule a heeluŋ ndapila, nduyɛ ma chua wanaa Chɛhowa wa chɔdɔ, Mɛlɛka puaa chɔuwa.
11 Siooŋii bɛndu bɛnduei cho nda biyɔɔ le Chɛhowa.Kanifuule, o cho mɛlɛkaa o lɛŋndeŋ choo kpou siiŋguu nyɛm fondoŋ fuu,Nduyɛ, wanaa cho o lɛŋii mɛŋndaŋ ma balu ve niŋnda kpou cho ndu wulaŋ beŋ,*Ba o ba nda wa pɛ.
12 Nya waŋnda Itoopiaa bɛɛ, I cho nya diu a muɛi nii faŋnde.
13 O cho ba ndɔɔ siɛndi ba luaŋndo, okoŋ mbo tɛɛmbuu Asiiliaa,Nduyɛ o cho Ninivɛɛ tɛɛmbuu, mbo veesiaa ndu mɛɛ pollo wa nuaa yɛ.
14 Loŋ chɔluaa a visiaa yonduaa suu o suu cho wa luaŋ ni.
Youwaa pɛlikaŋnda a sɛiya cho wa luaŋ o suŋgbuma chieeŋ ndɔŋ bɛndoŋ choo.
A tuɛi niŋ diom ŋchondoo fulaa o wundɛilaŋ.*
Dɛnɛ tambɛiyo cho wa o diola ndalaŋ.Kanifuule, o cho pɛŋgɔŋ yɔmii sidaa ve soli o bɛɛ kpendekele.
15 Chiee heelaŋ bɛndoo hoo waŋnuŋ o hɛnɛkɛyɛi niŋ.O wa dimioo o kɔl niŋ aa, ‘O fulawɔ o ya kɔɔli, wana o wana cheleŋ cho le.’
O simnuŋ fondaŋ waŋnda cha mi siooŋnde bii nda wo,Fondaŋ visiaa yonduaa hini wo.
Wana o wana huŋ wa pɛ hiouwɔɔ mbo che ndu, o cho huiye hɔŋ, okoŋ mbo hiiluu bolleŋ.”
