Sɛfanaya 3:1-20
3 Kpundɔɔ cho le chiee nila kaloo hoo, chiee nɔɔlɛi cho hoo wanaa nduaa nyɛkindilaa handɔɔ choo wo!
2 Waŋnda o chioo hoo niŋ yeŋ wana lani le, nduyɛ a bii sila le.
A kɛɛ le Chɛhowa Mɛlɛka ndaa tiindaŋndo, nduyɛ ma kɛɛ le ndu sɔɔŋguuwo ikɛi.
3 Laŋgbaa kalla o chioo hoo niŋ cho ko mɛɛ kpɔkuŋnda* wa nuaa pɛɛliaa yɛ.
Wanaa nduaa kialaa ŋyamaa cho ko maa tiwolla o nyumndaŋ niŋ,Nduyɛ paa bɛɛ a mɛi le sɔmndo diimandɔɔ le.
4 Wanaa heelaŋnda a wanaa kaŋgalaa wanaa nduaa suaa le Mɛlɛka wa cho ni.
Wanaa nduaa soliaa lasalaa nɔɔliaa nyɛ cho o diandaa wo,Nduyɛ ma mulul sawala Mɛlɛkalaŋ kɔɔ.
5 Chɛhowa cho sakpo, nduyɛ o cho o chioo hoo niŋ. O tosa suɛi wɔɔŋ te.
Mɛɛ paaleŋ le fula nuaa lepaa o lepaa yɛ,Lende koni o chɔm sawala ndɔlaŋ idii o idii ni.
Kɛ wana dɛnɛ wɔɔŋndo ndu, o sina nyɛ cho siɔmbulaŋ ndo le.
6 “I chii lɛŋii ndɛi tɛɛmbuu, nduyɛ mi tɛɛmbuu bandula nda taŋgul o sɔŋgila kpaki chioo laŋ.
Mi tɛɛmbuu nɛila ndalaŋ, okoŋ wana o wana ve lɛ keeku lechoo le.
Mi chieeŋ ndaŋ bɛndoŋ lo pɔmndaŋ, okoŋ wana o wana ve lɛ loŋ te.
7 Mi dimi aa, ‘La cho siooŋii nii nɔ, nduyɛ mi la chɛl silaa,’
Le halikpeŋ chalta nyalaŋ la sɔla tambei le.I cho nya nyuna mi la dɔɔnuŋ kona le sɔɔŋ nya tosa muŋ ndoŋ kpou.
Kɛ la wa hiouwɔɔ lachi a sɔɔŋ wɔɔŋndoŋ tosaa.
8 Mi Chɛhowa dimi aa, ‘Lelaŋ, la hiou lachi a ya chumndo,Haaa mi paale ya cho nda chiŋalaŋ, mi poondiaa nyɛm ndaŋ ndeŋ le fuuluu.Kanifuule, I kɛɛsiaa le lɛŋnde a masɛi chuuŋgiaa naapilɛ,Le mi tusi nda kɔl ni tuu kala kalaa choo.Nduyɛ, kɔl ni tuu cho maa leyiŋ ndo cho lɛŋndeŋ kpou lomɔɔ.
9 I cho suɛi maŋgalɛi waŋnda dimi ve siŋga a suɛi maŋgalɛi walaŋnde,Le mi nda kpou saŋgala diola nilaŋ, Chɛhowa.Okoŋ, ma piɛi ya o diompilɔɔ niŋ.’
10 Wanaa cho ya piɛiyo ma wa a saŋnaŋnda wa,A cho chɔnɔŋ o tanda peelaŋ la cho Itoopiaa wo niŋ, ma chuu ya kela ndalaŋ.
11 O paale leŋ choo, Chulusalɛm tulnuŋ niŋ lasiɔmbuLe sɔɔŋ o tosa mbo simul la woŋ te,Kanifuule, I cho wanaa heelaŋaa cho o ndu niŋnda soli.Nduyɛ, fɛɛŋ bɛɛ o heeluŋ lɛ niŋ o pembii nii diandɛi choo le.
12 Wanaa tusiaŋnda kinɛi ya cho chɛlɔɔ ni ma lo o ndu niŋ,Nduyɛ mi diola nilaŋ Chɛhowa, la wa naa ndaa viaŋnaŋnda.
13 Isɔluɛiyaa cho lo yoomu wa hiu lɛ niŋ lachi a yɔŋ wɔɔŋndo tosaa le.A dimi lɛ niŋ lachoo ɔɔ ma soliŋ diɔɔmuii ndɛi kpeku le waŋnda huiyo le.A cho wa diolaŋ ma hiniŋ, nduyɛ wana o wana luei lɛ niŋ nda isiooŋ te.”
14 Nya waŋnda Saayɔŋ, la deŋi a nyaaloo!
Nya waŋnda Isɔluɛi, la dɔɔnuŋ nyaale!
Nya waŋnda Chulusalɛm, la wa a kɔl kɛndɛ, nduyɛ mi la dɔɔnuŋ nyaale a kɔlta nyalaŋ kpou!
15 Chɛhowa chii nyɛpalaa nya wa niŋndo faŋa.
O chii yaamɔɔwaa nyaa touwɔɔ.
Chɛhowa, Masaa le Isɔluɛi cho a nya latulu.
Fɛɛŋ bɛɛ siooŋii kpundɛ ve lɛ niŋ nya le.
16 O paale leŋ choo, Chulusalɛm tuɛi niŋ diomndaŋ ndaŋ aa:
“Yɔŋ isiooŋ te, Saayɔŋ!
Wu ŋdial te.*
17 Chɛhowa Mɛlɛka numndo cho a nya latulu.
Wana kpaaya bɛndoo o cho ni, nduyɛ o cho nya piŋi.
O cho wa a kɔl kɛndɛ bɛndoo le nya, nduyɛ mbo dɔɔnuŋ nyaale tau.
Kaala o nɔ le nya wo cho tosa mbo hini kɔl mɛɛ.
O cho wa a kɔl kɛndɛ le nya, nduyɛ mbo dɔɔnuŋ nyaale.
18 Wanaa cho mɔnɛi biyɔɔ le mɛɛ nda cho lɛ bɔŋaŋndaŋ biyɔɔ a nya latulu le yɛ, I cho nda chuuŋgiaa naapilɛ.A ve nya tɛɛŋ te, kanifuule a wa o biyɔɔ niŋ ma wa tɔɔ wɔɔŋ wa nda choo wo biuwɔŋndo.
19 A teleŋ koŋ, I cho wanaa cho nya nyɛpalaa tusioo choo wa kpou chiŋalaŋ,Nduyɛ mi piŋi namtaa cho nya tɛɛŋ nda.I cho a saŋnuŋ nda chuuŋgiaa naapilɛ.
I cho tosa mi waŋnda lisa nda, nduyɛ ma fula tɔɔ,O lɛŋii nda tusi nda siɔmbulaŋ nde niŋ kpou.
20 A teleŋ koŋ, I cho nya chuuŋgiaa naapilɛ,Mi miŋgi nya o nya lo.
I cho tosa mi la fula tɔɔ, nduyɛ mi waŋnda o lɛŋndeŋ choo kpou lisa nya.Numpila cho hei chɔ, teleŋ ya cho wanaa num aa kuɛ o biyɔɔ niŋnda chuuŋgiaa naapilɛ wo,” Chɛhowa dimi lende ni.
