Sɛkalaya 1:1-21
1 Wɔsi diiŋ ndɔ Daaliɔɔ chiŋa wɔsilaŋ la tiɔɔŋ o masaleŋ choo wo, o paŋgii ŋɔmaa ve niŋ, mi Chɛhowa suaa o wana suaa le ndu wo lo Sɛkalaya, po Bɛluakaya wo. Nduyɛ, Idɔɔ velu Bɛluakaya ni. Mbo dimi aa:
2 “Chɛhowa dɔɔnuŋ tumbe tau a finyaa nyaa vɛlɛ a finyaa nyaa mamaa.
3 “Dimul nda aa, ‘Nyɛ ya Chɛhowa, Mɛlɛka puaa chɔuwa* dimi wo cho hoo ni: “‘La miiŋgu ya o ibuŋ.’ Ya Chɛhowa, Mɛlɛka puaa chɔuwa dimi lende ni. ‘Mi ya bɛɛ miiŋgu nya o ibuŋ.’ Ya Chɛhowa, Mɛlɛka puaa chɔuwa dimi lende ni.’”
4 “‘La wa maa finyaa nyaa vɛlɛ a finyaa nyaa mamaa le. Mi wanaa ndaa suaa paandu le Mɛlɛka wa dimi a nda okɔɔ aa: “Nyɛ Chɛhowa, Mɛlɛka puaa chɔuwa dimi wo cho hoo ni, ‘A yandii, la mulul yɔŋnda nyala wɔɔŋndaŋ kɔɔ, mi la pɛŋgi sɔɔŋ wɔɔŋndoŋ tosaa.’”’
“‘Kɛ a yeŋ lani le, nduyɛ a tosa nyɛ ya dimul nda wo le.’ Chɛhowa dimi lende ni.
5 “‘Kuɛɛnɛ finyaa nyaa a finyaa nyaa mamaa cho yɛ suŋ suŋ? Baa wanaa ndaa suaa le Mɛlɛka wa cho wɔ pa yoomu?
6 Sawala nilaŋ, a nyɛ o nyɛ yaa dimul buɛiyaa niaa wanaa ndaa suaa le ya wa, mi finyaa nyaa vɛlɛ a finyaa nyaa mamaa cha laŋ o peelɔŋndo, lende le?’ Okoŋ ma miiŋgu ya o ibuŋ, ma dimi aa: ‘Mɛɛ naŋ wa sɔɔŋ tosaa yɛ, lende koni Chɛhowa, Mɛlɛka puaa chɔuwa wa naa biyɔɔ ni. Nduyɛ lende kinɛi ndoo dimi le tosaa ni.’”
7 Wɔsi Daaliɔɔ chiŋa wɔsilaŋ la tiɔɔŋ o masaleŋ choo wo, o paŋgii 11 ve niŋ, koŋ cho ni, paŋgii Siɛbati* ve malɔ 24, mi Chɛhowa suaa o wana suaa le ndu wo lo Sɛkalaya, po Bɛluakaya wo. Nduyɛ, Idɔɔ velu Bɛluakaya ni. Mbo dimi aa:
8 “Ichɔl pilɛ, mi cha yilaŋnde. Mi cha laŋunɔɔ kɔlaŋ o so siaŋaa choo. Okoŋ, mbo sim yi o yɔmii matɔɔ ve tɛɛŋ o kpoloŋndo niŋ. Nduyɛ suaa siaŋaa, a kɔɔle polee polee wa, a suaa humbuaa wa ndu kɔɔli.”
9 Okoŋ mi nyuna aa: “Masanɔ nuu, nɛɛ yaa cho yɛ haa?”
Mi maalikɛinɔ naŋ wa suukaŋndo wo muli aa: “I cho num chɔm wanaa suu nda cho wa.”
10 Mi laŋunɔ wa isisi yi o yɔmii matɔɔ ve tɛɛŋ ndo dimi aa: “Wanaa Chɛhowa vem le balɔɔ o lɛŋndeŋ choo wa cho haa ni.”
11 Ma dimul maalikɛinɔ Chɛhowa wo, o wa isisi o yɔmii matɔɔ ve tɛɛŋ ndo aa: “Ŋ balu o lɛŋndeŋ choo, nduyɛ lɛŋndeŋ kpou le cho doŋ doŋ, mi le wa o kɔl nyulu niŋ.”
12 Okoŋ, mi maalikɛinɔ Chɛhowa wo nyuna aa: “Oo Chɛhowa, Mɛlɛka puaa chɔuwa, vɛɛ kpɛ ŋ cho yɛ viouwɔɔ le ma tuiinuŋ Chulusalɛm a chieeŋ bɛnduŋ cho o Chuda niŋndoŋ inyiɛɛ? Kanifuule, le wɔsilaŋ niŋ 70 a cho a tumboo a chiooŋ muŋ.”
13 Mi Chɛhowa mulul maalikɛinɔ naŋ wa suukaŋndo wo nyɛkɛndɛi, nduyɛ mbo dimul ndu diomnda kɔl dɛɛniaalaŋ.
14 Okoŋ, mi maalikɛinɔ naŋ wa suukaŋndo wo dimul la aa: “Dimul waŋnda maa, ‘Nyɛ Chɛhowa, Mɛlɛka puaa chɔuwa dimi wo cho hoo ni: “I kɛɛsiaa a kɔl nuu kpou le mi suŋgu le Chulusalɛm a Saayɔŋ.
15 Lɛŋii cho o kɔl nyuloo niŋnde, I dɔɔnuŋ tumbe o kala kala a ndi. Kanifuule, mɛɛ ya dɔɔnuŋ tumbe nyɛɛmbɔ a wanaa niaa, mi lɛŋnde hei chɔɔlu nda nyɛpalaa tusi choo.”’
16 “Lelaŋ, nyɛ Chɛhowa dimi wo cho hoo ni: ‘“I cho miiŋgu Chulusalɛm mi tuiinuŋ ndu inyiɛɛ. Nduyɛ, loŋ ya cho chiɛi nuu miŋgi taŋgul ni. A cho vɛlɛ Chulusalɛm tuu a yooleŋ, ma miŋgi ndu taŋgul.” Chɛhowa, Mɛlɛka puaa chɔuwa dimi lende ni.’
17 “Dimul vɛlɛ waŋnda maa, ‘Nyɛ Chɛhowa, Mɛlɛka puaa chɔuwa dimi wo cho hoo ni: “Chieeŋ niŋ bɛndoŋ cho miiŋgu vɛlɛ piɔ cha a nyɛm kɛndɔŋ. Chɛhowa cho vɛlɛ Saayɔŋ kɔllo dɛɛniaa, nduyɛ mbo hɛli vɛlɛ Chulusalɛm maa chiee ndɔ.”’”
18 Okoŋ, mi tofa choo choo, mi cha leelaŋ la hiɔɔlu.
19 Mi nyuna maalikɛinɔ naŋ wa suukaŋndo wo aa: “Yɛɛnɛ leelaŋ ndaŋ la sim yɛ?” Mbo muli aa: “Leelaŋ ndaŋ la sim le kpaayala puusiaa Chuda, Isɔluɛi, a Chulusalɛm ndaŋ ni.”
20 Okoŋ, mi Chɛhowa chɔm ya wanaa chaa nyɔɔŋ toosiaa a laba wa a hiɔɔlu.
21 Mi nyuna aa: “Yɛɛnɛ waŋnda haa cho yɛ hunɔɔ tosa?”
Mbo muli aa: “Leelaŋ ndaŋ la puusiaa Chuda ni, nduyɛ wana o wana nɔla mbo simul laŋ te. Waŋnda haa cho hunɔɔ le nda siooŋnde lueiyo, nduyɛ ma tɛɛmbuu lɛŋii heelu leela ndalaŋ le waŋnda Chuda simullo, le halikpeŋ ma puusiaa nda wo.”
