Sɛkalaya 10:1-12
10 “La nyuna Chɛhowa le piɔɔ a teleŋ lewɔɔ wo.
Chɛhowa tosa ni mi piɔɔ bɛndoo hel.Ndu tusi piɔɔ le nda ni,Mbo tosa mi tɔlɔɔlaŋ la kom o chiɔɔŋ niŋ le wana o wana.
2 Piɔmaa layuŋguaa cho choolaŋ dimioo.Wanaa cho yawalaŋ viomɔɔ wa bɛɛ cho nya choolaŋ dimullo.
A cho suɛi a lɔma sɔlaama fonduaŋ okɔɔ.Ma kindiŋ le waŋnda kɔltaŋ dɛɛniaa, kɛ wana o wana sɔla kɔl dɛɛniaa le.
Le sabu koŋ nda cho wa heeloo a tuusoo ni, mɛɛ saa o luusiaŋ nuaa yɛ.
A cho saŋga, kanifuule a nɔ wana mandaa le.
3 I dɔɔnuŋ tumbe o kala kala a wanaa mandaa lasaa,Nduyɛ, simlachiaa* cho waŋnda nyɛkindilaa handɔɔ choo wa, I cho nda yamɛi kilul.Kanifuule Chɛhowa, Mɛlɛka puaa chɔuwa mulul saa nduaa hɔlla, waŋnda Chuda,Nduyɛ, o tosa ma simnuŋ maa so kpaaya bɛndu o kua o chɔuwo wo.
4 O ndu niŋ wana lebollo fula ni,O ndu niŋ wana cho masaa ikɛiyo fula ni,O ndu niŋ chiɔule chɔuwo le fula ni.O ndu niŋ wanaa chua chilaŋ nda fula ni, mɛɛ nda cho kpou.
5 A cho simnɔŋ maa puaa chɔuwa,A niɔu niɔu looli chal o nɛilaŋ ndo wa te a kuɛ pɛ o chɔuwo.
A cho lakɔ o chɔuwo, kanifuule Chɛhowa cho latulu a nda.Nduyɛ, a cho wanaa kua o suaa choo wa siɔmbulaŋ tusi.
6 I cho tosa mi waŋnda Chuda fula tɔɔ, mbo hiou wana o wana,Nduyɛ mi baŋa yuŋgu Choosɛ wo.
I cho nda miŋgi o lɛŋnde ndaleŋ niŋ,Kanifuule I cho nda nyiɛɛye tuiinɔŋ.A cho wa maa le pilɛ bɛɛ I kɛɛ wɔ nda le,Kanifuule, ya cho Chɛhowa Mɛlɛka ndaa ni, nduyɛ I cho piɛile ndaleŋ muli.
7 Waŋnda Ifiluem cho simnɔŋ maa kuubanɔ kpaaya bɛndoo.A cho wa a kɔl kɛndɛ mɛɛ waŋndo chii nuaa muɛiyaŋ kolɔɔ sɛnɛi yɛ.
Chuauwaa ndaa cha niŋ hei, nduyɛ ma dɔɔnuŋ nyaale.A cho wa a kɔl kɛndɛ tau le nyɛ Chɛhowa tosal nda wo.
8 ‘I cho huiye hɔŋ le nda, mi chuuŋgiaa nda naapilɛ.I cho nda piŋi, mi tosa ma kui tau,Nduyɛ ma hiou lachi a kuiyo.
9 Mi che bɛɛ I sɛŋi nda waŋnda tɛɛŋ maa ŋkulu,Kɛ a cho lo o fondaŋnda leviltaŋ ma loonuŋ a ya.A cho vɛlɛ yoomuaŋ sɔla nda chuauwaa ndaa, okoŋ ma miiŋgu.
10 I cho nda soli o lɛŋnde Ichipi leŋ niŋ mi hiŋ a nda,Nduyɛ mi chuuŋgiaa haa Asiiliaa.I cho hunɔɔ a nda o lɛŋnde Kiliaadi leŋ niŋ, a o lɛŋnde Lebanɔŋ ndeŋ niŋ,Nduyɛ fondaŋ bɔɔ ve niŋ le nda le.
11 Te pee mɛŋma ihɛllo kɛɛlu nda pɛ taŋɔɔ,I cho keeku o ndu niŋ mi lɔɔ maŋ, okoŋ mi ma pɛŋgi hiilɔŋndo yokpaŋ yokpaŋ.Te Pioo Nail heu nda pɛ nɛiyo, I cho mɛŋma nduaŋ kpou veeliaa.
I cho Asiiliaa siɔmbulaŋ tusi le kaa ndɔ heelaŋndo,Nduyɛ, kpaaya lemasa* Ichipi nɔ wo cho ndu hiɔlɔŋ.
12 Ya Chɛhowa, I cho tosa ma fula tɔɔ mbo hiou wana o wana.Nduyɛ, a cho wa sɔɔŋ tosaa o nɛi ke diola nilaŋ bɛɛleŋ ndo choo.’ Ya Chɛhowa dimi lende ni.”
