Sɛkalaya 11:1-17
11 “Num Lebanɔŋ, kumbi diola numndaŋ,Le mi yiŋndeŋ le huŋ lom yɔmii num ii sida ve.
2 Num yɔm chunipa wo, koŋul a chaŋndo le mɛɛ yɔmii sida ve koombiaa yɛ.Yɔmii tɔɔmɛi bɛnduei chuu tambu!
Yɔmii ɔku ve o Baasiaŋ niŋ, la koŋul a chaŋndo.Kanifuule, bundɛ bɛndu bɛndoo piɔl!
3 La yaŋ nilaŋ! Wanaa mandaa lasaa cho koŋullo a chaŋndo,Kanifuule tɔɔ ndaa nyum pɔli.
La yaŋ nilaŋ! Kpɔkuŋaa* fɔŋnduaa cho pɛɛliaa,Kanifuule, bundɛ bɛndu bɛndu holnuŋ Chɔɔdaŋ ndo piɔl.
4 “Nyɛ Chɛhowa Mɛlɛka nuu dimi wo cho hoo ni, ‘La manda saa nɔ le piɔmndo sɔlaa wa.
5 Okoŋ, wanaa cho nda piondɔɔ wa dii nda bɛɛ, tɔɔyaŋ ve nda choo le. Nduyɛ, mi wanaa cho nda pisioo wa bɛɛ dimi aa, “Maa Chɛhowa sɔla saŋgalaa, kanifuule I cho simnɔŋ wana sulaa.” Wanaa cho saa haa mandaa wa nɔ inyiɛɛ le nda le.’
6 “‘I cho lɛ wanaa cho o lɛŋndeŋ ndeŋ niŋnda tuiinɔŋ inyiɛɛ le.’ Ya Chɛhowa dimi lende ni. ‘Lelaŋ, I cho tosa mi wana o wana tusi wana nda chiɛɛliaŋndo nyɛpalaa choo, nduyɛ mi masa ndaa bɛɛ tusi nda nyɛpalaa choo. A cho lɛŋndeŋ tɛɛmbuu, nduyɛ I cho nda piŋi wanaa kaŋ o ba le.’”
7 Okoŋ, mi kandu saa nɔ le piɔmndo sɔlaa wa mandaa le nya, saa cho o nyɛkindilaa bɛŋgu wa. Mi chua tindalaŋ la tiɔɔŋ. Mi ke o pilɛ diolaŋ aa Kɛndɛi, o pilɔɔ aa Diompilɔɔ. Okoŋ, mi kandu saa mandaa.
8 O paŋgei i pilɛ bɛŋgu, mi tuau wanaa mandaa lasaa a yaa, kanifuule I nɔla mi biunuŋ nda le. Nduyɛ, ya bɛɛ ndaa chi ya nyɛ o nyɛ le.
9 Mi dimi aa: “I cho lɛ hiouwɔɔ lachi a nya mandaa le. O nɔ le wuoo wo o wu, mi o nɔ le tambei sɔlaa wo o sɔla tambei. A cho lo yoomu wa, a diaŋnaŋ vellaa velle.”
10 Okoŋ, mi chua tinda ya ke diolaŋ aa Kɛndɛi yo, mi yam ndu. Mi yam kpema ya yii a waŋnda kpou wo.
11 Mi kpema koŋ yom o paale leŋ choo. Nduyɛ, mi saa wa o nyɛkindilaa bɛŋgu ma wa ya tofaa wa sina maa, diom Chɛhowa wo wa koŋ ni.
12 Okoŋ, mi dimul nda aa: “Te o bɛnda pɛ a nya, la ke ya paawa* nuu. Kɛ te o bɛnda le, la chalnuŋ a ndu.” Ma ke ya paawa nuu kaniŋ humboŋ 30.
13 Okoŋ, mi Chɛhowa dimul la aa: “Kɔ wou muŋ o kɔfu duauwaa ŋkanioo* niŋ. A kanii taaniŋnde hei nda paawa ya ni.” Mi chua kaniŋ humbuŋ 30 woŋ muŋ, mi kɔ wou muŋ o kɔfu duauwaa ŋkani cho o chiɛi Chɛhowa wo niŋ ndo.
14 Okoŋ kɔɔli, mi yam tinda ya ke diolaŋ aa Diompilɔɔ wo. Mi wanayɛi wa Chuda nda Isɔluɛi tɛɛŋ nde i tambu.
15 Mi Chɛhowa dimul la aa: “Chua nyɛm waliŋ wana mandaa lasaa biinuŋ hoo bila le wo.
16 I cho tosa mi wana cheleŋ simnuŋ wana mandaa lasaa o lɛŋndeŋ niŋ. Saa nɔ le tambei sɔlaa wa, o cho nda manda le. Nduyɛ saa fɔŋnduaa luusiaŋ nda, o cho nda nuuviaa le, kɛlɛŋgaa mbo chiɔu a yɔŋuluŋ nda. A nɔla bɛɛ simndaŋ nda, o cho nda nyɛdiaa ke le. Kɛ mbo dii a chelulɛiya mbo de, nduyɛ mbo tɛɛndiaa buukula ndalaŋ.
17 Kpundɔɔ cho le wana ni mandaa lasaa fondo kɛɛ le saa mandaa wo!
A cho ndu choŋgoo a hɔlte ba kɛndɛleŋ lɔwa a muɛi faŋnde.
Choŋgoo cho ndu vesa sɛɛŋ,Nduyɛ mi hɔlte ndɔle ba kɛndɛleŋ le suma.”*
