Sɛkalaya 12:1-14
12 Yooŋgoo:
“Nyɛ Chɛhowa dimi a Isɔluɛi okɔɔ wo cho hoo ni.” Chɛhowa dimi lende ni.Wana toosiaa choo choo wo,Wana kila chiyii chieeŋndo hoo wo,Nduyɛ, mbo wou wanachioo hueiyii yoomɛi o miliŋ ndo.
2 I cho tosa mi Chulusalɛm simnuŋ taala* tosa mi wanaa balu ndu wa kpou kuɛ taŋgeŋ taŋgeŋ ndo. A cho hunɔɔ Chuda vɛlɛ a Chulusalɛm dɔwɔɔ o piŋndo niŋ.
3 O paale leŋ choo, I cho tosa mi Chulusalɛm simnuŋ pou lusulɛi bɛndoo le waŋnda kpou. Wanaa cho kindiŋ le ndu chuaa wa kpou cho yɔŋulɔŋ tau. Nduyɛ, lɛŋnde kpou o chieeŋndo choo cho chuuŋgiaŋ naapilɛ le ma chiŋalaŋ ndu a sɔŋgɔɔ.”
4 Chɛhowa dimi aa, “O paale leŋ choo, I cho tosa mi siooŋnde bii suaa ndaa, nduyɛ mi seemiaa wanaa cho kɔlaŋ a nda wa. I cho waŋnda Chuda hɔlte nileŋ kɛsi choo, kɛ mi suumiaa suaa kɛ kɛ yaamɔɔwaa ndaa nɔ.
5 Masaa* cho Chuda wa cho wa dimioo o kɔlta ndalaŋ niŋ aa, ‘Wanaa cho Chulusalɛm nda tosa ni miŋ sɔla kpaayaa sanaa a Mɛlɛka ndaa Chɛhowa, Mɛlɛka puaa chɔuwa.’
6 O paale leŋ choo, I cho tosa mi masaa Chuda a simnuŋ mɛɛ kpɛɛnɛi wa nuaa i piaa cha a yiŋndeŋ leniŋ o yɔmnde tɛɛŋ yɛ. Nduyɛ, mi tosa nda ma simnuŋ mɛɛ kili leyiŋndo wa nuaa o kuluŋ nda kou sɛnɛiyoŋ niŋ yɛ. Wanaa balu nda wa kpou, haa o ba kɛndɔɔ a o ba miallo choo, a cho nda tɛɛmbuu. Waŋnda Chulusalɛm cho vɛlɛ miiŋgu ma chal o fondaŋ nda kpeekpeiyo, ndu cho yɛ Chulusalɛm ni.
7 “Waŋnda Chuda, tɛndiila ndalaŋ fɛlɛŋ Chɛhowa cho piŋi, le halikpeŋ bɛɛle yuŋgu Deeve wo, a bɛɛle waŋnda Chulusalɛm nɔ leŋ, le hiu bɛɛle waŋnda Chuda nɔ leŋ te.
8 O paale leŋ choo, Chɛhowa cho waŋnda Chulusalɛm manda. Wana boŋ mbo del nda tɛɛŋ ndo cho wa maa Deeve o paale leŋ choo. Nduyɛ, mi chiɛi Deeve wo wa maa Mɛlɛka. O cho wa maa maalikɛinɔ Chɛhowa wo, o cho kɔlaŋ nda lachi wo.
9 O paale leŋ choo, I cho lɛŋii cho hunɔɔ Chulusalɛm chiŋalaŋ a sɔŋgɔɔ ve kpou tɛɛmbuu.
10 “I cho chiɛi Deeve wo a waŋnda Chulusalɛm nyina nuu tusi choo. I cho hini kɔl a nda, nduyɛ ma wa ya nyɔɔloo o piɛileŋ niŋ. Waŋnda heelu niŋ hɔlla ma nua wana nda chuku wo, nduyɛ ma wa ndu chaŋndo choo mɛɛ nda wa nuaa chaŋndo le pole pilɛle vi leŋ yɛ. A cho ndu wa koŋullo choo a chaŋndo, mɛɛ nda wa nuaa po tase vi wo chaŋndo choo yɛ.
11 O paale leŋ choo, chaŋnda wa niŋ Chulusalɛm ndaŋ la wa niŋ bɔɔ. La wa niŋ ko mɛɛ la yɔŋnuŋ Hadadiluimɔŋ, o Lɛŋnde Dɛŋgbɛleŋ Mɛkidɔɔ yɛ.
12 Lɛŋndeŋ kpou le cho wa chaŋndo. Yuŋgu o yuŋgu cho wa chaŋndo a ba ndɔ. Yuŋgu Deeve wo cho wa chaŋndo a ba ndɔ, nduyɛ laandaa ndaa cho wa chaŋndo a ba nda. Nyɛ pilɛ koŋ kpe cho yɔŋnɔŋ a yuŋgu Netaŋ ndo,
13 yuŋgu Livai yo, yuŋgu Simɛi wo,
14 vɛlɛ a yuŋgula tɔlaŋ kpou ni. Yuŋgu kɛ kɛ cho wa chaŋndo a ba ndɔ, nduyɛ mi laandaa ndaa wa chaŋndo a ba nda.
