Sɛkalaya 13:1-9
13 “O paale leŋ choo, sooŋ mamɛŋndo cho kumbiŋ le chiɛi Deeve wo vɛlɛ a waŋnda Chulusalɛm, le hakila ndalaŋ a kaala ndala nɔɔlɛilaŋ tɔɔ.
2 Chɛhowa, Mɛlɛka puaa chɔuwa dimi aa, “O paale leŋ choo, I cho piɔmaa cho o lɛŋnde niŋ nda wɔɔsuu, nduyɛ fɛɛŋ bɛɛ wana loonuŋ lɛ niŋ a nda le. I cho wanaa suaa le ya wa a yiyaŋnda nɔɔlɛila cho o lɛŋndeŋ niŋndaŋ faŋa bau.
3 Kɛ te waŋndo dimi niŋ pɛ yooŋgoo a ya okɔɔ, wana koŋ finya ndɔ a kala ndɔ cho ndu dimul aa, ‘A nɔ le piɔmndo sɔlaa kanifuule, a dimi choolaŋ o diola Chɛhowa laŋ niŋ.’ Okoŋ, mi finya ndɔ a kala ndɔ chuku ndu le mɛɛ o cho choolaŋ dimioo a Mɛlɛka okɔɔ yɛ.
4 “O paale leŋ choo, siɔmbulaŋ la cho wana o wana suaa le ya biyɔɔ, le yilaŋii o cho wa tɛɛsiaa ve. Nduyɛ, a wounuŋ lɛ niŋ doma lemasa nda toosiaa a yiiŋnde le keiyo waŋnda huiyo wo le.
5 O cho dimi aa, ‘I cho wana suaa le Mɛlɛka le. Wana wali ichiɔɔ ya cho ni, kanifuule I wa o pɔmbɔ mi waŋndo piandu ya le mi wa chiɔɔ le ndu.’
6 Te waŋndo nyuna ndu pɛ aa, ‘Pauvii yɛɛ cho yɛ num hei lekɔɔ?’* o cho muli aa, ‘O chaaŋaa niaa lo bɛɛ ya sɔla pauve hei ni.’”
7 “Muɛi faŋnde, chɔŋ ma chiŋalaŋ wana ni mandaa lasaa,Nduyɛ ma chiŋalaŋ wana cho chaaŋ nuu wo.” Chɛhowa, Mɛlɛka puaa chɔuwa dimi lende ni.
“Dii wana mandaa lasaa, okoŋ mi saa kpou saŋnuŋ.Nduyɛ, I cho wanaa waŋnda che chɔdɔ wa chiŋalaŋ.”
8 Mi Chɛhowa dimi aa, “O lɛŋndeŋ niŋ kpou,Te a piɔu pɛ waŋnda chieeya kundalaŋ sala yaa, kundalaŋ la tiɔɔŋ la cho wu,Nduyɛ mi kundaa o pilɛ lo yoomu.
9 I cho kunda yaa ndɔ lo yoomu wo kei o yiŋndeŋ niŋ,Nduyɛ, mi dindi nda mɛɛ nda dindi nuaa kanii humbuei yɛ.I cho nda tofa, mɛɛ nda tofa nuaa kooliiye yɛ.
A cho ya wa veeloo le malaa,Nduyɛ mi muli nda diom.
I cho dimi aa, ‘Wanaa niaa nda cho ni,’
Mi nda bɛɛ dimi aa, ‘Chɛhowa cho Mɛlɛka naa ni.’”
Tɛɛsiaalaŋ
^ Hibuluiye, “o balaŋ tɛɛŋ?” Koŋ cho ni, o takpa ɔɔ o kɔɔ.
