Sɛkalaya 2:1-13
2 Mɛɛ ya tofa choo choo, mi cha poo a yoole tuwaaleŋ o ba.
2 Okoŋ mi nyuna ndu aa: “Kuɛɛnɛ ŋ cho yɛ kɔlaŋ?”
Mbo muli aa: “Chulusalɛm ya cho kɔlaŋ tuuwo ni, le mi sina toŋgii nduɛi a bandii nduɛi.”
3 Mi maalikɛinɔ naŋ wa suukaŋndo wo kuaŋnuŋ, okoŋ mi maalikɛinɔ cheleŋ komal ndu.
4 Mbo dimul ndu aa: “Nyaanuŋ o po feleŋgɔnɔ koŋ ndo ma dimul ndu aa, ‘“Chulusalɛm cho miiŋgu mbo pɛ cha a waŋnda chieeya vɛlɛ a chɔluaa, mɛɛ chieeŋ pɔmbɔŋ wa nuaa ŋ nɔ kpaki le yɛ.”
5 Mi Chɛhowa dimi aa: “I cho simnɔŋ kpakioo a yiŋndeŋ le balaa silɔ le Chulusalɛm, nduyɛ mi tɔɔ nuu tiu silɔ o ndu niŋ.”’”
6 “La huŋ! La huŋ! La faŋaŋ o lɛŋndeŋ ba luaŋ ndo.” Chɛhowa dimi lende ni.
“Kanifuule, I tosa mi la saŋnuŋ o kpeŋguŋ hiɔɔloŋ o chieeŋndo choo.” Chɛhowa dimi lende ni.
7 “La huŋ, nya waŋnda Saayɔŋ! Nya cho haa o Babilɔŋ niŋ nda, la faŋaŋ loŋ mi la nyaanuŋ.
8 Mɛɛ Chɛhowa, Mɛlɛka puaa chɔuwa chii tɔɔ sɔla, mbo viam ya o lɛŋii wa nya nyɛpalaa tusioo choo ve lo. Mbo dimi aa: ‘Wana o wana pilaŋ nya pɛ, mɛɛ hɔlte nile kululeŋ o pilaŋ ni.
9 I cho nda ba nuu heelul, nduyɛ mi wanaa wa nda o ba o chɛleŋ niŋnda chua nyɛm kɛŋ ndaŋ.’ Nduyɛ la cho sina kɛsɛ maa Chɛhowa, Mɛlɛka puaa chɔuwa vem ya ni.
10 “Nya waŋnda Saayɔŋ, la deŋi a nyaaloo, kanifuule I cho hunɔɔ nduyɛ mi wa latulu a nya.” Chɛhowa dimi lende ni.
11 “O paale leŋ choo, lɛŋii bɔɔbɔɔ cho wa le ya, nduyɛ ma wa wanaa niaa. Ya Chɛhowa, I cho wa latulu a nya.” Nduyɛ la cho sina maa Chɛhowa, Mɛlɛka puaa chɔuwa vem ya ni.
12 Chɛhowa cho Chuda siiŋguu maa nyɛm kɛŋ ndɔ o lɛŋnde diandaa leŋ choo, nduyɛ mbo hɛli vɛlɛ Chulusalɛm maa chiee ndɔ.
13 Nya waŋnda chieeya kpou, la mei doŋ Chɛhowa lachi, kanifuule o cho o fondaŋ ndɔ diandaa mbo wa nyɛ o dimi wo tosaa.
