Sɛkalaya 3:1-10
3 Okoŋ, mbo chɔm ya Chɔɔsuaa, wana bɛndu wanaa soliaa lasalaa. O wa isisi maalikɛinɔ Chɛhowa wo lachi, nduyɛ Setana wa isisi o ba ndɔ kɛndɔɔ choo le ndu simullo.
2 Mi maalikɛinɔ Chɛhowa wo dimul Setana aa: “Num Setana, maa Chɛhowa kpaa num fɔ! Maa Chɛhowa, o hɛli Chulusalɛm ndo kpaa num fɔ! Baa o cho Chɔɔsuaa le cho kili leyiŋ nda soli o yiŋ po wo le?”
3 Chɔɔsuaa wa o doviaŋ o nyɛla nɔɔlɛilaŋ niŋ, mbo wa isisi maalikɛinɔɔ lachi.
4 Mi maalikɛinɔɔ dimul wanaa wa ndu isisi lachi wa aa, “La soli ndu nyɛla nɔɔlɛilaŋ lekɔɔ.” Okoŋ mbo dimul Chɔɔsuaa aa, “Tofawɔ, I tosa mi hakila numndaŋ la faŋaŋ num choo. Nduyɛ a cho num nyɛla kɛndɛ kɛndɛlaŋ wou.”
5 Okoŋ mi dimi aa: “La wou ndu mɔsil* diandaa wana soliaa lasalaa o lebol.” Ma wou ndu mɔsil koŋ, nduyɛ ma wou ndu nyɛlaŋ. Maalikɛinɔ Chɛhowa wo wa isisi nda ikɛi.
6 Okoŋ, mi maalikɛinɔ Chɛhowa wo dimul Chɔɔsuaa aa:
7 “Nyɛ Chɛhowa, Mɛlɛka puaa chɔuwa dimi wo cho hoo ni, ‘Te a tol pɛ sawala nilaŋ kɔɔli, nduyɛ ma tosa nyɛ o nyɛ ya dimul num le tosaa, a cho simnɔŋ wana kialaa ŋyamaa o chiɛi nuu niŋ, nduyɛ ma wa bɛɛ balu chiɛi nuu wo hɔlteŋ. Wanaa cho haa isisi nanuŋ nda, I cho tosa mi num bɛɛ wa nda tɛɛŋ.’
8 “‘Num Wana Bɛndu Wanaa Soliaa Lasalaa Chɔɔsuaa, a chaaŋaa num aa cho num haa ichali lachi wa, a yandii, la yaŋ ya nilaŋ! La sim lewundu le nyɛ cho hunɔɔ yɔŋnɔŋ o chilaŋ niŋndo. I cho hunɔɔ a buɛi ni nɔ diolaŋ aa Wulɔɔ* wo.
9 La tofawɔ pou ya kɛsi Chɔɔsuaa lachi wo! Hɔltaŋ la ŋɔmmɛu la cho o pouwo hoo choo ni. I cho poonyiaa pum handɔɔ o pou koŋ choo, nduyɛ mi faŋa haki cho lɛŋnde leŋ choo wo o paaleŋ lepilɛ niŋ kpe.’ Chɛhowa, Mɛlɛka puaa chɔuwa dimi lende ni.
10 Chɛhowa, Mɛlɛka puaa chɔuwa dimi aa, “‘O paale leŋ choo, wana o wana cho wana nda chiɛɛliaŋndo veelu le mbo hiŋ o yɔm ndɔ makilepiiyo bɛŋgu, a o yɔm ndɔ mafikiiyo bɛŋgu.’”
Tɛɛsiaalaŋ
^ Kolaa ndaa pinda pinda ni, okoŋ ma wou wana soliaa lasalaa.
^ Mɛɛ kulle piɔl nuaa sɛnɛi mii kandu wulɔɔ yɛ.