Sɛkalaya 4:1-14
4 Mi maalikɛinɔ naŋ wa suukaŋndo wo miiŋgu naa ya chua, mbo tindi ya mɛɛ wana tindi nuaa waŋndo o luaŋ yɛ.
2 Mbo nyuna ya aa: “Yɛɛnɛ ŋ cho yɛ chɔɔ?”
Mi muli aa: “I cho chɔɔ nyɛ kɛsiaa lambui nda toosiaa a kooliiye wo, a hɛŋgɛiyo o kɛsiaa lechoo. Lambuilaŋ la ŋɔmmɛu la cho lechoo ni. A tonya, la ŋɔmmɛu. Nduyɛ lambuila cho o bolleŋ ndaŋ, la nɔ chiliŋuŋ latɛɛŋgoŋ ŋ ŋɔmmɛu.
3 Nduyɛ, yɔmii ɔlifiive i ŋiiŋ cho o nyɛ kɛsiaa lambuiyo ikɛi. O pilɛ cho o ba kɛndɔɔ choo kpeŋgii hɛŋgɛiyo cho ve, mi hoo wa o ba miallo choo.”
4 Okoŋ, mi nyuna maalikɛinɔ naŋ wa suukaŋndo wo aa: “Masanɔ nuu, yɛɛnɛ nyɔɔŋ muŋ sim yɛ?”
5 Mi maalikɛinɔ naŋ wa suukaŋndo wo nyuna ya aa: “Baa a sina nyɛ nyɔɔŋ muŋ sim ndo le?”
Mi muli aa: “I sina le masanɔ nuu.”
6 Okoŋ mbo dimul la aa: “Nyɛ Chɛhowa dimul Sɛlubabɛl lo cho hoo ni: ‘“O cho a kpaaya puaa chɔuwa, ɔɔ a kpaaya wana chiee kɛ kɛ le ya cho ndi tosa le, kɛ a nyina nuu.” Chɛhowa, Mɛlɛka puaa chɔuwa dimi lende ni.
7 O yɔŋ bɛɛ aa pembii bɛndu bɛnduei cho Sɛlubabɛl lachi ni, i cho simnɔŋ dɛŋgbɔɔ. Boondii o cho pou mɛɛlaa handɔɔ ve, waŋnda kpou cho deŋi aa: “Nuawɔ se suɛi kɛndɛ bɛndu! Nuawɔ se suɛi kɛndɛ bɛndu!”’”
8 Mi Chɛhowa dimul la vɛlɛ aa:
9 “Sɛlubabɛl kila chiyii chiɛiyo hoo ni. Nduyɛ, ndu cho ndu siou taŋgul ni. Okoŋ la cho sina maa Chɛhowa, Mɛlɛka puaa chɔuwa vem ya naa nya chua ni.
10 Nɛɛnɛ pɛɛsa yɛ teleŋ sɔɔŋ kanduŋ o pɔmpɔmbɔ wo? Nda kpou cho dɔɔnɔŋ nyaale te a che pɛ Sɛlubabɛl a yoole tuwaaleŋ o ba. Lambuila* ŋɔmmɛulaŋ ndaŋ la sim le hɔlta Chɛhowa laŋ, la cho lɛŋndeŋ kpou mɛɛndaŋndo laŋ.”
11 Okoŋ mi nyuna ndu aa: “Yɔmii ɔlifiive i ŋiiŋ cho o nyɛ kɛsiaa lambuiyo ikɛi. Hoo cho o ba kɛndɔɔ choo, mi o pilɔɔ wa o ba miallo choo. Yɛɛnɛ yɔmnde hei sim yɛ?”
12 Mi nyuna ndu vɛlɛ aa: “Yɔmii ɔlifiive hei nɔ kpɔŋjɔlaŋ la tiɔɔŋ, nduyɛ mi la wa chuɛima ŋkooliiyaŋ yɔŋgoo, mi ma keeku o chiliŋuŋ latɛɛŋguŋ kooliiyoŋ niŋ ŋ muuŋ. Yɛɛnɛ kpɔŋjɔlaŋ ndaŋ la sim yɛ?”
13 Okoŋ mbo nyuna ya aa: “Baa a sina nyɛ nyɔɔŋ muŋ sim ndo le?”
Mi muli aa: “I sina le masanɔ nuu.”
14 Mbo dimi aa: “Nyɔɔŋ muŋ sim le wanaa pɔyaŋnda a ŋiɔɔŋ, a cho isisi Masanɔɔ le lɛŋndeŋ kpou ikɛi ya.”
Tɛɛsiaalaŋ
^ Ɔɔ naapum, Hɔlta.
