Sɛkalaya 5:1-11
5 Mɛɛ ya tofa vɛlɛ choo choo, mi cha yau simbulaa kɔlaŋ o hueiye niŋ.
2 Mi maalikɛinɔɔ nyuna ya aa: “Yɛɛnɛ ŋ cho yɛ chɔɔ?”
Mi muli aa: “I cho chɔɔ yau simbulaa kɔlaŋ o hueiye niŋ. Bandii nduɛi cho nɛiyo 30, nduyɛ toŋgii nduɛi cho nɛiyo 15.”*
3 Okoŋ mbo dimul la aa: “Sendi cho kɔlaŋ le lɛŋndeŋ kpou wo cho hoo ni. Kanifuule, wanaa cho viileŋ tosaa wa kinɛi, a mɛɛ i cho i poonyiaa o yauwo hoo choo kumbuei i pilɛ yɛ, a cho nda nyɛpalaa tusi choo le. Nduyɛ, wanaa cho buŋgaŋ lachoowaŋ chuaa wa kinɛi, a mɛɛ i cho i poonyiaa o yauwo hoo choo kumbuei i pilɛi yɛ, a cho nda nyɛpalaa tusi choo le.
4 Chɛhowa, Mɛlɛka puaa chɔuwa dimi aa, ‘Ya yɔŋ sendi koŋ ni. Nduyɛ, o cho lakɔ luɛiyɔɔ o chiɛi wana tosa viileŋ ndo niŋ, a o chiɛi wana chua buŋgaŋ lachoowaŋ o diola nilaŋ niŋndo niŋ. Sendi koŋ cho lo o chiɛi koŋ niŋ haaa mbo tɛɛmbuu ndu a pɛŋgɔŋ ndɔŋ, vɛlɛ a pouta ndɔlaŋ kpou.’”
5 Okoŋ, mi maalikɛinɔ naŋ wa suukaŋndo wo sɔɔŋguu ya ikɛi, mbo dimi aa: “Yandii, tofawɔ ma che nyɛ cho fulaa wo.”
6 Mi nyuna ndu aa: “Yɛɛnɛ cho yɛ koŋ?”
Mbo muli aa: “Nyɛi laandii ɛfaa ve* cho fula koŋ ni.” Mbo hiau lachi a dimioo aa: “Nuaa nda cho o lɛŋndeŋ choo kpou ni.”
7 Mi cha ma faŋa kumbu tiu tiu nda toosiaa a liiye wo o nyɛi laandii keŋ choo, nduyɛ wana lanɔɔ wa ichali leniŋ.
8 Mi maalikɛinɔɔ dimi aa: “Hoo cho Dɛnɛ Wɔɔŋndo ni.” Okoŋ, mbo miŋgi ndu nyindɔɔ o nyɛi laandii ɛfaa keŋ niŋ, mbo kumbu ndu a kumbu lusulɛi nda toosiaa a liiye wo.
9 Mɛɛ ya tofa choo choo, mi cha waŋ laanduaa a ŋiɔɔŋ hunɔɔ fɛɛ o hueiye niŋ. Ndaa nɔ kumbaŋndaŋ maa kumbaŋnda you sitɔkiiyo. Nduyɛ ma chua nyɛi laandei hei kau, ma helnuŋ a ndi.*
10 Mi nyuna maalikɛinɔ naŋ wa suukaŋndo wo aa: “Kuɛɛnɛ nda cho yɛ kɔlaŋ a nyɛi laandii ɛfaa ve hei?”
11 Mbo muli aa: “O lɛŋnde Sianaa leŋ niŋ,* le ma teŋgul ndu chiɛiyo. Nduyɛ te a chii ndu pɛ taŋgul, a cho ndu luei leniŋ kanifuule, loŋ kpeekpei o nɔ le waa ni.”
Tɛɛsiaalaŋ
^ Hibuluiye, “bandei kibitiilaŋ 20, nduyɛ toŋgei kibitiilaŋ 10.” Tofa Tɛɛsiaa.
^ Hibuluiye, “ɛfaa,” nanuŋ o sim le nyɛi laandei ɔɔ kambɛi nda tuu ɛfaa wo. Tofa Tɛɛsiaa B14.
^ Hibuluiye, “lɛŋndeŋ a choo choo tɛɛŋ.”
^ Koŋ cho ni, tanda Babilɔŋ ndo.