Sɛkalaya 6:1-15
6 Mɛɛ ya tofa vɛlɛ choo choo, mi cha nyɛm nyaanaŋ suaa naŋndoŋ ŋ hiɔɔlu fulaa o pembuŋ bɛndoŋ ŋ muuŋ tɛɛŋ. Nduyɛ chiliŋii kapaa pemboŋ muŋ wa ni.
2 Nyɛ nyaanaŋ tase suaa naŋ ndo ndoo nɔ suaa siaŋaa, nduyɛ o diiŋ ndɔɔ ndoo nɔ suaa tiŋiaa.
3 O yaa ndɔɔ ndoo nɔ suaa humbuaa, nduyɛ o hiɔɔlu ndɔɔ ndoo nɔ suaa kɔɔle yɛ yiaa.
4 Mi nyuna maalikɛinɔ naŋ wa suukaŋndo wo aa: “Yɛɛnɛ nyɛm nyaanaŋndoŋ muŋ sim yɛ masanɔ nuu?”
5 Mi maalikɛinɔɔ mulul la aa: “Ŋ sim le nyinaa hiɔɔluaa cho o choo choo niŋnda. A cho chɔnɔŋndo naa nda wa Masaa le lɛŋndeŋ kpou lachi wa.
6 O* nɔ suaa tiŋiaa wo cho kɔlaŋ o lɛŋndeŋ ba luaŋ ndo. O nɔ suaa humbuaa wo cho kɔlaŋ o lɛŋndeŋ ba paaleŋ le del lo.* Nduyɛ, o nɔ suaa kɔɔle yɛ yiaa wo cho kɔlaŋ o lɛŋndeŋ ba tou wo.
7 Suaa kɔɔle yɛ yiaa ndaa nɔ yeemɛi tau le fulaa ma kɔ balu o lɛŋndeŋ choo kpou.” Okoŋ mbo dimi aa: “La kɔ, mi la balu o lɛŋndeŋ choo kpou.” Nduyɛ ma kandu balɔɔ o lɛŋndeŋ choo.
8 Okoŋ mbo veelu ya, mbo dimul la aa: “Tofawɔ, suaa cho kɔlaŋ o lɛŋndeŋ ba luaŋ ndo wa tosa mi kɔl tuu Chɛhowa dɔɔnuŋ a lɛŋnde leŋ ndo pɔlul, le mɛɛ nda kuɛ loŋ yɛ.”
9 Mi Chɛhowa suaa vɛlɛ o ya lo, mbo dimul la aa:
10 “Nyɛm wanaa cho o biyɔɔ niŋnda ke Hɛlidai, Tobicha a Chɛdaya woŋ, bii nda muŋ o ba. Nduyɛ o paale pilɛ le leŋ choo, la kɔ nya wanaa fula kaŋ Babilɔŋ nda o chiɛi Choosaya wo, po Sɛfanaya wo.
11 Chua kaniŋ humboŋ a kooliiyoŋ ma toosiaa mɔsil lemasaa, okoŋ ma wou Chɔɔsuaa po Chɛhosadaki wo, wana bɛndu wanaa soliaa lasalaa.
12 Dimul ndu aa,“‘Nyɛ Chɛhowa, Mɛlɛka puaa chɔuwa dimi wo cho hoo ni: “Poo hoo nɔ diolaŋ ni aa Wulɔɔ. O cho wulɔɔ o fondaŋ ndɔɔ, nduyɛ mbo taŋgul chiɛi Chɛhowa wo.
13 Ndu cho chiɛi Chɛhowa wo taŋgul ni. O cho bɛɛle masaa nɔ le sɔlaa leŋ sɔla. O cho hunɔɔ ichali o kpeŋgbei* ndɔ lemasaa choo, nduyɛ mbo wa masaa. O cho vɛlɛ wa wana soliaa lasalaa o kpeŋgbei ndɔ lemasaa choo, nduyɛ diompilɔɔ cho wa foofola tiɔɔŋndaŋ ndaŋ* tɛɛŋ.
14 Mɔsil lemasaa hoo cho wa o kɛsiaa o chiɛi Chɛhowa wo niŋ, le loonɔŋndo a Hilami, Tobicha, Chɛdaya, a Hɛŋ po Sɛfanaya wo.
15 Wanaa cho o fondaŋnda leviltaŋ nda cho hunɔɔ, ma sɔɔŋguu le chiɛi Chɛhowa wo taŋgullo.” Okoŋ, la cho sina kɛsɛ maa Chɛhowa, Mɛlɛka puaa chɔuwa vem ya naa nya chua ni. Te la hiou pɛ lachi a Chɛhowa Mɛlɛka nyaa nilaŋ yaŋɔɔ, sɔɔŋ muŋ kpou cho yɔŋnɔŋ.’”
Tɛɛsiaalaŋ
^ Koŋ cho ni, nyɛ nyaanaŋ suaa naŋ ndo o.
^ Ɔɔ “o pee mɛŋma ihɛllo kɔɔli.”
^ Ɔɔ “kpɛŋɛ.”
^ Koŋ cho ni, foofo lemasaa a foofo wana soliaa lasalaa.
