Sɛkalaya 7:1-14
7 Wɔsi Masaa Daaliɔɔ chiŋa wɔsilaŋ la hiɔɔlu o masaleŋ choo wo, paale hiɔɔlu leŋ o paŋgii ŋɔmahiɔɔluei niŋ, koŋ cho ni, paŋgii Kisili ve,* mi Chɛhowa suaa o Sɛkalaya lo.
2 Mi waŋnda Bɛtɛl viam Sialuɛsa nda Luɛkim-mɛlɛki a laŋgbaa nduaa, le ma kɔ nyɔɔlu Chɛhowa.
3 Ma dimul wanaa soliaa lasalaa cho o chiɛi Chɛhowa, Mɛlɛka puaa chɔuwa wo niŋnda, a wanaa suaa le ndu wa aa: “Baa I nɔ pa mi chaŋ, nduyɛ mi kɛɛ nyɛdiaa dioo o paŋgii ŋuɛɛnuei niŋ, a mɛɛ ya tosa niŋ le wɔsiŋ bɔɔbɔɔ yɛ?”
4 Mi Chɛhowa, Mɛlɛka puaa chɔuwa suaa vɛlɛ o ya lo aa:
5 “Dimul waŋnda o lɛŋndeŋ niŋ kpou a wanaa soliaa lasalaa aa, ‘Boondii nya wa sumndo biyɔɔ a chaŋndo o paŋgii ŋuɛɛnuei a i ŋɔmmɛu ve niŋ le wɔsilaŋ 70 wo, baa le ya kpeekpei nya wa sumndo biyɔɔ ni?
6 Nduyɛ teleŋ nya wa diolaŋ a kolɔɔ wo, o cho le nyapila le nya wa diolaŋ a kolɔɔ le?
7 A teleŋ koŋ, Chulusalɛm a chieeŋ bɛnduŋ balu ndu woŋ wa ŋ piaa cha a waŋnda, nduyɛ a waŋnuŋ o kɔl nyulu niŋ. Nduyɛ o tandala Nekɛbi a Siɛfila laŋ niŋ bɛɛ, waŋnda wa a piaa cha. Baa ndoo bɛnda mi nyaa yaŋ nilaŋ o nyɛ Chɛhowa ndoo dimi sanaa a wanaa ndaa suaa le ndu wa le?’”
8 Mi Chɛhowa suaa vɛlɛ o Sɛkalaya lo, mbo dimul ndu aa:
9 “Nyɛ Chɛhowa, Mɛlɛka puaa chɔuwa dimi wo cho hoo ni, ‘La kilul waŋnda yamɛi o nɛi sakpoo choo, nduyɛ mi la chɔmaŋ kaala lo lechoo wo a nyiɛɛye.
10 Wanaa piaandaa ndaa vi wa ni, chuaambuaa nɔ lɛ ŋfinya le wa ni, wanaa lekaa wa ni, wanaa bala fonduaa ni, la tosal nda lakafa le. Nduyɛ, la tuunuŋ sɔɔŋ wɔɔŋndoŋ o lakɔl le chaaŋaa nyaa le.’
11 Kɛ a wa hiouwɔɔ lachi tuŋ a ndu kiɔɔ nilaŋ yaŋɔɔ. Ma tosa bolle kalaleŋ, nduyɛ ma mulul ndu kɔɔlaŋ. Ma kinda nila ndalaŋ kpiŋ yɔŋii nda tuei bɛɛ nyɛ o wa dimioo wo.
12 Ma kindi kɔlta ndalaŋ maa pou.* Mi Chɛhowa, Mɛlɛka puaa chɔuwa soliŋ nyina ndɔɔ kpeku, mbo ke nda sawalaŋ sanaa a wanaa ndaa suaa le ndu wa. Kɛ ma kɛɛ le sawala laŋ a nyɛ o dimul nda le tosaa wo diikɔŋndo. Le hei, mi Chɛhowa, Mɛlɛka puaa chɔuwa duaunuŋ tumbe o kala kala.”
13 “‘Mɛɛ ya soo o nda lo, ma kɛɛ le ya nilaŋ yaŋɔɔ. Lelaŋ, a nyuna ya bɛɛ le malaa, I mulul nda le.’ Ya Chɛhowa, Mɛlɛka puaa chɔuwa dimi lende ni.
14 ‘Mi sɛŋi nda a hueiyii fuku fukuei o lɛŋii yɛ yɛi ndaa sina le ve niŋ. Mi lɛŋnde ndaleŋ le koma lo pɔmndo. Wana o wana ndoo nɔla mbo keeku loŋ, ɔɔ mbo miiŋgu loŋ te. Ma tosa mi lɛŋnde kɛndɛ kɛndɛ le leŋ le simnuŋ fondaŋ waŋnda cha mi siooŋnde bii nda wo.’”
Tɛɛsiaalaŋ
^ Tofa Tɛɛsiaa B15.
^ Diom maHibului nda soliŋ kpeku naŋ ndo sim le daamɔŋnde, pou ɛmɛluɛiyo, ɔɔ pou kala kala cheleŋ.
