Sɛkalaya 9:1-17
9 Yooŋgoo:
“Chɛhowa mɛi lediom le lɛŋnde Hadiluaki leŋ chiŋalaŋndo,Nduyɛ Damasikɔɔ o kɛsi kɔllo choo ni.*Kanifuule, hɔlte Chɛhowa leŋ le cho waŋnda chieeya,Vɛlɛ a kaalaŋ kpou Isɔluɛi choo.
2 Hamaati, chiee salu bɛɛ pɛŋgulaŋ a ndu wo, o cho ndu chiŋalaŋ.Taaya a Saidɔŋ bɛɛ o cho nda chiŋalaŋ, kanifuule a cho bɔɔ wanaa taasi.
3 Taaya taŋgul kpaki kala kalaa le ndupila mandaa.
O diu diu kaniŋ humboŋ kundalaŋ maa chundu,Nduyɛ mbo diu diu kooliiyoŋ mɛɛ loolioo wa nuaa o nɛilaŋ yɛ.
4 Kɛ nyɛm o nɔ woŋ, Chɛhowa cho ndu muŋ poondiaa o ba,Mbo tɛɛmbuu puaa nduaa chɔuwa o pee mɛŋma ihɛllo niŋ,Nduyɛ mbo tosa ma lom ndu chilikɔ.
5 Asikɛlɔŋ cho hei chɔ, okoŋ mi siooŋnde bii ndu.Kaasa cho luɛiyɔɔ o buulaŋ bɛndu bɛndoo niŋ,Nduyɛ Ɛkulɔŋ bɛɛ, kanifuule siɔmbulaŋ la tol wana o tiindaŋ ndo.
Kaasa cho lɛ nɔ masa le.Nduyɛ wana o wana chel lɛ niŋ Asikɛlɔŋ te.
6 Po nda velu violɔɔ samaa wo cho hunɔɔ ichali Asidɔɔ,Nduyɛ, I cho Filitiaa tusi le kaa ndɔ heelaŋndo.
7 I cho ndu nɔɔ makoŋgoo faŋa o sondo,A nyɛm nɔɔlɛi nɔɔlɛi cho ndu o chiŋndoŋ tɛɛŋ ndoŋ.Nduyɛ, le Mɛlɛka naa o cho niŋ wa ni.O cho simnɔŋ maa masa* o Chuda niŋ,Okoŋ mi Ɛkulɔŋ simnuŋ maa Chɛbusaitiinɔ.
8 I cho lasisi o chiɛi nuu hɔlndɔ le ndu mandaa.Nduyɛ, I cho tosa wana o wana luei leniŋ ɔɔ mbo fula le.Wanaa tusi waŋnda nyɛpalaa choo wa kei lɛ niŋ loŋ te.Kanifuule, I cho ndi* chɔɔ a hɔlta nilaŋ pɛɛŋ.
9 Num chua laandoo Saayɔŋ, dɔɔnuŋ nyaale tau tau.
Num chua laandoo Chulusalɛm, deŋi choo choo a kɔl kɛndɔɔ.
La tofawɔ! Masa nyaa cho hunɔɔ naa nya chua.
Masa sakpoo o cho ni, nduyɛ o cho hunɔɔ le nya baŋaa,O cho wana tusiaŋ, nduyɛ o cho hunɔɔ o sofɛlɔɔ choo,O cho o sofɛlɛ fɔŋndɔɔ* choo, chuale sofɛlɛ laandoo.
10 I cho nyɛm nyaanaŋ suaa naŋndoŋ faŋa IfiluemNduyɛ mi faŋa suaa Chulusalɛm.
I cho nda chiɔula puaa chɔuwa soliŋ kpeku laŋ poondiaa o laba.
Nduyɛ o cho hunɔɔ a kɔl nyuloo o kaalaŋ niŋ kpou.Masale ndɔleŋ le cho pɛŋgɛlaŋ chɔŋ o pee mɛŋma ihɛllo mbo kɔ bii o pee mɛŋma ihɛllo o pilɔɔ,Nduyɛ mi le chɛŋ o Pee Bɛndoo* mi le kuɛ ba o ba fee o lɛŋndeŋ choo.
11 Num Saayɔŋ, le mɛɛ ya yii kpemaa a num a koowaŋ yɛ,I cho wanaa num aa cho o biyɔɔ niŋ o sooŋ vesɛiyo niŋnda soli.
12 Nya wanaa cho o biyɔɔ niŋ mi la nɔ tiindaŋndo wa, la miiŋgu o chiee kpaki kala kalaa niŋ.
Mi dimul num hau Saayɔŋ,‘I cho num miŋgi paawa* bɛmbɔɔ le diiŋ.
13 I cho Chuda tundɔɔ maa lechiɔu.
Mi wou Ifiluem o chiɔule leŋ niŋ.Num Saayɔŋ, I cho chuauwaa numnda tindi,Nduyɛ num Kilisi, ma kɔ chiŋalaŋ chuauwaa numnda.I cho tosa ma simnuŋ maa muɛi faŋii kuubanɔ chɔuwo.’
14 Chɛhowa cho chɔm kpendekele maa o cho latulu a wanaa nduaa,Nduyɛ chiŋɔle ndɔleŋ le cho fula faŋ maa nyɛ ŋualalɛi.
Chɛhowa, Mɛlɛka Kpuluŋguma Bɛndoo cho buloo hɔŋ,Nduyɛ, mbo kuel nda maa hueiyii fuku fukuii fula ba tou wo ve.
15 Chɛhowa, Mɛlɛka puaa chɔuwa cho chɔulaba le nda.Yaamɔɔwa cho nda chiŋalaŋ a pouta faandalaŋ, kɛ ma yem nda.
A cho wa a nyaale, nduyɛ ma wa deŋioo naŋ chaa muɛiyaŋ nda kol ni.A cho wa mɛɛ muɛiyaŋ ma pia nuaa o hɛŋgɛiyo niŋ yɛ,Nduyɛ, ma wa mɛɛ koowaŋ ma talaŋ nuaa o sɔŋgila bandu luamaa lasalaa yɛ.
16 O paale leŋ choo, Chɛhowa Mɛlɛka ndaa cho nda piŋi,Kanifuule, saa nduaa nda cho ni.A cho wa o lɛŋndeŋ niŋ mɛɛ pouta baa kalalaŋ la wa nuaa iŋɛlɛŋgi ŋɛlɛŋgiei o mɔsil lemasaa choo yɛ.
17 Nuawɔ se mɛɛ o cho wana kɛndɛ yɛ!Nduyɛ nuawɔ se mɛɛ o naŋ yɛ!
Nyɛdiaa cho tosa mi puaa feleŋguaa sɔla yoomuaŋ,Nduyɛ, mi muɛima sɛnɛiyaŋ ma tosa mi yufuaa bɛɛ sɔla yoomuaŋ.”
Tɛɛsiaalaŋ
^ Hibuluiye, “cho fondaŋ pɛŋgiaa ni.”
^ Ɔɔ “yuŋgu lebollo.”
^ Nyɛ kindilaa wanaa nduaa wa bɛŋgu wo.
^ Ɔɔ “sofɛlɛ piaandoo.”
^ Koŋ cho ni, Yufiluaati.
^ Ɔɔ “sala.”
