Taitɔɔ 1:1-16
1 Ya Pɔɔl, buɛi Mɛlɛkaa a kiilanɔɔ le Chiisu Kiliti cho yauwo hoo poonyiaa ni. Laalaŋ nuu a wali lekiila ya cho tosaa wo cho o chɛlaŋ a laalaŋ wanaa Mɛlɛka hɛli wa. O cho vɛlɛ o chɛlaŋ a kɔl kalu kpeekpei cho a tonyaa okɔɔ wo, nduyɛ a yɔŋgɔŋndo o Mɛlɛka lo.
2 O tɔlnuŋ o tiindaŋ yoomu fafɛɛŋndo choo, o Mɛlɛka dimi lachoo le wo mɛi lediom sindɛ niŋ pa wo.
3 Kɛ a boondii ndupila kɛɛsiaa ve, mbo chɔɔmuu diom ndɔɔ sanaa a yooŋgu kɛndɛ o ke ya le dimioo wo. Nduyɛ Mɛlɛka piŋi naa wo, ndu vem ya ndu dimioo ni.
4 I cho ndu poonyiaa naa num Taitɔɔ chua, po ni kpeekpei naŋ nɔ laalaŋ pilɔɔ wo:
Maa Mɛlɛka Finyaa, nda Chiisu Kiliti cho wana naa piŋiaa wo tosal nya kɛndɛi ndɛi bɛnduei, nduyɛ ma ke nya kɔl nyuloo fɔ!
5 Mi mɛi num Kilɛti le ma siɛɛnduu sɔɔŋ cho loŋ ndoŋ, nduyɛ ma yulu laŋgbaa isu o chiee o chiee bɛndu niŋ le waa bɛnduaa. A mɛɛ ya dimul num yɛ,
6 bɛndu kundaa nɔ mbo nɔ tɔɔ wɔɔŋ te. O nɔ mbo nɔ lanɔɔ opilɛ kpe. Chuauwaa nduaa nɔ ma wa wanaa laalaŋnda. Tɔɔ wɔɔŋ nɔ mbo wa nda choo le. A nɔ ma wa chuauwaa nila kalu le.
7 Mɛɛ wana chua chilaŋ o kundaa niŋndo cho wallo le Mɛlɛka yɛ, tɔɔ wɔɔŋ nɔ mbo wa ndu choo le. O nɔ mbo nɔ yoŋga le. O nɔ mbo dɔɔnuŋ tumbe chɔ chɔ le. O nɔ mbo wa wana hiu mamuɛi kolɔɔ le. O nɔ mbo wa wana lasɔŋgɔ le. O nɔ mbo nɔ hɔlteŋ le nyɔɔŋ sɔlaa tau o kafalaŋ choo le.
8 Kɛ o nɔ mbo wa wana chaa mialla biyɔɔ wo, mbo kaala sɔɔŋ kɛndɔŋ tosaa, mbo wa sakpo, mbo chɔm lo lechoo wo, nduyɛ mbo tiu kɔl ndɔɔ ba.
9 O nɔ mbo sim yi o tonyaa choo o pɛɛku ndɔɔ niŋ, le halikpeŋ mbo luei waŋnda yoomuaŋ a pɛɛku tonyaa,* nduyɛ mbo sila wanaa sɛɛŋgiaa pɛɛku koŋ nda.
10 Kanifuule, wanaa nila kaluaa, wanaa dimi sɔɔŋ ŋdiɔmndoŋ nda, a wanaa hui waŋnda wa cho tau. Taama taama, wanaa baŋnuŋ hivi chiɛi kɔɔlioo wa.
11 O bɛnda ma kinda nda sondolaŋ, kanifuule waŋnda haa cho yuŋgulaŋ laasiaa a pɛɛkula lachoowalaŋ, le nda sɔlaa nyɛ o ba o kafalaŋ choo.
12 Mi wana pilɛ o lɛŋnde Kilɛtileŋ niŋ, o ndoo suaa le Mɛlɛka wo dimi aa: “Wanaa lachoowaa, visiaa wɔɔŋ wɔɔŋnda, a wanaa lepuluaa waŋnda Kilɛti cho lɔɔlɔɔ ni.”
13 Tonya kpeekpei i cho ni. Le saboo hoo, hiou lachi a nda silaa o kala kala, le halikpeŋ mi laalaŋ ndaa kendu poŋ.
14 Okoŋ, a yeŋ lani o bundɔŋ lachoowaŋ Chuuwa dimi woŋ te. A yeŋ vɛlɛ lani o sawala wanaa mulul tonyaa kɔɔ wa dɔu laŋ te.
15 Nyɛ o nyɛ cho o diandaa le wanaa cho a diandaa Mɛlɛka o hɔl la. Kɛ wanaa cho a nɔɔlɛi, nduyɛ a nɔ laalaŋ te wa, nyɛ o nyɛ cho o diandaa le nda le. Kanifuule, yiyaŋnda ndalaŋ a kɔlta iyamala ndalaŋ kpou, la cho la nɔɔlɛi.
16 Ma chɔm waŋnda o hɔl kpendekele maa a sina Mɛlɛka. Kɛ mi walta nda tosalaŋ la chɔm maa a sina ndu le. Kanifuule, a kuisiŋ Mɛlɛka o kɔl, nduyɛ a cho wanaa nila kalu. O chɛl nda le wali o wali kɛndɛ tosa le.
Tɛɛsiaalaŋ
^ Ɔɔ “nɔ tɔnɔɔ wo.”
