Aisaya 1:1-31
1 Yilaŋii Aisaya,* po Amɔɔsi wo che a Chuda vɛlɛ a Chulusalɛm okɔɔ ve, teleŋ Yusaya, Chotam, Ehaasi, a Hɛsikaya wa masaa le Chuda wo cho hei ni:
2 Nya cho o choo choo niŋnda a nya cho o lɛŋndeŋ choo wa, la yaŋ nilaŋ.Nyɛ Chɛhowa dimi wo cho hoo ni:
“I velu chuauwa, nduyɛ mi soli nda leniŋ.Kɛ nduyɛ ma simul la.
3 Nau towaa sina wana pendu ndu wo nyɛkɛndɛi,Nduyɛ sofɛlɔɔ bɛɛ sina naa wana cho ndu mandaa wo dou ndu nyɛdiaa wa.Kɛ Isɔluɛiya sina ya* le,Wanaa niaa kpeekpei nɔ sinapɛŋgu le.”
4 Kpundɔɔ cho le wanaa dɛnɛ wɔɔŋaa cho o lɛŋndeŋ ndeŋ niŋnda,Wanaa yiŋnuŋ yikpi o yɔŋ wɔɔŋndo niŋnda,Nya fula haa o yuŋgula wanaa dɛnɛ wɔɔŋnda choo wa, nya chuauwaa lakafaa haa!
La mal Chɛhowa.La kɛɛ Wana Diandaa le Isɔluɛi bɛɛleŋ chɔmndo,Nduyɛ mi la mulul ndu kɔɔ.
5 Fondaŋ kɛ kɛ cho lɛ o dialuŋ nyaŋ naa nda luaa nya wa le. Le yɛɛ nya cho yɛ wɔ hiouwɔɔ lachi a nilakalulaŋ tosaa?
Bolleŋ le cho a naa,Nduyɛ mi kɔllo kpou wa o nyɛ nɛiyaa niŋ.
6 Chɔŋ o peluŋ kɔlloŋ haaa mbo hel o bolleŋ di, falii kɛ kɛ cho lɛ kɛndiaa le.
Boolɔŋndaŋ, suusiaŋndaŋ, a pauvii koloŋnde kposoŋ cho nya o ŋdial ni.La cho ndi danda dɔwɔɔ,* mi la yiu yiu ndi, ɔɔ mi la wou ndi machuɛi le.
7 Lɛŋnde nyaleŋ le lo pɔm.
A mal chieeŋ nyaŋ bɛndoŋ o yiŋ.
Mialla tɛɛmbuu lɛŋnde nyaleŋ nya o hɔl.
Le simnuŋ maa lɛŋnde mialla del choo ma yam ndeŋ.
8 A mɛi chua laandoo Saayɔŋ, mɛɛ nda mɛi nuaa yɛkpɔɔ o kpele makilepiiyo niŋ yɛ,Mɛɛ yɛkpɔɔ wa nuaa o kpele kɔkumbɛiyo niŋ yɛ,Vɛlɛ a mɛɛ nda luei nuaa chioo o piŋndo niŋ yɛ.
9 Te Chɛhowa, Mɛlɛka puaa chɔuwa* ndoo mɛi naa a tiŋ yoomu le,Ŋ wa simnɔŋ maa Sodɔm,Nduyɛ mi naŋ vel Komoolua.
10 Nya masaa ŋuasu ŋuasuaa Sodɔm, la tueiyɔ nyɛ Chɛhowa dimi wo.
Nya waŋnda Komoolua, la yaŋ nilaŋ o sawa* Mɛlɛka naa.
11 Chɛhowa dimi aa: “Tɔnɔ yɛɛ ya cho yɛ sɔlaa o salala bɛndula nya cho solioo laŋ niŋ?
I saŋga niŋ a salala luamaala nya cho solioo a saa konduaa, vɛlɛ a chuɛima visiaa chelulɛiyaa kɛndɛ kɛndiaa waŋ.I nɔ lɛ iyeema o kooma nauwaa fɔŋnduaa, saa fɔŋnduaa, a o chuiŋaa nyaa niŋ te.
12 Te la hiŋ pɛ ya lachi,Nɛɛnɛ dimul lɛ nya,Le mi la huŋ niɔu niɔu bɛɛ balu chiɛi nuu wo?
13 La chuu lɛ ya salala ŋkulta fondola laŋ te.
I tul nyɛm chuŋ kɛndɛŋ nya luam ndoŋ leyɛ.
Mi la bii bɔŋaŋnda paŋguŋ sɛnɛilaŋ, palɛi pɛŋgiɛi, a bɔŋaŋnda bɛndulaŋ.Kɛ I tul bɔɔ maŋgaliaala nya tosa a bɔŋaŋnda nyala teŋgeŋndaŋ latulu laŋ leyɛ.
14 I tul bɔɔ bɔŋaŋnda nya bii o paŋgei kandɔŋndo laŋ a bɔŋaŋnda nyala cheleŋndaŋ leyɛ.
La simnuŋ niŋ kalaŋ bɛndoo le ya.I saŋga niŋ a laŋ biuwɔŋndo.
15 Te la heelu pɛ balaŋ choo choo le piɛileŋ o ya lo,I veŋ hɔlaa niaa.
Mi che bɛɛ la cho piɛileŋ tau tau,Kɛ I cho lani yaŋɔɔ le.Kanifuule, bala nyalaŋ la cho la piaa cha a koowaŋ.
16 La puluŋ fiou mi la simnuŋ a diandaa.La faŋa sɔɔŋ dɛnɛ wɔɔŋ nya tosa woŋ ya o hɔl.La pɛŋgi yɔŋ wɔɔŋndo tosaa.
17 La pɛɛku le sɔɔŋ kɛndɔŋ tosaa, mi la nuuviaa sandei.La miŋgi wana bii waŋnda ŋuasu ŋuasu wo o nɛi.La suŋgu le dila chuauwaa nɔ lɛ ŋfinya le wa,*Nduyɛ mi la soo le wanaa vii piaanduaa wa.”
18 Chɛhowa dimi aa: “La huŋ miŋ toosiaŋ sɔɔŋ tɛɛŋ.
Mi che bɛɛ mi hakila nyalaŋ la wa la siaŋa sɔɔtɔtɔ,Kɛ la cho simnɔŋ la humbu fo fo maa feŋgbɛ.Mi che bɛɛ la cho la siaŋa maa kola siaŋa,Kɛ la cho simnɔŋ la humbu naŋ chaa yiiŋii saa ni.
19 Te la yɔŋguŋ pɛ wulee nduyɛ mi la yaŋ nilaŋ,La cho nyɛm kɛndɛŋ cho o lɛŋndeŋ ndeŋ niŋndoŋ dio.
20 Kɛ te la kɛɛ pɛ nilaŋ yaŋɔɔ nduyɛ mi la tosa nilakalulaŋ,A cho nya diu diu a muɛi faŋnde.Nyɛ Chɛhowa dimi wo cho hoo ni.”
21 Nuawɔ se mɛɛ chiee bɛndu wa lo lechoo wo chɔmndo o Mɛlɛka lo wo simnuŋ niŋ maa wana suundɛi yɛ!
Sandei wa i piaa leniŋ cha.O ndu niŋ sakpoyɛi wa ichali ni.Kɛ wanaa diyaa cho niŋ loŋ ni.
22 Kaniŋ nyaŋ humboŋ simnuŋ nyɛm nɔɔlɛi,Nduyɛ muɛima nyaŋ* ma muuliaŋ a mɛŋndaŋ.
23 Laŋgbaa nyaa kalla simnuŋ wanaa bolii kalaa, nduyɛ ma bii viiya ichaŋya.
O kɛ kɛ fee kaala luɛiyɔɔ niŋndo, nduyɛ ma wa kiltaŋ waŋnda kɔɔli le ma sɔla nyɔɔŋ.
A ke chuauwaa nɔ lɛ ŋfinya le wa* dila ndalaŋ te,Nduyɛ wanaa vii piaanduaa wa huŋ bɛɛ a sɔɔŋ ndaŋ o nda lo, a saalaŋ te.
24 Lelaŋ nyɛ Masanɔ tonyaa, Chɛhowa, Mɛlɛka puaa chɔuwa,Wana Kpaaya Bɛndoo le Isɔluɛi dimi wo cho hoo ni:
“La yaŋ nilaŋ! I cho yaamɔɔwaa niaa soli po o lɛŋndeŋ ndeŋ niŋ,Nduyɛ mi miŋgul yaamɔɔwaa niaa maa.
25 I cho nya chiŋalaŋ a ba nuu,Mi dindi nya fo fo a sɛŋndaŋ,Nduyɛ mi faaŋiaa nyɛ o nyɛ nɔɔlɛi cho nya lekɔɔ kpou.
26 I cho wanaa nyaa kialaa ŋyamaa miŋgi mɛɛ nda wa o kandɔŋndo yɛ,Nduyɛ mi miŋgi wanaa nyaa silaa maa paandu.
Okoŋ kɔɔli, a cho wa chioo hoo veeloo aa, Chiee Bɛndu Cho Sakpo Wo, a Chiee Chɔm Lo Lechoo Wo Wo.
27 I cho Saayɔŋ baŋa a sandei,Nduyɛ a sakpoyɛi ya cho wanaa cho miiŋgu loŋ nda baŋa ni.
28 Wanaa nilakaluaa a wanaa dɛnɛ wɔɔŋnda cho tambei sɔla diompilɛ.Nduyɛ wanaa cho Chɛhowa malɔɔ wa, mɛɛlula ndalaŋ la cho fuuluu.
29 Siɔmbulaŋ la cho nya biyɔɔ le yɔmii tɔɔmɛi bɛnduii nyaa nɔ yeemɛi o ndi niŋnde,Nduyɛ mi la sɔla bɛɛla tambɛilaŋ le kpelela* nya hɛli laŋ.
30 La cho simnɔŋ maa yɔm bɛndu bɛndoo, o pei nduɛi nyamala wo,Vɛlɛ a kpele nɔ mamɛŋ te wo.
31 Wana dialuŋ kalaa cho simnɔŋ maa bil vesɛi,Nduyɛ mi walta ndɔlaŋ la wa maa latɛŋgɛ tɛŋgɛ.Ndu ni, walta ndɔlaŋ ni, a cho ŋɔ o yiŋndeŋ niŋ.Wana o wana ve niŋ le yiŋnde leŋ nyumi le.”
Tɛɛsiaalaŋ
^ Diolaŋ ndaŋ la sim, “Piŋi Chɛhowa Wo.”
^ Ɔɔ “masanɔ ndaa.”
^ Hibuluiye, “wayiaa.”
^ Koŋ cho ni, puaa chɔuwa o choo choo niŋ.
^ Ɔɔ “nɛi chɔmaa.”
^ Ɔɔ “viiya.”
^ Ɔɔ “muɛima nda toosiaa a witiiyoŋ ndaŋ.”
^ Ɔɔ “viiya.”
^ Naapum yɔmii tɔɔmɛi hei a kpelelaŋ ndaŋ la chiɛɛliaŋ a piɛile ŋpiɔmndeŋ.
