Aisaya 10:1-34
10 Kpundɔɔ cho le wanaa kɛsi sawala huŋ a kpundɛlaŋ nda,A cho teleŋ o teleŋ sawala sɛnɛilaŋ kɛsioo le waŋnda nyɛpalaa tusioo choo wa,
2 Le ma kɛɛ wanaa bala fonduaa dila ndalaŋ kioo,Le wanaa nɔ wanaa malaa le wa wanaa niaa tɛɛŋ kafalaŋ tosallo,Ma chua nyɛm wanaa vii piaanduaa wa,Nduyɛ ma puŋga nyɛm chuauwaa nɔ lɛ ŋfinya le wa.*
3 Yɛɛ ŋ cho yɛ tosa te paale kɔɔsɔleŋ* le fuuluu pɛ,Boondii wana cho nya tɛɛmbuuwo cho fula o fondaŋ levillo ve?
O nɛɛnɛ lo ŋ cho yɛ nyaanɔŋ le malaa,Nduyɛ kuɛɛnɛ ŋ cho yɛ nyɛm kɛŋ numndoŋ mɛi?
4 Ŋ nɔ niŋ nyɛ o nyɛ le tosa le, mɛɛ le wulaŋ baŋɔɔ wanaa cho o chiɛi manyumndo niŋnda tɛɛŋ,Ɔɔ miŋ del wanaa cho ihini a vilɛiya wa tɛɛŋ.
Le sɔɔŋ muŋ kpou kɔl ndɔ tuuwo cho wɔ hiouwɔɔ lachi ni,Mbo wa wɔ ba ndɔɔ siɛndioo le nda nyɛpalaa tusioo choo.
5 La yaŋ nilaŋ, “Asiiliaa ya cho soliŋ kpeku ni,Le tumbe nuu chɔmndo.Nduyɛ tinda cho ndu o ba wo ya soliŋ niŋ kpeku ni le kɔl ni tuuwo chɔmndo.
6 I cho ndu viomɔɔ mbo kɔ chiŋalaŋ wanaa kɛɛ Mɛlɛka tonyaa wa,Nduyɛ mbo tɛɛmbuu wanaa tosa mi duaunuŋ tumbe wa.I cho ndu dimul mbo puŋga nyɛm kɛŋ bɔɔbɔɔ mbo chua muŋ tau,Nduyɛ mbo niɔu niɔu nda mɛɛ nda niɔu niɔu nuaa loolioo o nɛila bɛndu laŋ choo yɛ.
7 Kɛ o cho ndi biyɔɔ bila o nɛiyo hoo choo le,Nduyɛ o cho pɛŋ yiyaŋ koŋ te cho ndu delɔɔ o kɔl te.Yiyaŋ cho ndu o kɔllo suee cho le waŋnda tɛɛmbuuwo,Mbo chii wanaa bɔɔbɔɔ o lɛŋii faŋga faŋga niŋ ni.
8 Kanifuule o cho dimi aa:‘Laŋgbaa niaa kalla kpou, o cho masaa le nda cho le?
9 Mɛɛ Kaanɔ cho yɛ, baa o cho lende le Kakɛmisi bɛɛ cho le?
Mɛɛ Hamaati cho yɛ, baa o cho lende le Apaadi bɛɛ cho le?
Mɛɛ Sameeliaa cho yɛ, baa o cho lende le Damasikɔɔ bɛɛ cho le?
10 Mi tiuba le biu biuwo masɛi ndii nɔ mɛlɛkaa fonduaa ve.Masɛi hei ndii nɔ piɔmaa ndaa sooluu wa a hɔbɛi mbo hiau Chulusalɛm a Sameeliaa!
11 Naa ya tiuwɔ ba mi tosa hei a Sameeliaa vɛlɛ a mɛlɛkaa nduaa fonduaa wa,Baa I tiu vɛlɛ ba mi tosa nyɛ pilɛ koŋ a Chulusalɛm vɛlɛ a piɔmaa nduaa le?’
12 “Te Chɛhowa chii pɛ wali ndɔɔ kpou tosa o Pembii Saayɔŋ nde choo a Chulusalɛm, o* cho masaa le Asiiliaa nyɛpalaa tusi choo le yoŋga cho ndu o kɔllo, vɛlɛ a heelɔŋ ndɔɔ.
13 Kanifuule o dimi aa,‘I cho hei tosa a ba ni kpaaya bɛndoo a taasi nuu,Kanifuule wana taasioo ya cho ni.
I cho pɛŋgula lelɛŋnda faaŋiaa waŋnda tɛɛŋ,Mi puŋga nyɛm ndaŋ baa kalaŋ,Okoŋ mi yem wanaa cho loŋ nda maa wana kpaaya bɛndu.
14 Mɛɛ waŋndo siɛndi nuaa baa mbo wou o waaŋndeŋ niŋ okoŋ mbo kɔndu peltaŋ yɛ,Lende ya cho nyɛm kɛŋ waŋnda poondiaa ni a ba nuu,Mi chuuŋgiaa nyɛ o nyɛ cho o lɛŋndeŋ choo naapilɛ.Waŋnda kpou cho simnɔŋ maa youwa,
A nɔla ma chɔulaba le ndapila le wa.’”
15 Baa chuei nɔ pa kpaayaa wana cho wallo a ndi wo choo?
Baa suɛiyo* nɔ pa kpaaya wana cho wallo a ndu wo choo?
Baa tindaa nɔla pa mbo hiŋ wana o cho o ba wo?
Ɔɔ baa sioŋndeŋ le nɔla pa mi le heelu wana le cho o ba wo?
16 Lelaŋ Masanɔ tonyaa, Chɛhowa Mɛlɛka puaa chɔuwa,Cho tosa mi wanaa nduaa chelulɛiya nyau,Asiiliaa cho lɛ lebɛɛ nɔ kposoŋ te, o wa niŋ ko mɛɛ yiŋndeŋ le luam nuaa nyɔɔ chilikɔ yɛ.
17 Paŋgeloo Isɔluɛi cho simnɔŋ yiŋndeŋ,Nduyɛ mi Wana Ndɔ Diandaa simnuŋ yiŋnde wule wuleleŋ.O paaleŋ le pilɛ niŋ kpe, yiŋndeŋ ndeŋ le cho billo a yondo cho mɔndɔ mɔndɔ a yɔɔŋ Asiiliaa wo lomɔɔ.
18 Bundɛla ndɔla kɛndɛ kɛndɛlaŋ vɛlɛ a yɔmii nduɛi kuamɛi, Mɛlɛka cho nyɛ o nyɛ tɛɛmbuu.O wa niŋ ko mɛɛ waŋndo naa nuaa mi dialuŋ ndɔŋ kuɛŋnuŋ kpou yɛ.
19 Yɔmii cho lo o bundɛla ndɔlaŋ niŋnde lo niŋ i bɔɔ le.Hali poombɔ pɔmbɔɔ bɛɛ tiuba mbo chii ndi chɔm kpou.
20 O paale leŋ choo, a cho lo o Isɔluɛi niŋnda,Vɛlɛ a wanaa cho chinda o chiɛi Chekɔpu wo niŋnda,A tiindaŋ lɛ niŋ wanaa tusi nda nyɛpalaa choo wa le malaa le.Kɛ Chɛhowa nda cho tiindaŋ ni, Wana Diandaa le Isɔluɛi,Nduyɛ ma chɔm lo lechoo wo o ndu lo.
21 Wanaa cho lo yoomu wa kinɛi cho miiŋgu ni.A cho lo yoomu o pulale Chekɔpu leŋ choo wa cho miiŋgu o Mɛlɛka Kpaaya Bɛndoo lo ni.
22 Oo Isɔluɛi, mi che bɛɛ wanaa numnda cho a hɔbɛi,Mɛɛ siooŋnde wa nuaa o pee mɛŋma ihɛllo niŋ yɛ,Kɛ a cho lo wa kinɛi cho miiŋgu ni.
Kɛɛsiaa chuu tosaŋ le wanaa numnda tɛɛmbuuwo,Nduyɛ hei cho yɔŋnɔŋ a nda o sandei choo.
23 A tonya, kɛɛsiaa Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa tosa le nda tɛɛmbuuwo wo,O cho ndu tosa o lɛŋndeŋ niŋ kpou.
24 Lelaŋ nyɛ Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa dimi wo cho hoo ni: “Wanaa niaa cho Saayɔŋ nda, la yɔŋ isiooŋ le Asiiliaa le, o ndoo luaa nya a sioŋndeŋ, nduyɛ mbo heelu tindaa le nya chiŋalaŋndo mɛɛ Ichipi tosa yɛ.
25 Kanifuule o teleŋ biŋgi bɛŋgu, kɔl ni tuuwo cho fuuluu o mɛɛlulaŋ. Nduyɛ mi muli kɔl ni tuuwo o ndu lo le ndu tɛɛmbuuwo.
26 Chɛhowa, Mɛlɛka puaa chɔuwa cho ndu kisɔɔ a sioŋndeŋ, mɛɛ mɛɛ o yem Midiaŋ o pouwo Oluɛbi ikɛi yɛ. O cho tinda ndɔɔ yulɔɔ o pee mɛŋma ihɛllo choo, mɛɛ o tosa a Ichipi yɛ.
27 O paale leŋ choo, wolɔɔla ndɔlaŋ la cho nya faŋaŋ o lachoŋgu,Nduyɛ mi yɔm ndɔ lawolɔɔ faŋaŋ nya o ŋkɛsu.Nduyɛ chuɛiyaŋ ma cho tosa mi yɔm ndɔ lawolɔɔ yomi yomi.”
28 O hiŋ Eyai,Mbo keeku Mikilɔŋ,Nduyɛ mbo kɛsi bɔlɔ ndɔ lawolɔɔ Mikimaasi.
29 O taŋ mɛŋma vɛlɛ vɛliaŋ,Mbo huŋ lɔl Kiba,Luama nyiiya a siooŋnde, mi wanaa wa Kibiya o chiee Sɔɔ wo niŋnda nyaanuŋ.
30 Chaŋ choo choo kpeleŋ, chua laandoo Kalim!
Oo Laisa! Yaŋ nilaŋ,
Num Anatɔti cho o mɔnɛi bɛnduei niŋnde bɛɛ, yaŋ nilaŋ!
31 Madimɛnaa nyaanuŋ.
Waŋnda Kɛbim cho chaltaŋ nuuviaa.
32 O cho hau kei lasisi Nɔbi.
O yulu bɔta ndɔɔ o pembii chua laandoo Saayɔŋ mbo hiŋ ndu,Pembei Chulusalɛm.
33 Masanɔ tonyaa, Chɛhowa Mɛlɛka puaa chɔuwa,Cho lɛuwoŋ kilioo a kpaaya bɛndu bɛndoo.O cho yɔmii vilɛi vilɛiye kilioo,Nduyɛ mbo wa wanaa cho filioŋ nda tusioo toolo.
34 O cho bundɛla cho la piaa cha a yɔmnde laŋ tɛɛmbuu a chuei,Nduyɛ wana kpaaya bɛndoo cho tosa mi Lebanɔŋ sɔla tambei.
