Aisaya 11:1-16
11 Lɛuve cho piɔl o chiyii Chɛɛse ve,I cho piɔl o puundoŋ mi i hindu nduyɛ mi i kom.
2 Nyina Chɛhowa wo cho ndu wa choo,Nyina tosa mbo nɔ taasioo a sinapɛŋgoo wo,Nyina tosa mbo chaa silaa yɔŋgoo nduyɛ mbo nɔ kpaayaa wo,Nyina tosa mbo nɔ kɔl kaloo nduyɛ mbo nɔ siooŋnde le Chɛhowa wo.
3 O nɔ niŋ yeemɛi le siooŋnde nɔɔ le Chɛhowa.
O kilu niŋ yamɛi a nyɛ o cha a lehɔl lo le,Kɛlɛŋgaa niŋ te mbo miŋgi waŋndo o nɛi le nyɛ o tuei a nila ndɔlaŋ ndo.
4 O cho wanaa nɔ sɔla bɔɔ le wa yamaŋ kilul o nɛi sakpoo choo,Nduyɛ mbo miŋgi wanaa tusiaŋaa cho o lɛŋndeŋ choo wa o nɛi, o nɛi sakpoo choo.
Diomnda fula ndu niŋ o sondolaŋ la cho wa sioŋnde o soliŋ niŋ kpeku le lɛŋndeŋ soŋɔɔ wo ni,Nduyɛ mbo diu diu wanaa dɛnɛ wɔɔŋnda a hueiyii cho ndu wa fulaa o ŋ chɔchɔ ve.
5 Sakpoyɛi cho wa yaule o yiinuŋ o chaŋ ndeŋ ni,Nduyɛ mi lo lechoo wo bɛɛ wa yaule o yiinuŋ o chaŋ ndeŋ.
6 Tiwollo nda saa fɔŋndɔɔ cho wa latulu,Nduyɛ mi chuiŋ fɔŋndɔɔ nda tambillo hini latulu,Nau fɔŋndɔɔ, kpɔkuŋndo,* a visiaa chelulɛiya cho wa naapilɛ,*Nduyɛ poombɔ pɔmbɔɔ cho wa nda chilaŋ ni.
7 Nauwo a sulukoo cho wa diolaŋ naapilɛ,Nduyɛ mi chuauwaa ndaa hini naapilɛ.
Kpɔkuŋndo cho billo dio mɛɛ nau towaa dia ndu nuaa yɛ.
8 Chɛlɛkpɛ nda cho wa wuɛsioo wo cho wa pisultaŋ o sooŋ yɛlɔɔ,Mi chɛlɛkpɛ mal mɛɛleŋ sɛnɛiyo wou baa, o sooŋ kɛu wɔɔŋ wɔɔŋndo niŋ.
9 A mel niŋ kpundɛ o kpundɛ le,Kɛlɛŋgaa niŋ te ma tɛɛmbuu nyɛ o nyɛ o pembii nii diandɛi choo.Kanifuule kɔl kalu Chɛhowa wo cho wa o piaa cha o lɛŋndeŋ choo,Mɛɛ mɛŋndaŋ ma cho nuaa tau tau o pee mɛŋma ihɛllo niŋ yɛ.
10 O paale leŋ choo, wana cho fula o puundule Chɛɛse leŋ choo wo cho lasisi maa tamasi le mi waŋnda che.
O ndu lo lɛŋnde kpou cho muliŋ ni le nɛi chɔmaa,*Nduyɛ fondaŋ ndɔ pɛŋgiaa cho simnɔŋ fondaŋ lebɛɛ.
11 O paale leŋ choo, Chɛhowa cho vɛlɛ ba ndɔɔ siɛndi le teleŋ diiŋ ndɔɔ, le mbo chuuŋgiaa wanaa nduaa lo wa naapilɛ, a cho Asiiliaa wa, haa Ichipi, Patɔlɔsi, Kusi, Ɛlam, Sianaa,* Hamaati, a lɛŋii buŋgɛi cho o pee mɛŋma ihɛllo ve.
12 O cho tamasioo simi le lɛŋnde, nduyɛ mbo chuuŋgiaa Isɔluɛiyaa cho a saŋnaŋnda, okoŋ mbo chuuŋgiaa vɛlɛ waŋnda Chuda a cho a saŋnaŋ o kpeŋguŋ hiɔɔloŋ o lɛŋndeŋ choo wa.
13 Kaa paŋalɛi Ifiluem ndo cho chuwɔɔ,Nduyɛ mi wanaa tul Chuda leyɛ wa sɔla tambei.
Ifiluem cho lɛ Chuda paŋala le,Nduyɛ Chuda cho lɛ Ifiluem yɛleŋ tul te.
14 A cho tolɔɔ sululu o pembuŋ feke fekeŋ Filitiaŋnda ba paaleŋ le del lo.A cho yiinaŋ diompilɛ ma kɔ puŋga nyɛm waŋnda ba paaleŋ le chaŋ ndo.
A cho ba ndaa siɛndi ma chiŋalaŋ Idɔm a Mowaabi,Nduyɛ mi Amɔnaitiiya wa nda o ba bɛŋgu.
15 Chɛhowa cho pee bɛndu mɛŋma ihɛl Ichipiaŋnda piɔu tɛɛŋ,*Nduyɛ mbo hiŋ ba ndɔɔ o Pee Bɛndoo* choo.
Hueiyii tuu o cho yoomu ve cho lɛuwuŋ ndɔŋ ŋɔmmɛu woŋ veesiaa,Okoŋ mbo tosa mi waŋnda taŋ a kɔwɛila* ndalaŋ o lɛŋnde vesɛileŋ choo.
16 O cho nɛi bɛndoo toosiaa chɔnɔŋndo Asiiliaa le wanaa nduaa lo wa,Mɛɛ o toosiaa le Isɔluɛiya teleŋ nda wa chɔnɔŋndo o lɛŋnde Ichipi leŋ niŋndo yɛ.
Tɛɛsiaalaŋ
^ Ɔɔ “yalakanaa.”
^ Ɔɔ naapum, “Nau fɔŋndɔɔ a kpɔkuŋndo cho wa nyɛdiaa dioo naapilɛ.”
^ Ɔɔ “Lɛŋnde cho ndu nuuviaa.”
^ Koŋ cho ni, Babiloniaa.
^ Ɔɔ naapum, “veesiaa.”
^ Koŋ cho ni, Yufiluaati.
^ Ɔɔ “samtala.”
