Aisaya 13:1-22
13 Nyɛ Aisaya po Amɔɔsi wo che o yilaŋnde niŋ a Babilɔŋ okɔɔ wo cho hoo ni:
2 “Simi suŋgbuleŋ maa tamasi o pembii lapou ve, i nɔ iyɔm te ve choo.
Veelu nda choo choo ma hiŋ ba numndo,Le halikpeŋ ma hiŋ o fondaŋnda laŋgbaa kalla kei le luɛiyɔɔ laŋ.
3 I dimul wanaa ya hɛli wa* nyɛ nda nɔ ma tosa wo.
I yooŋgu le kuubaa niaa chɔuwa a cho a nyaale nduyɛ ma kialu yoŋgaa wa,Le ma tusi wanaa pilaŋ ya tana wa nyɛpalaa choo.
4 La yaŋ nilaŋ! Faŋga bɛndoo cho o pemboŋ choo!I cho bɔɔluuwo tueiyɔɔ naŋ chaa faŋga bɛndu bɛndoo ni!
La yaŋ nilaŋ! Masɛi cho wooluŋ wooluŋndo,Mi lɛŋnde chuuŋgiaŋ naapilɛ!
Chɛhowa Mɛlɛka puaa chɔuwa, cho puaa chɔuwa yoomuaŋ lueiyo le chɔuwo.
5 Chɛhowa a nyɛm ndɔŋ chɔu kɔl tuuwoŋ,Cho chɔnɔŋndo o fondaŋ landaŋndo o lɛŋndeŋ choo,A o fondaŋnda landaŋ ndaŋ o choo choo niŋ,Le hunɔɔ nyɛ o nyɛ cho o lɛŋndeŋ choo tɛɛmbuuwo.
6 La koŋul choo choo kpeleŋ a chaŋndo, kanifuule paale Chɛhowa leŋ le cho niŋ kpɛɛluŋ!
Paale leŋ le cho hunɔɔ a boondii Mɛlɛka Kpaaya Kpou Kpou Wo cho hunɔɔ a tɛɛmbuu ndɔɔ wo.
7 Le sabu koŋ bala ndalaŋ kpou la cho wu ni,Mi kɔltaŋ la laasiaŋ wana o wana a siooŋnde.
8 Waŋnda cho yɔŋnɔŋ pulaŋ pulaŋ,
Dialloŋ cho nda wa nyiiyaa nduyɛ ma wa o nyɛ nɛiyaa niŋ,Mɛɛ pulii vialɛi i bii nuaa wana lanɔɔ yɛ.
A cho wa nuaŋnaŋndo vellaa velle o siooŋnde niŋ,Nduyɛ mi hɔlla hiinduu nda a nyɛ nɛiyaa.
9 Paale Chɛhowa leŋ le cho hunɔɔ.Paale kpundɛ leŋ a paale kɔl tuuleŋ le cho wa ni,Le mi lɛŋndeŋ le simnuŋ nyɛ waŋndo cha mi siooŋnde bii ndu wo,Nduyɛ mi le tɛɛmbuu wanaa yɔŋ wɔɔŋaa cho o lɛŋndeŋ niŋnda.
10 Looŋ cho o choo choo niŋndoŋA looŋ kundaŋ* cho nyɛ teŋgaa yɔŋgu le.Paaleŋ le cho wa yim yim o yɔŋ bɛɛ mi le fula,Nduyɛ mi paŋgei kɛɛ le nyɛ teŋgaa yɔŋgoo.
11 I cho wanaa cho o lɛŋndeŋ choo wa kpou yamɛi kilul le yɔŋ nda wɔɔŋndo,Vɛlɛ a wanaa dɛnɛ wɔɔŋnda le dɛnɛ nda wɔɔŋndo.
I cho tosa mi yoŋga wanaa heelaŋnda fuuluu o mɛɛlulaŋ,Nduyɛ wanaa yoŋgaa tusi waŋnda nyɛpalaa choo wa mi tusi nda toolo.
12 I cho tosa mi wanachioo kendu chɔ mbo hiou kooliŋ kɛndɛ kɛndɔŋ,Nduyɛ mi tosa mi waŋnda chieeya kendu chɔ mbo hiou kooliiyoŋ Ofii.
13 Le sabu koŋ ya cho tosa ni mi choo choo hiiluŋ,Nduyɛ mi lɛŋndeŋ bɛɛ le hiiluŋ mi le faŋaŋ o fondaŋ ndɔɔ,O paale Chɛhowa, Mɛlɛka puaa chɔuwa duaunuŋ niŋ tumbe ŋama ŋama leŋ choo.
14 Mɛɛ doosuaa wa nuaa puuwɔɔ kiltaŋ kɔɔli, vɛlɛ a mɛɛ saa kundaa wa nuaa a nɔ wana chuuŋgiaa nda wo le yɛ,O kɛ kɛ fee cho miiŋgu o wanaa nduaa lo,Mi o kɛ kɛ fee nyaanuŋ o lɛŋnde ndɔleŋ niŋ.
15 O kɛ kɛ nda saaluŋ pɛ, a cho ndu chukɔɔ.Nduyɛ o kɛ kɛ nda bii pɛ, a cho ndu diyɔɔ a muɛi faŋnde.
16 A cho chuauwaa ndaa kili kili vee vee ndapila o hɔl,Ma puŋga nyɔɔŋ o chiɛila ndalaŋ niŋ,Nduyɛ ma kpuviaa laandaa ndaa.
17 I cho tosa mi waŋnda Midiaa chiŋalaŋ nda,A chi kaniŋ humboŋ nyɛ o nyɛ le wa,Nduyɛ a nɔ iyeema o ŋkoolii niŋ te wa.
18 Chiɔula ndalaŋ la cho puaa feleŋguaa tɛɛmbuu,A nɔ niŋ inyiɛɛ le chɛlɛkpiaa le,Kɛlɛŋgaa niŋ te ma tuiinuŋ chuaambuaa inyiɛɛ.
19 Babilɔŋ, masale fula tɔɔ* mi le hiau masɛi kpou leŋ,Chiee bɛndu kɛndɛ kɛndɛ tosa mi Kaadiaŋnda kelu yoŋgaa wo,Cho hunɔɔ simnɔŋ maa Sodɔm a Komoolua, boondii Mɛlɛka tɛɛmbuu chiooŋ muŋ nde.
20 Fɛɛŋ bɛɛ wana chel lɛ loŋ te.Le fɛɛŋ a fɛɛŋ wana cho lɛ wa loŋ te,
Aluabuiinɔ kɛ kɛ kue lɛ mbo kɔ simi tɛndii ndɔɔ loŋ te,Nduyɛ wana mandaa lasaa kɛ kɛ kue lɛ niŋ a saa nduaa loŋ te.
21 Nyaa yoomaa wa o pollo niŋnda cho wa hinilaŋ loŋ ni,Nduyɛ mi huaa wa a piaa cha o chiɛila ndalaŋ niŋ.
Ɔsiluichiiya cho wa loŋ,Nduyɛ mi chuiŋaa yonduaa* wa pisultaŋ loŋ.
22 Visiaa yonduaa cho wa chaŋndo o chiɛila ndala choo choo laŋ niŋ,Nduyɛ mi tuŋaa yonduaa wa busɔɔ o chiɛila ndala lemasalaŋ niŋ.
Teleŋ ndɔɔ cho niŋ kpɛɛluŋ, nduyɛ palɛi nduɛi bendu lɛ niŋ te.”
Tɛɛsiaalaŋ
^ Hibuluiye, “wanaa ya hini kɔl la.”
^ Hibuluiye, “a Kɛsiliŋ ndɔŋ.” Naapum muŋ nda veelu vɛlɛ ni aa Oliɔŋ a looŋ kundaŋ balu muŋ ndoŋ.
^ Ɔɔ “naŋ naŋɔɔ bɛndoo.”
^ Ɔɔ naapum, “nyinaa wɔɔŋaa cho maa ŋchuiŋ nda.”
