Aisaya 14:1-32
14 Chɛhowa cho Chekɔpu inyiɛɛ tuiinɔŋ, mbo hɛli vɛlɛ Isɔluɛi. O cho nda miŋgi* o lɛŋnde ndaleŋ niŋ, nduyɛ mi wanaa cheleŋnda tol nda kɔɔli le ma wa latulu a chiɛi Chekɔpu wo.
2 Waŋnda o lɛŋii cheleŋnde niŋ cho nda chua ma miŋgi nda o fondaŋ ndaa, nduyɛ mi Isɔluɛi siiŋguu nda buɛiyaa nduaa piaanduaa a buɛiyaa nduaa laanduaa o lɛŋnde Chɛhowa leŋ niŋ. Wanaa ndaa kuɛ a nda o biyɔɔ niŋnda cho nda miiŋgu o ba o biyɔɔ niŋ, okoŋ mi wanaa ndaa baŋ nda le wallo tosaa wa miiŋgu nda o ba bɛŋgu.
3 Paale Chɛhowa cho nya ke pɛŋgioo, mi la fula o nyɛ nɛiyaa, o dɛnɛ palaa niŋ, a o chɛle kala kalale nya wa bɛŋgu leŋ niŋ,
4 La dimi niŋ taloo hoo a masaa le Babilɔŋ okɔɔ aa:
“Wana wa waŋnda baŋɔɔ le wallo wo, nuawɔ se mɛɛ mɛɛlula ndɔlaŋ la fuuluu yɛ!
Nuawɔ mɛɛ nyɛkindilaa o wa waŋnda tusioo choo wo fuuluu o mɛɛlulaŋ yɛ!
5 Chɛhowa yem siooŋnde wana dɛnɛ wɔɔŋndo,Mbo yam vɛlɛ tinda masaa waa,
6 O tɛɛmbuu wana wa waŋnda chieeya lɔɔ a kɔl tuu bɛndoo ndoo pɛŋgi le wo,O wa lɛŋnde lueiyo o kpaaya ndɔɔ bɛŋgu a kɔl tuuwo wo, nduyɛ mbo tusi nda nyɛpalaa choo wo.
7 Lɛŋndeŋ kpou le cho niŋ o pɛŋgioo niŋ, kpundɛ kɛ kɛ cho lɛ leŋ paaliaŋ te.
Waŋnda cho chaŋnda kɔl kɛndɛlaŋ choo choo kpeleŋ.
8 Hali yɔmii chunipa ve bɛɛ cho a kɔl kɛndɛ le nyɛ yɔŋnuŋ numndo,Nduyɛ yɔmii sida ve Lebanɔŋ bɛɛ.
I cho dimioo aa, ‘Chɔŋ a teleŋ ŋ del lo,Wanaa kialu yɔmnde wa o pilɛ bɛɛ hiŋ ndɔ mbo chiŋalaŋ naa le.’
9 Hali Sɛiyo* o lɛŋndeŋ bɛŋgu di bɛɛ cho a yeemɛi,Le bɔŋaa a num boondii ŋ cho lakɔ ve.
Le sabu numndo, wanaa vilɛiyaa nɔ kpaaya le wa sɛiyo cho nda tindi,Masaa* ndaa tusi waŋnda nyɛpalaa choo o lɛŋndeŋ choo wa kpou.
Nduyɛ, sɛiyo cho vɛlɛ tosa mi masaa o lɛŋnde niŋ kpou chɛŋ o kpeŋgbeila* ndala lemasalaŋ choo.
10 Nda kpou cho wa suɛi, okoŋ ma nyuna num aa,‘Baa num bɛɛ simnuŋ wana dialuŋ vilɛi maa naa?
Baa num bɛɛ simnuŋ maa naa?
11 Heelɔŋ numndo kpou tol o Sɛiyo* niŋ,Latulu a nyɛm chaaŋ iyooŋ numndoŋ.
Chaa cho a pɛŋgɛlaŋ lɛtɛu, ma hini nda choo maa kpele,Nduyɛ dondopolla cho kola num kuumbaŋ ndo ni.’
12 Num cho hoo diondɔɔ bɛndoo naŋ chaa paale idiileŋ ndo,Nuawɔ se mɛɛ ŋ fula o choo choo niŋ ma del lɛ!
Num wa hoo lɛŋnde nyɛpalaa tusioo choo wo,Nuawɔ se mɛɛ ŋ sɔla kiolɔŋndo o lɛŋndeŋ choo yɛ!
13 Ma dimi o kɔl niŋ aa, ‘I cho helɔɔ o choo choo niŋ.
I cho lakɔ kpeŋgbei* ni lemasaa kɛsi o fondaŋ filioŋ hiou looŋ Mɛlɛka toosiaa woŋ helɔɔ wo,Okoŋ mi chal o pembii bɔŋaŋ nde choo,Fondaŋ cho landaŋ ba luaŋ ndo wo.
14 I cho lakɔ o yumbu yumboo bolleŋ di,Mi simnuŋ maa Mɛlɛka Hiou Kpou Wo.’
15 Kɛ a cho lakɔ o Sɛiyo* niŋ,Fondaŋ yiŋgila mbo hiau sooŋndo wo.
16 Wanaa cho num chɔ wa, kɔndɔfillo cho nda biyɔɔ.A cho num mɛɛndaŋ nyɛkɛndɛi ma dimi aa,‘Baa wana wa lɛŋndeŋ hiiluuwo wo cho hoo ni,O tosa mi masɛi nyiiya,
17 Okoŋ mi lɛŋndeŋ kpou le simnuŋ maa lɛŋnde polteŋ,Mbo tɛɛmbuu chieeŋ bɛndoŋ,Nduyɛ mbo kɛɛ le wanaa wa ndu o ba o chiɛila manyumndaŋ niŋnda malɔɔ ma miiŋgu o nda lo wo?’
18 A tonya, masaa o lɛŋii cheleŋnde niŋ kpou,Nda kpou, ma sɔla kumbɔɔ o nɛi lebɛɛ niŋ,O kɛ kɛ fee ma kumbu ndu o sɛi ndɔɔ niŋ.*
19 Kɛ ma viau num, a sɔla pɛŋ kumbɔɔ o sɛi niŋ te,Mɛɛ nda kialu nuaa lɛuvii wɔɔŋnde yɛ.Mɛɛ nda kumbu dialuŋ numndoŋ a wanaa nda diu diu a muɛi faŋnde wa,A nda wou o sooŋ lapouwo niŋnda.A cho ko maa dialuŋ vilɛi nda kei kpaatiaa choo woŋ.
20 A sɔla niŋ kumbɔɔ o sɛiyo niŋ a masaa waa latulu le.Kanifuule a tɛɛmbuu lɛŋnde numndeŋ,Nduyɛ ma diu diu wanaa numnda.
Wana o wana veelu lɛ niŋ diola chuauwaa wanaa dɛnɛ wɔɔŋnda le.
21 La bɛɛndiaŋ le puaa nduaa o velu wa diuwo,Le sɔɔŋ wɔɔŋ finyaa ndaa mamaa tosa woŋ,Le halikpeŋ a sɔla kpaayaa ma chua lɛŋndeŋ,Okoŋ ma pɛ o lɛŋndeŋ niŋ a o chieeŋ ndɔŋ bɛndoŋ niŋ te.”
22 Chɛhowa, Mɛlɛka puaa chɔuwa dimi aa: “I cho nda hunɔɔ chiŋalaŋ.
I cho diola Babilɔŋ ndaŋ wɔɔsuu, wanaa cho lo loŋ nda, wanaa fula o pulale ndaleŋ choo wa, a chuauwaa mamaa o chuauwaa mamaa kɔɔli.” Ya Chɛhowa dimi lende ni.
23 “I cho Babilɔŋ siiŋguu fondaŋ sɛiya wa niŋ ndo, nduyɛ o cho hunɔɔ simnɔŋ maa huŋ. I cho ndu basɔɔ a bɛsu tɛɛmbaa nyɔɔ.” Chɛhowa, Mɛlɛka puaa chɔuwa dimi lende ni.
24 Chɛhowa Mɛlɛka puaa chɔuwa mɛnaŋ po aa:
“Mɛɛ ya tuu le ndi tosaa yɛ, lende i cho yɔŋnɔŋ ni.Nduyɛ mɛɛ ya kɛɛsiaa yɛ, lende kpeekpei i cho hunɔɔ yɔŋnɔŋ ni.
25 I cho Asiiliaa tɛɛmbuu o lɛŋnde nileŋ niŋ,Nduyɛ mi niɔu niɔu ndu o pembuŋ niŋ bɛndoŋ choo.
I cho wanaa niaa yɔm ndɔ lawolɔɔ faŋa choo,Nduyɛ mi faŋa wolɔɔla ndɔlaŋ nda o choŋgu.”
26 Kɛɛsiaa tosaŋ le mbo yɔŋnuŋ o lɛŋndeŋ choo kpou wo cho hoo ni,Nduyɛ baa hoo cho o siɛndiaa ni* le lɛŋndeŋ kpou chiŋalaŋndo.
27 Chɛhowa Mɛlɛka puaa chɔuwa chii kɛɛsiaa,Nɛɛnɛ kuuna yɛ ndi yɔŋnɔŋndo?
O chii ba ndɔɔ siɛndi,Nduyɛ nɛɛnɛ nɔla yɛ mbo tusi ndu?
28 O wɔsi Masaa Ehaasi vi wo niŋ, Mɛlɛka yɔŋ yooŋgoo hoo ni aa:
29 “Nya waŋnda Filitiaa, wana o wana duaunuŋ nyaale,Le mɛɛ tinda wana wa nya lɔɔ wo yom yɛ le.
Waŋndo cho fula o pulale kɛuwo choo, mbo simnuŋ kɛu wɔɔŋ wɔɔŋndo,Nduyɛ chua ndɔ o cho violɔɔ wo cho simnɔŋ kɛu wɔɔŋ wɔɔŋ huulu o hueiye niŋndo.
30 Po tase wana nɔla sɔla tau le wo dia niŋ nyɛdiaa mbo pim cha,Nduyɛ mi wana bala fondoo hiniŋ mbo waŋnuŋ hɛnɛkɛ.Kɛ I cho tosa mi pulale numndeŋ kpou sɔla piɔmndo a yima bɛnduaŋ,Nduyɛ a cho lo yoomu wa, ma diu diu nda.
31 Oo dio kpakioo, mɛli yeelaŋ, nduyɛ mi chiee bɛndoo chaŋ choo choo kpeleŋ!
Nya waŋnda Filitiaa kpou, kɔltaŋ la cho nya laasiaŋ niŋ,
Kanifuule kumnde cho chɔnɔŋndo ba luaŋ ndo,Nduyɛ puaa chɔuwa cho hunɔɔ kpeekpei, o pilɛ bɛɛ saŋga mbo del te.”
32 Vɛɛ nda cho yɛ wanaa lɛŋii cheleŋnde vem nda mulul?
A cho nda mulul maa Chɛhowa kila chiiye Saayɔŋ,Nduyɛ maa wanaa nɔ wanaa malaa le wa o wanaa nduaa tɛɛŋ cho hunɔɔ vioŋnɔŋ loŋ.
Tɛɛsiaalaŋ
^ Ɔɔ “O cho tosa ma sɔla pɛŋgioo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “Chuiŋaa toyiaa.”
^ Ɔɔ “kpɛŋɛla.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “kpɛŋɛ.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “chiɛi ndɔɔ.”
^ Ɔɔ “cho niŋ o bɛɛndiaŋ.”
