Aisaya 16:1-14
-
Nyɛ dimiŋ a Mowaabi okɔɔ wo hiou lachi (1-14)
16 Yɔŋ saa kondoo o masa lelɛŋndo lo,Chɔnɔŋndo Silaa mbo keeku o pollo niŋ,Mbo kuɛ o pembii chua laandoo Saayɔŋ.
2 Mɛɛ nda tuau nuaa youwo o waaŋnde ndɔleŋ niŋ yɛ,Lende i cho yɔŋnɔŋ a chuaa laanduaa Mowaabi o mɛŋma vɛlɛ vɛliaŋ Anɔŋ ni.
3 “Yɔŋgu silaa, ma tosa nyɛ ŋ kɛɛsiaa wo.
Tosa wundule numndeŋ a paale kalaleŋ mɛɛ nyumndaŋ ma wa nuaa yɛ.
Vioŋ wanaa cho a saŋnaŋ nda, nduyɛ mal wanaa cho nyaanɔŋndo wa yaamɔɔwaa ndaa o ba le.
4 Oo Mowaabi, maa wanaa niaa saŋnuŋ nda kɔ ma chal o num niŋ.
Simnuŋ naa viaŋnaŋnda le nda, yɔŋii wana tɛɛmbaa kɔ tɛɛmbuu nda.
Wana cho nda nyɛpalaa tusioo choo wo, mɛɛlula ndɔlaŋ la cho fuuluu.Nyɛ tambɛi cho yɔŋnɔŋndo wo bɛɛ cho fuuluu o mɛɛlulaŋ.Nduyɛ wanaa cho acheleŋnda niɔu niɔuwo wa cho hunɔɔ tambei sɔla lefafɛɛŋ o lɛŋndeŋ choo.
5 Okoŋ, mi kpeŋgbei* lemasaa sim yi o kaala lo lechoo wo choo.
Wana cho ichali lechoo fulaa o tɛndii Deeve wo niŋndo, cho lo lechoo wo chɔm.O cho wa yamaŋ kiolɔɔ o nɛi sakpoo choo a o sandei choo.”
6 Ŋ tuei a heelɔŋ Mowaabi wo okɔɔ. O cho bɔɔ wana heelaŋ.Ŋ tuei a yoŋga ndɔɔ, heelɔŋ ndɔɔ, vɛlɛ a kɔl ndɔ tuuwo okɔɔ.Kɛ suɛi nduɛi fonduei o suaa ve cho hunɔɔ mɛɛlu.
7 Lelaŋ waŋnda Mowaabi cho chaŋ kpeleŋ le Mowaabi,Waŋnda kpou cho koŋul choo choo a chaŋndo.
Wanaa nda cho soŋɔɔ wa cho mɔnɛi biyɔɔ le kato nda toosiaa a fikiima vesɛiyaŋ Kiaa-haluɛsɛti wo.
8 Kpelela waŋnda Hɛsibɔŋ la nyamaliaa,Nduyɛ kpelela makilepiilaŋ Sibima bɛɛ la nyamaliaa.Masaa o lɛŋnde niŋ niɔu niɔu lɛuwuŋ ndɔŋ cho a kilepiiyaŋ ma siaŋa yɔɔ wo.A fuuluu haaa Chasɛɛ,Ma hiau kɛ o pollo niŋ.
Lɛuwuŋ ndɔŋ lo pɛŋgɛlaŋndo miŋ fuuluu di o pee mɛŋma ihɛllo.
9 Le sabu koŋ ya cho chaŋ le kilepiiyaŋ Sibima ni, mɛɛ ya chaŋ le Chasɛɛ yɛ.
Oo Hɛsibɔŋ a Ɛliaalɛɛ, I cho nya liiviaa yɔ yɔ a mɛmɛma niaŋ.Kanifuule, deŋi ŋ wa le nyɛm num kuamaŋ lewɔɔ woŋ ndo a kowɔɔ numndo fuuluu o mɛɛlulaŋ.*
10 Kɔl kɛndɔɔ a nyaale bɛndoo cho lɛ o yɔmii kuamɛi niŋ te,Nduyɛ chonduŋ kɔl kɛndɔŋ a deŋi nyaaloo cho lɛ o kpelela makilepiilaŋ niŋ te.
Wanaa toosiaa muɛima makilepiiyaŋ nda cho lɛ muɛiyaŋ toosiaa o doolala ndalaŋ niŋ te.Kanifuule, ya tosa ni mi deŋi kɔl kɛndɛ koŋ mɛɛlu.
11 Dialloŋ kpou cho ya nyiiyaa niŋ le Mowaabi,Naŋ chaa towaa nda cho lɔɔ ni,Nduyɛ mi dialloŋ wa ya vɛlɛ nyiiyaa niŋ le Kiaa-haluɛsɛti.
12 O yɔŋ bɛɛ mi Mowaabi saaŋgiaŋ ndupila o fondaŋ filioŋndo choo, nduyɛ mbo kɔ piɛi o maaŋ ndɔɔ niŋ, o sɔla niŋ batiuwaa le.
13 Nyɛ Chɛhowa ndoo dimi a Mowaabi okɔɔ wo cho hoo ni.
14 Mi Chɛhowa dimi vɛlɛ aa: “O wɔsioŋ ŋgaa bɛŋgu, maa wɔsiŋ wana nda chua le wallo wo, Mowaabi cho bɛɛla tambɛilaŋ sɔla, kanifuule wooluŋ wooluŋ suu o suu cho wa loŋ. Wanaa lo niŋ nda ve niŋ a bɔɔ le, nduyɛ a ve niŋ wanaa sɔvɛ le.”
Tɛɛsiaalaŋ
^ Ɔɔ “kpɛŋɛ.”
^ Ɔɔ naapum, “Kanifuule bɔɔluu chɔuwo tol o nyɛm num kuamaŋ lewɔɔ woŋ choo vɛlɛ a nyɛm num kuawaŋ.”
