Aisaya 19:1-25
19 Nyɛ dimiŋ a Ichipi okɔɔ wo cho hoo ni:
Chɛhowa cho hunɔɔ Ichipi, o yumbu yumbu cho nyaanɔŋndo chɔ chɔ wo niŋ.
Mɛlɛkaa fonduaa cho Ichipi wa cho nyiiya kpa kpa ndu lachi,Nduyɛ kɔltaŋ la cho waŋnda Ichipi laasiaŋ niŋ kpou.
2 “I cho tosa mi Ichipiaŋnda chiŋalaŋ Ichipiaŋnda,Nduyɛ ma sɔŋga vellaa velle,Mi wana o wana chiŋalaŋ wanayɛi nduɛi a wana nda chiɛɛliaŋndo,Mi chiee bɛndoo chiŋalaŋ chiee bɛndoo, nduyɛ mi masaleŋ le chiŋalaŋ masaleŋ.
3 Kɔltaŋ la cho wanaa cho Ichipi wa laasiaŋ niŋ,Nduyɛ mi laasiaa tuula ndalaŋ.
A cho muliŋ o mɛlɛkaa fonduaa lo,Wanaa viamaa layawaa, wanaa ŋwaŋ vilɛiya, a wanaa dimi sɔɔŋ waa lachioŋ nda.
4 I cho Ichipi malɔɔ masa kɔl vesɛiyo o ba,Nduyɛ masa bii waŋnda ŋuasu ŋuasu wo cho nda wa choo ni.” Chɛhowa Masanɔ tonyaa, Mɛlɛka puaa chɔuwa dimi lende ni.
5 Mɛŋma cho o pee mɛŋma ihɛllo waŋ ma cho vela sɛɛŋ,Okoŋ mi peelaŋ la vela, nduyɛ mi la vesa sɛɛŋ.
6 Peelaŋ la cho chuŋ wɔɔŋndo fula,Mi peela pɔmbɔla kɔ del pioo Nail choo o Ichipi niŋndaŋ la tol toolo nduyɛ mi la vela.
Bil wul o peelaŋ ikɛiyo kpou cho hunɔɔ siɔ.
7 Tɔlɔɔla holnuŋ Pioo Nail, naa ma kɔ del o pee mɛŋma ihɛllo choo wa,A kuluŋ kɛ kɛ nda tɔl o pioo Nail kɔŋgɔ cho hunɔɔ vesa.
Hueiye cho hunɔɔ hɔŋ mi nyɛ o nyɛ kuɛŋnuŋ, nduyɛ nyɛ o nyɛ ve lɛ niŋ te.
8 Wanaa yɔɔyaa cho mɔnɛi biyɔɔ.Wanaa wuu doŋndoŋ o pioo Nail wa cho chaŋ chaŋ imɔnɔɔ,Nduyɛ wanaa wuu yalalaŋ nda cho lɛ wa a bɔɔ le.
9 Wanaa toosiaa kolalaŋ a fuŋnde wa,Vɛlɛ a wanaa toosiaa kolala feŋgbɛlaŋ a peniiyoŋ nda, siɔmbulaŋ la cho nda biyɔɔ.
10 Wanaa nduaa womulaa cho tambei sɔla,Wanaa nda chua le wallo wa kpou cho mɔnɛi biyɔɔ.
11 Laŋgbaa kala Sowaŋ, diɔmnda nda cho ni.
Wanaa taasiaa ke Feloo silaa wa yɔŋgu sila sɔvɛ le.
Le yɛɛ ma dimul Feloo aa:
“O pulale wanaa taasiaa choo ya fula ni,Nduyɛ o pulale masaa masindiaa choo ya fula ni”?
12 Kuɛɛnɛ wanaa num aa taasiaa cho yɛ?
Mɛɛ a dimullɔ num te a sina pɛ nyɛ Chɛhowa, Mɛlɛka puaa chɔuwa kɛɛsiaa a Ichipi okɔɔ wo.
13 Laŋgbaa kalla Sowaŋ tosa diɔmii bɛndu.A hui laŋgbaa kalla Nɔɔfi.*Masaa cho kaayii nduɛi bolle wa tosa mi Ichipi faŋaŋ o nɛi tonyaa choo.
14 Chɛhowa tosa mi kɔltaŋ la laasiaŋ waŋnda Ichipi niŋ,Nduyɛ a tosa mi Ichipi faŋaŋ o nɛi tonyaa choo o nyɛ o nyɛ niŋ,Mɛɛ wana kolaa mamuɛiyo wa nuaa loŋgolaŋndo o kusi ndɔɔ niŋ yɛ.
15 O wa bolleŋ ɔɔ tumndo, o wa lɛuve ɔɔ bil wa o peelaŋ ikɛiyo,*O kɛ kɛ nɔla niŋ nyɛ o nyɛ tosa le Ichipi le.
16 O paale leŋ choo, Ichipi cho simnɔŋ maa waŋ laanduaa, mbo nyiiya kpa kpa a siooŋnde, le mɛɛ Chɛhowa, Mɛlɛka puaa chɔuwa kɔŋgɔliaŋ ndu a ba ndɔ kpaaya bɛndoo le ndu chiŋalaŋ ndo yɛ.
17 Nduyɛ siooŋnde cho waŋnda Ichipi biyɔɔ le lɛŋnde Chuda leŋ. Te a tuei pɛ diola laŋ, siooŋnde cho nda biyɔɔ kanifuule, le mɛɛ Chɛhowa, Mɛlɛka puaa chɔuwa kɛɛsiaa le nda chiŋalaŋndo yɛ.
18 O paale leŋ choo, chieeŋ bɛndoŋ ŋuɛɛnu o lɛŋnde Ichipi leŋ niŋ cho suɛi maŋgalɛi Kenanaitiiya dimi, ma mɛnaŋ o Chɛhowa lo Mɛlɛka puaa chɔuwa, le lo lechoo wo chɔmndo o ndu lo. Chiee bɛndoo o pilɛ cho nɔ diolaŋ aa Chiee Bɛndu Tɛɛmbuu Nyɔɔŋ Ndo.
19 O paale leŋ choo, bandu luamaa lasalaa cho wa o lɛŋnde Ichipi leŋ tɛɛŋ le Chɛhowa, nduyɛ ma simi suŋgbuleŋ o pɛŋgula lelɛŋndaŋ le Chɛhowa.
20 O cho wa maa tamasi a seileŋ le Chɛhowa, Mɛlɛka puaa chɔuwa o lɛŋnde Ichipi leŋ niŋ. Kanifuule a cho chaŋ o Chɛhowa lo le malaa, le wanaa cho nda nyɛpalaa tusioo choo wa. Okoŋ mbo yɔŋ nda wana piŋiaa bɛndoo, o cho nda piŋi wo.
21 Chɛhowa cho Ichipiaŋnda chɔm wana suu o cho wo, nduyɛ mi Ichipiaŋnda sina wana suu Chɛhowa cho wo o paale leŋ choo. A cho salalaŋ soli o Chɛhowa lo, ma ke ndu nyɔɔŋ, ma chua buŋgaŋ o ndu lo, nduyɛ ma peelu muŋ.
22 Chɛhowa cho Ichipi nyɛpalaa tusi choo, nduyɛ mbo siŋgi ndu. A cho miiŋgu Chɛhowa o ibuŋ, mbo muli piɛile ndaleŋ, okoŋ mbo siŋgi nda.
23 O paale leŋ choo, nɛi bɛndoo cho wa chɔŋ Ichipi haaa kɔ Asiiliaa. Okoŋ waŋnda cho wa chɔŋnɔŋndo Asiiliaa ma kua Ichipi, mi waŋnda chaŋ Ichipi ma kua Asiiliaa. Nduyɛ Ichipi nda Asiiliaa cho wa Mɛlɛka piɛiyo diompilɛ.
24 O paale leŋ choo, Isɔluɛi wa niŋ kunda yaa ndɔɔ ni le sɔɔŋguuwo Ichipi a Asiiliaa choo, mbo simnuŋ salaa le lɛŋndeŋ kpou.
25 Kanifuule Chɛhowa, Mɛlɛka puaa chɔuwa cho leŋ salaa dɔwɔɔ aa: “Salaa cho wanaa niaa choo Ichipi, wanaa ya toosiaa a bala nilaŋ nda Asiiliaa, a nyɛm kɛŋ nuŋ Isɔluɛi.”
