Aisaya 2:1-22
2 Nyɛ Aisaya, po Amɔɔsi wo che o yilaŋnde niŋ a Chuda vɛlɛ Chulusalɛm okɔɔ wo cho hoo ni:
2 O palɛi mɛɛlɛi niŋ,Pembii bɛnduii chiɛi Chɛhowa wo cho o taŋgulaa le choo ve,I cho lasisi pembuŋ bɛndoŋ choo kpou.Pembuŋ pɔmbɔŋ kpou cho wa lebɛŋgu pɔ pɔ.Nduyɛ, o pembei hei waŋnda o lɛŋii yɛ yɛi niŋ wa niŋ kɔlaŋ ikpɔlɔ kpɔluɛi ni.
3 Wanaa bɔɔbɔɔ cho wa dimioo aa:
“La huŋ miŋ kuɛŋnuŋ o pembii bɛnduii Chɛhowa ve choo.La ŋ kɔŋnuŋ o chiɛi Mɛlɛka Chekɔpu wo.
O cho naa lakɔ pɛɛku nyɛ o yeema naa miŋ tosa wo,Nduyɛ miŋ kuɛ o nɛi ndɔɔ choo.”
Saayɔŋ sawala* Mɛlɛkalaŋ la cho wa fulaa ni,Nduyɛ mi diom Chɛhowa wo wa fulaa Chulusalɛm.
4 O cho hunɔɔ yamɛi kiolɔɔ lɛŋii bɔɔbɔɔ tɛɛŋ,Nduyɛ mbo siɛɛnduu sɔɔŋ wanaa bɔɔbɔɔ tɛɛŋ.
A cho hunɔɔ mɔɔŋ ndaŋ faŋndoŋ chɔuwɔɔ dɛndɛla waa laŋ,Nduyɛ ma chɔu balta ndalaŋ mɔɔŋ nda bɛɛndiaa tɔlɔɔlaŋ ndoŋ.
Lɛŋnde kɛ kɛ chue lɛ niŋ mɔɔŋ faŋndoŋ mi le kɔ chiŋalaŋ lɛŋnde cheleŋ a sɔŋgɔɔ le,Nduyɛ fɛɛŋ bɛɛ a pɛɛku lɛ niŋ le kɔlaŋ o chɔuwo le.
5 Oo chiɛi Chekɔpu wo, huŋ.Huŋ miŋ kuɛ o nyɛ teŋgaa Chɛhowa wo niŋ.
6 Mɛlɛka, a kɛɛ wanaa numnda, chiɛi Chekɔpu wo.Kanifuule, a luei balaŋ o naamula bɔɔbɔɔ waŋnda tosa ba paaleŋ le chaŋ ndo laŋ niŋ.A cho maŋgaliaalaŋ tosaa maa Filitiaŋnda,Nduyɛ ma chɛl mi wanaa fula o lɛŋii cheleŋnde niŋnda wa nda tɛɛŋ tau tau.
7 Lɛŋndeŋ ndaleŋ le cho le piaa cha a kaniŋ humboŋ vɛlɛ a kooliiyoŋ,Nduyɛ nyɛm ndaŋ baa kalaŋ choŋnuŋ ŋ hɔbɛi, ŋ chuu chɔm te.
A nɔ suaa tau tau o lɛŋnde ndaleŋ niŋ,Nduyɛ nyɛm ndaŋ nyaanaŋ suaa naŋndoŋ ŋ chuu chɔm te.
8 Lɛŋnde ndaleŋ le cho le piaa cha a mɛlɛkaa fonduaa.
Ma beŋ piɔmaa nda toosiaa wa wulaŋ le nda sooluuwo,A nda toosiaa a bala ndalaŋ nda.
9 Waŋnda chieeya baŋ wulaŋ ma sɔla bɛɛla tambɛilaŋ.Num Mɛlɛka, a nɔla ma mal nda haki le.
10 La luɛi o poutaŋ niŋ mi la veŋnuŋ lɛŋ,Le kɔl tuu Chɛhowa wo,Vɛlɛ a tɔɔmayɛi nduɛi bɛnduei.
11 Wanaa heeluŋ heelɔŋ bɛndoo wa cho tolɔɔ toolo,Nduyɛ mi wanaa yoŋgaa baŋ wulaŋ.*
O paale leŋ choo, Chɛhowa kinɛi waŋnda cho saŋgala ni.
12 Kanifuule, le Chɛhowa Mɛlɛka puaa chɔuwa paale leŋ le cho ni.
Le cho hunɔɔ le wana o wana cho wana heelaŋ nduyɛ mbo chuaŋnuŋ filioŋ.Le cho hunɔɔ le wana o wana, wa bɛɛ filioŋ ɔɔ ma wa toolo.
13 Le cho vɛlɛ hunɔɔ le yɔmii sida ve kpou o Lebanɔŋ niŋ, i cho filioŋ nduyɛ mi i heeluŋ nde,Vɛlɛ a yɔmii ɔki ve kpou o Baasiaŋ niŋ.
14 Le cho vɛlɛ hunɔɔ le pembuŋ bɛnduŋ cho filioŋndoŋ,A le pembuŋ pɔmbɔŋ kpou.
15 Le cho vɛlɛ hunɔɔ le chiɛi vilɛi choo choo kɛ kɛ, vɛlɛ a kpaki o kpaki cho o kala.
16 Le cho vɛlɛ hunɔɔ le dɛndɛla bɛŋnda mamɛŋnda kua Taasi laŋ,Vɛlɛ a dɛndɛla pɔmbɔla kɛndɛ kɛndɛlaŋ kpou.
17 Wanaa heeluŋ heelɔŋ bɛndoo wa cho tolɔɔ toolo,Nduyɛ mi wanaa yoŋgaa baŋ wulaŋ.*
O paaleleŋ choo, Chɛhowa kinɛi waŋnda cho saŋgala ni.
18 Mɛlɛkaa fonduaa kpou cho lo pɛ.
19 Waŋnda cho luɛiyɔɔ o buulula nɔ poutaŋ ndaŋ niŋ,Nduyɛ ma luɛi o sooŋndaŋ niŋ lɛŋ,Le kɔl tuu Chɛhowa wo,Vɛlɛ a tɔɔmayɛi nduɛi bɛnduei,Teleŋ o cho tosa mi lɛŋndeŋ le nyiiya nduyɛ mi siooŋnde bii waŋnda wo.
20 O paale leŋ choo, waŋnda cho chua mɛlɛkaa fonduaa nda toosiaa a kaniŋ humboŋ vɛlɛ a kooliiyoŋ nda,A nda pila toosiaa ma beŋ nda wulaŋ nda,Ma wuulul bɛlaa sondo vilɛiya* vɛlɛ a tasaa,
21 Te a wa pɛ kɔlaŋ vioŋnɔŋndo o buulula cho o poutaŋ niŋndaŋ,Vɛlɛ a o pouta bɛndulaŋ tɛɛŋ,Le kɔl tuu Chɛhowa wo,Vɛlɛ a tɔɔmayɛi nduɛi bɛnduei,Teleŋ o cho tosa mi lɛŋndeŋ le nyiiya nduyɛ mi siooŋnde bii waŋnda wo.
22 La pɛŋgi tiindaŋndo dɔwɔɔ o wanachioo niŋ,O hueiyii yoomɛi cho o miliŋ kinɛiyo.
Le yɛɛ mi la dɔu tiindaŋndo o ndu niŋ?
Tɛɛsiaalaŋ
^ Ɔɔ “pɛɛkula.”
^ Ɔɔ “tusiŋ toolo.”
^ Ɔɔ “tusiŋ toolo.”
^ Visiaa pɔmbuaa tɛɛmbuu nyɔɔŋ nda.
