Aisaya 21:1-17
21 Nyɛ dimiŋ a lɛŋnde polteŋ o pee mɛŋma ihɛllo kɔŋgɔ wo cho hoo ni:*
Kpundɔɔ cho hunɔɔ mɛɛ hueiyii bɛnduei i tuusu nuaa a hɔŋndo ba tou wo yɛ.O cho chɔnɔŋndo o pollo niŋ, o lɛŋnde wɔɔŋ wɔɔŋ ndeŋ niŋ.
2 Yilaŋii kɔndɔfilii bɛnduii ya che ve cho hei ni:
Wana hui waŋnda wo cho waŋnda huiyo,Nduyɛ mi wana tɛɛmbuu waŋnda wo wa waŋnda tɛɛmbuuwo.
Oo waŋnda Ɛlam, la kɔ! La luei nda o piŋndo niŋ, waŋnda Midiaa!
Nyɛpalaa kɛ kɛ o cho nya tusioo choo, I cho tosa mbo fuuluu o mɛɛlulaŋ.
3 Huului ya che hei ve tosa ni mi wa o nyɛ nɛiyaa bɛndu bɛndoo niŋ.*
Dialloŋ kpou cho ya nyiiyaa niŋ kpa kpa,Mɛɛ pulii vialɛi i bii nuaa wana folioo yɛ.
I cho bɔɔ o nyɛkindilaa niŋ le nyɛ ya tueiyo,Nduyɛ nyɛ ya che wo cho ya bɔɔ paaliaŋndo.
4 Kɔllo yɔŋnuŋ ya pulaŋ pulaŋ, nduyɛ mi wa nyiiyaa a siooŋnde.
Paale delaale ya wa chumndo leŋ le tosa mi wa nyiiyaa kpa kpa.
5 La bɛɛndiaa tibiiyo* nduyɛ mi la bɛɛndiaa vɛlɛ naa chalaa!
La dio mi la kol!
Nya laŋgbaa kalla, la chɔŋ mi la pɔya* boo bɛndu puaa chɔuwa bii o ba wo!
6 Kanifuule, nyɛ Chɛhowa dimul la wo cho hoo ni:
“Kɔ ma kɔ kɛsi wana mɛŋgɛlaa, nduyɛ ma dimul ndu mbo dɔɔnuŋ nyɛ o cho chɔ wo kona.”
7 Nduyɛ mbo cha nyɛ nyaanaŋ chɔu suaa naŋndo a suaa kundaa,Nyɛ nyaanaŋ chɔu sofɛliaa naŋndo,A nyɛ nyaanaŋ chɔu nyɔɔmiaa naŋndo.
Mbo mɛɛndaŋ nyɛ kɛndɛ kɛndɛi, nduyɛ o wa yekeŋ bɛndu.
8 Okoŋ mbo yonda choo choo kpeleŋ maa kpɔkuŋ* aa:
“Oo Chɛhowa, I cho isisi lepaa o lepaa o bandu mɛŋgɛlaa choo,Nduyɛ mi wa isisi o fondaŋ ni mɛŋgɛlaa ichɔl o ichɔl.
9 La tofawɔ nyɛ cho hunɔɔ wo:
Puaa cho o nyɛ chɔu suaa naŋndo niŋ a suaa kundaa!”
Okoŋ mbo dimi choo choo kpeleŋ aa:
“O del! Babilɔŋ del!
Piɔmaa nduaa kpou, o chuii nda mululu o lɛŋndeŋ choo!”
10 Nya wanaa niaa nda niɔu niɔu haa naŋ chaa kulloŋ nda niɔu niɔu ni wa,Nya ya sɔla haa* o yasaba ni luaa ŋkullo wa,Nyɛ ya tuei Chɛhowa, Mɛlɛka puaa chɔuwa, Mɛlɛka Isɔluɛiya o sondo wo, ndu ya doonuŋ nya hoo kona ni.
11 Nyɛ dimiŋ a Dumaa* okɔɔ wo cho hoo ni:
Waŋnda cho ya veeloo choo choo kpeleŋ Sɛyaa aa:
“Wana mɛŋgɛlaa, kona yɛɛ ŋ nɔ yɛ a nyumndaŋ okɔɔ?
Wana mɛŋgɛlaa, kona yɛɛ ŋ nɔ yɛ a nyumndaŋ okɔɔ?”
12 Mi wana mɛŋgɛlaa dimi aa:
“Paaleŋ le cho niŋ hunɔɔ siɔɔ, mi nyumndaŋ ma hiŋ vɛlɛ.
Te la yeema nyunaa pɛ, la nyuna.
La kɔ mi la kɔ huŋ vɛlɛ!”
13 Nyɛ dimiŋ a lɛŋnde polteŋ okɔɔ wo cho hoo ni:
Oo nya wanaa cho Dɛdaŋ mi la balu kunda a nyɔɔmiaa wa,Bundɛ cho o lɛŋnde polteŋ niŋndo, loŋ nya cho kei nyumndaŋ hivi ni.
14 Nya wanaa cho o lɛŋnde Tɛma leŋ niŋnda,La huŋ a mɛŋndaŋ mi la ke wanaa cho a bolola vesɛilaŋ nda,Nduyɛ mi la hiŋ a nyɛdiaa* le wanaa cho nyaanɔŋndo wa.
15 Kanifuule a nyaanuŋ mɔɔŋ faŋndoŋ, muɛi faŋii nda soli o boo niŋnde,Chiɔule nda kindu leŋ, vɛlɛ a sɔɔŋ wɔɔŋ wa yɔŋnɔŋndo o chɔuwo niŋndoŋ.
16 Nyɛ Chɛhowa dimul la wo cho hoo ni: “Maa wɔsiŋ wana nda chua le wallo wo, o wɔsioo o pilɛ bɛŋgu, bɛɛle Kidaa leŋ kpou le cho fuuluu o mɛɛlulaŋ.
17 Kuubaa chɔuwaa cho lo Kidaa a chiɔu laŋ o laba wa, a ve lɛ niŋ a bɔɔ le. Chɛhowa, Mɛlɛka Isɔluɛi dimi lende ni.”
Tɛɛsiaalaŋ
^ Naapum a cho suɛi a tanda wa sindɛ Babilɔŋ ndo.
^ Hibuluiye, “mi chaŋaa niaa wa o nyɛ nɛiyaa niŋ.”
^ Ɔɔ “tabalioo.”
^ Ɔɔ “suu chuɛiyaŋ o.”
^ Ɔɔ “yalakana.”
^ Hibuluiye, “Num po ni ya sɔla.”
^ Diolaŋ ndaŋ la sim, “Meiyo Kpili.”
^ Hibuluiye, “beediiyo ɔɔ buloo.”