Aisaya 22:1-25
22 Nyɛ dimiŋ a Kpoloŋ ŋYilaŋndo* okɔɔ wo cho hoo ni:
Yɛɛnɛ cho yɛ yɔŋnɔŋndo a nya mi nya kpou helnuŋ o chiɛila nyalaŋ choo?
2 Wɔkɔ wɔkɔ bɛndoo wa o piaa cha o chioo hoo niŋ,Bɔɔluu bɛndoo, a kuuliaala kɔl kɛndɛlaŋ.
Wanaa nda dii o chioo hoo niŋnda, a dii nda a muɛi faŋ te,Kɛlɛŋgaa niŋ te ma vi o chɔuwo.
3 Masaa wa nya biyɔɔ ŋuasu ŋuasu wa kpou nyaanuŋ.
Ma kua a nda o chiɛi manyumndo niŋ, a soliŋ pɛŋ chiɔuwo kpeku le.
A nda saaluŋ nda kpou, ma kua a nda o chiɛi manyumndo niŋ,Mi che bɛɛ ma nyaanuŋ o fondaŋnda landaŋ ndaŋ.
4 Le sabu koŋ ya dimi ni aa: “Faŋa ya hɔlteŋ kɔɔli,Mi chaŋ fukpaa fukpaa.
Kindiŋ pɛŋ le ya kɔllo dɛɛniaa,Le mɛɛ chua laandu wanaa niaa sɔla tambei yɛ* le.
5 Kanifuule paale kɔltaŋ la laasiaŋ niŋ waŋnda ma yem nda nduyɛ ma yɔŋnuŋ yolomaŋ yolomaŋ ndeŋ le cho ni,Fulaa Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa o ba,O Kpoloŋ ŋYilaŋndo niŋ.
Kpakioo komba,Nduyɛ mi waŋnda wa chaŋndaŋ kpeekpei o pembei le malaa.
6 Ɛlam chua bɔlɔ machiŋɔɔ,Mbo wa kɔlaŋ a nyɛm nyaanaŋ chɔu suaa naŋndoŋ a suaa,*Nduyɛ mi Kiaa soli* boo puaa chɔuwa bii o ba wo.
7 Kpoloŋnda numnda kɛndɛ kɛndɛlaŋ,La cho hunɔɔ piɔ cha a nyɛm nyaanaŋ chɔu suaa naŋndoŋ,Mi suaa* kɔ sim kpɛ kpɛ o dio kpakioo,
8 Nduyɛ nyɛ cho le Chuda mandaa wo cho faŋaŋ.
“O paale leŋ choo, a cho tiindaŋndo dɔwɔɔ o nyɛm num chɔu cho o Chiɛi Bundɔɔ niŋndo niŋ,
9 nduyɛ ma che talta bɔɔbɔɔ kuɛ o Chiee Deeve Wo laŋ. Okoŋ, mi la chuuŋgiaa mɛŋndaŋ o mɛŋma ibuŋgama cho amatou waŋ niŋ.
10 La cho chiɛilaŋ Chulusalɛm chɔm, nduyɛ mi la pesi latiŋ le mi la chɔɔlu kpakioo kindi poŋ.
11 La cho nyɔɔ toosiaa o kpakila tiɔɔŋndaŋ tɛɛŋ le mɛŋndaŋ dɔwɔɔ naa mɛŋma ibuŋgaŋ ma wa paandu wa. Kɛ la tofa niŋ Wana Toosiaa Bɛndoo o toosiaa ndu wo le, nduyɛ la chi niŋ wana toosiaa ndu niŋ paandu pa wo le.
12 O paale leŋ choo, Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa,Cho veelu le mi waŋnda chaŋ nduyɛ ma bii mɔnɛi,Le ma sendi bolle okoŋ ma wounuŋ nyɛla labɛkilaŋ.
13 Kɛ yɔŋii nya tosa lende yɛ, mi la wa dunyaŋ biyɔɔ mi la duaunuŋ yaale,Mi la diu nauwa a saa,Mi la dia visioŋ nduyɛ mi la kol muɛiyaŋ.
Mi la dimulaŋ aa: ‘Ŋ dioŋnuŋ miŋ kolnuŋ, kanifuule siɔdii ŋ cho wu.’”
14 Okoŋ mi tuɛi Chɛhowa, Mɛlɛka puaa chɔuwa dimioo aa: “‘I mel niŋ nya haki le yɔŋ wɔɔŋndo hoo le haaa mi la sɔla piɔmndo.’ Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa dimi lende ni.”
15 Nyɛ Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa dimi wo cho hoo ni: “Kɔ naa wana nɔ kpaayaa wo chua, Siɛbina o cho chiɛi lemasaa chilaŋ ndo ma nyuna ndu aa,
16 ‘Yeemɛi yɛɛ ŋ nɔ yɛ o fondaŋndo hoo niŋ? Wanayɛi kuɛɛ ŋ nɔ yɛ naŋ, ma wa fondaŋ nda kumbu hoo waŋnda wo bɛɛndiaa o pouwo hoo niŋ le numpila?’ O cho fondaŋ nda cho ndu kumbɔɔ wo bɛɛndiaa o fondaŋ filioŋndo. O cho pouwo kiolɔɔ le mbo toosiaa fondaŋ pɛŋgiaa* le ndupila o pouwo niŋ.
17 ‘Num cho hoo wanachioo wo, Chɛhowa cho num biyɔɔ a kaka nduyɛ mbo viɔl num lɛŋ.
18 O cho num simbul mbo ŋɔu num peŋ, nduyɛ mbo viɔl num o lɛŋnde kpalamandaŋ ndeŋ choo maa bɔl. Loŋ ŋ cho wu ni, loŋ nyɛm num tɔɔmaŋ suaa naŋndoŋ cho wa ni, nduyɛ mi chiɛi masanɔ numndo sɔla bɛɛla tambɛilaŋ.
19 I cho num faŋa o foofo numndo, nduyɛ mi soli num o wali numndo niŋ.
20 “‘O paale leŋ choo, I cho buɛi nuu Iliaakim po Hilikaya wo veelu,
21 mi wou ndu doma num vilɛiyo, mi baa ndu kola num ipɛŋgɔɔ, okoŋ mi ke ndu kpaaya num oo nɔ wo. Nduyɛ ndu wa niŋ finyaa ni le waŋnda Chulusalɛm a yuŋgu Chuda wo.
22 I cho ndu landɔɔ kiyii chiɛi Deeve wo o choŋgu. O cho kumbi, wana nɔla niŋ mbo kinda le. Nduyɛ te o kinda pɛ, wana nɔla niŋ mbo kumbi le.
23 I cho ndu baŋɔɔ peŋ, mɛɛ nda baŋ nuaa lɔndimɛiye* yɛ, nduyɛ o cho simnɔŋ maa kpeŋgei* lemasa lebɛɛ bɛndoo le chiɛi finya ndɔ wo.
24 Bɛɛle bɛndule* chiɛi finya ndɔ wo ndoo nɔ leŋ kpou le cho wa le ndu. Wanaa fula o pulale ndɔleŋ choo wa a chuauwaa nduaa kpou cho ndu tiindaŋ, mɛɛ nda lɛɛnduu nuaa nyɛm laanduŋ pɔmbɔŋ, hɛŋgɛilaŋ, a kpɛɛnɛŋ bɛnduŋ nda toosiaa a puuloo woŋ o lɔndimɛiye yɛ.
25 “Chɛhowa, Mɛlɛka puaa chɔuwa dimi aa, ‘O paale leŋ choo, a cho lɔndimɛi nda baŋ nde suŋgɔɔ ma kelu ndi, nduyɛ mi i del. Okoŋ mi wolɔɔla wa la lɛɛndaa o lɔndimɛi keŋ ndaŋ la del, nduyɛ mi la tambu. Kanifuule, Chɛhowa pila dimi lende ni.’”
Tɛɛsiaalaŋ
^ Naapum a Chulusalɛm okɔɔ nda cho suɛi ni.
^ Naapum diomndaŋ ndaŋ la sim le mɔnɛi ɔɔ nyiɛɛye.
^ Ɔɔ “puaa kua o suaa choo wa.”
^ Ɔɔ “bɛɛndiaa.”
^ Ɔɔ “puaa kua o suaa choo wa.”
^ Hibuluiye, “naa chalaa.”
^ Ɔɔ “pɔŋtiiye.”
^ Ɔɔ “kpɛŋɛ.”
^ Hibuluiye, “Lusul.”
