Aisaya 23:1-18
-
Nyɛ dimiŋ a Taaya okɔɔ wo (1-18)
23 Nyɛ dimiŋ a Taaya okɔɔ wo cho hoo ni:
La chaŋ nya dɛndɛla kua Taasi laŋ!
Kanifuule fondaŋ dɛndɛlaŋ la simndo tambu, nduyɛ wana nɔla ma luɛi loŋ te.
Wanaa cho o lɛŋnde Kitim ndeŋ niŋnda sina niŋ a hei okɔɔ.
2 La mei doŋ nya cho haa ichali o pee mɛŋma ihɛllo kɔŋgɔ wa.
Wanaa leyulaa fula Saidɔŋ ma taŋ pee mɛŋma ihɛllo wa pei nya cha a sullo.
3 Kuluŋ fula Sihɔɔ* woŋ,Nyɛm nda kou o tanda Nail wo niŋndoŋ, a tɔnɔ ndɔɔ,Ma balu a nyɔɔŋ muŋ o peela bɔɔbɔɔ choo, nduyɛ miŋ simnuŋ tɔnɔɔ le lɛŋii cheleŋnde.
4 Siɔmbulaŋ la bii num, Oo Saidɔŋ, num cho hoo o kala kala o pee mɛŋma ihɛllo ikɛiyo,Kanifuule mɛŋma ihɛllaŋ ma dimi aa:
“Kani bɛɛ i sɔla wɔ nyɛ nɛiyaa pulii vialɛi le, nduyɛ kani bɛɛ i vilu wɔ le,Kɛlɛŋgaa niŋ te mi manda puaa feleŋguaa ɔɔ waŋ laanduaa feleŋguaa.”*
5 Mɛɛ nda tuei konaa a Ichipi okɔɔ yɛ,Waŋnda wa niŋ bɔɔ o nyɛ nɛiyaa niŋ te a tuei vɛlɛ pɛ konaa a Taaya okɔɔ.
6 La taŋ mi la kuɛ Taasi!
La chaŋ, nya wanaa cho o pee mɛŋma ihɛllo kɔŋgɔ wa!
7 Baa chiee nyaa kialu yoŋgaa le ndu chɔŋ o kandɔŋndo pa wo cho niŋ hoo ni?
Mi peluŋ ndɔŋ muŋ kuɛ a ndu le challe o fondaŋnda landaŋ ndaŋ.
8 Nɛɛnɛ kɛɛsiaa yɛ le mi hei yɔŋnuŋ Taaya,O ndoo wou waŋnda mɔsilta lemasalaŋ ndo,Mi yulaa nduaa wa ŋmasa wa,Nduyɛ mi waŋnda ndaa ke yulaa nduaa bɛɛleŋ o lɛŋndeŋ choo kpou wo?
9 Chɛhowa, Mɛlɛka puaa chɔuwa pila kɛɛsiaa hei ni,Le mbo tɛɛmbuu naŋɔɔ ndoo kialu yoŋgaa a ndu okɔɔ wo,Nduyɛ mbo tɛɛmbuu wanaa nduaa ndaa ke bɛɛleŋ o lɛŋndeŋ choo wa kpou labɛɛ.
10 Oo chua laandoo Taasi, taŋ o lɛŋnde numndeŋ niŋ mɛɛ ŋ taŋ nuaa Pioo Nail yɛ.
Fondaŋ simiaa ladɛndɛ kɛ kɛ cho lɛ le.
11 O siɛndi ba ndɔɔ o pee mɛŋma ihɛllo choo,Mbo hiiluu masɛi.
Chɛhowa dimi le ma tɛɛmbuu fondaŋnda kala kalalaŋ Foniisiaa.
12 Oo chua laandu yufuaanɔɔ Saidɔŋ,“Num cho hoo o nyɛkindilaa bɛŋgu wo, kɔl kɛndɛ numndo fuuluu o mɛɛlulaŋ.
Chɔŋ ma taŋ Kitim.
Kɛ loŋ bɛɛ, a sɔla niŋ pɛŋgi le.”
13 Tofawɔ lɛŋnde Kaadiaŋnda,
Kaadiaŋnda kila leŋ ni mi le simnuŋ fondaŋ visiaa chal o pollo niŋndo,Kɛ o cho Asiiliaŋnda le.
Ma taŋgul bandulaŋ le ndu lueiyo o piŋndo ni,Ma tɛɛmbuu bandula ndɔla kala kalalaŋ,Nduyɛ mbo simnuŋ bembelaŋ.
14 La chaŋ, nya dɛndɛla kua Taasi laŋ,Kanifuule fondaŋ kala kala nyaa tiindaŋndo sɔla tambei.
15 Chɔŋ a paale leŋ, waŋnda cho puɛɛnɔŋ a Taaya okɔɔ le wɔsilaŋ 70, wɔsila masa pilɛ chii yoomu laŋ.* Te wɔsila 70 laŋ la fuuluu pɛ o mɛɛlulaŋ, i yɔŋnuŋ niŋ a Taaya mɛɛ nda solul nuaa wana suundɛiyo chondei yɛ aa:
16 “Oo num wana lanɔ suundɛi nda puɛɛnuŋ hoo wo, chua towaa ma balu chioo,
Ma lɔɔ towa numndo nyɛkɛndɛi.Soli chondoŋ tau,Le halikpeŋ ma loonuŋ a num.”
17 Te wɔsila 70 laŋ la chuu pɛ, Chɛhowa cho vɛlɛ Taaya hɔlla mulul. O cho vɛlɛ miiŋgu paawa* ndɔɔ sɔla nduyɛ mbo hiou lachi a suundaa a masɛi kpou o lɛŋndeŋ choo.
18 Kɛ tɔnɔ ndɔɔ a paawa ndɔɔ cho simnɔŋ nyɛ diandaa le Chɛhowa. A kɛsi niŋ paawa ndɔɔ le, kanifuule o cho wa le wanaa Chɛhowa wa, le halikpeŋ ma de ma hini kɔl nduyɛ ma wounuŋ nyɛla kɛndɛ kɛndɛlaŋ.
Tɛɛsiaalaŋ
^ Koŋ cho ni, Pioo Nail lɛvii nduɛi.
^ Hibuluiye, “yufuaa.”
^ Hibuluiye, “palɛi masa pilɛ chii yoomu ve.”
^ Ɔɔ “sala.”
