Aisaya 24:1-23
24 Chɛhowa cho nyɛ o nyɛ solioo o lɛŋndeŋ niŋ, mbo wa leŋ mɛiyo pɔm.
O muli leŋ machali, mbo saŋ wanaa cho leniŋ nda kɔɔli kɔɔli.
2 Nyɛpilɔɔ kpe cho yɔŋnɔŋ a wana o wana ni:
Waŋnda a wanaa soliaa lasalaa,Buɛi piaandoo a masanɔ ndɔɔ,Buɛi laandoo a masanɔ ndɔɔ,Wana piandaa a wana pisiaa,Wana mal kuoo wo a wana bii kuoo wo,Wana mal dɔndɔɔ wo a wana bii dɔndɔɔ wo.
3 Lɛŋndeŋ le cho pɛinɔŋ mi le lo fondo fuu.A cho nyɛ o nyɛ puŋga leniŋ,Kanifuule Chɛhowa dimi lende ni.
4 Lɛŋndeŋ le cho mɔnɛi biyɔɔ,* mi le wa tambei.
Lɛŋnde yɔŋgu kɔmnde kɛndɛ leŋ ndeŋ le cho tambɔŋndo, nyɛ o nyɛ niŋ lɛ loŋ te.
Wanaa tɔɔwa o lɛŋndeŋ niŋ kpou cho nyauwo sɛɛŋ.
5 Wanaa cho o lɛŋndeŋ niŋnda chii lɛŋndeŋ tɛɛmbuu.Kanifuule a siŋga sawalaŋ,Ma miŋgi laŋ balaŋ amakɔɔ,Nduyɛ ma tɛɛmbuu kpema cho le fɛɛŋ a fɛɛŋ ndo.*
6 Le sabu koŋ lɛŋndeŋ le cho tambei ni, kanifuule sendioo cho leŋ choo,Mi tɔɔyaŋ sendioo wa wanaa cho o lɛŋndeŋ niŋnda choo.
Lelaŋ wanaa cho o lɛŋndeŋ niŋnda cho faŋaŋndo lechoo ni,Nduyɛ waŋnda nyɛɛmbuiinii koni lo niŋ loŋ ni.
7 Muɛima sɛnɛiyaŋ ma cho mɔnɛi biyɔɔ,* mi kilepiiyaŋ ma wa nyamaliaa,Nduyɛ wanaa kɔl kɛndiaa kpou cho niŋ mɔnɛi biyɔɔ o kɔltaŋ niŋ.
8 Nyɛchaa kɔl kɛndɛ wanaa tuɛi o dundula pɔmbɔlaŋ niŋndo kpou mɛɛlu,Bɔɔluu wanaa tuɛi o yelelaŋndaŋ ndo bɛɛ mɛɛlu.Nyɛchaa kɔl kɛndɛ ndaa luaa a towaa wo bɛɛ mɛɛlu.
9 Ma kol niŋ muɛiyaŋ, kɛ a tuii lɛ ichondu le.Nduyɛ muɛima nɛiyaama kala kalaŋ bɛɛ ma simnuŋ niŋ nyɛ lolɛi le wanaa kol maŋ nda.
10 Chiee simnuŋ hoo pɔmndo wo komba.Chiɛi o chiɛi fee cho o kindaa kpɔku, nduyɛ wana o wana nɔla mbo luɛi le.
11 A cho chaŋndo o nɛila bɛndulaŋ choo le muɛiyaŋ.
Nyaale ndaa duaunuŋ ndo kpou lo pɛ,Kɔl kɛndɛ wa o lɛŋndeŋ niŋndo kuɛŋnuŋ.
12 Chioo lo o tambɛi,Nduyɛ diola ndɔla kpakilaŋ kpou la yomi yomi mi la simnuŋ bembelaŋ.
13 Nuaa i cho yɔŋnɔŋ waŋnda tɛɛŋ o lɛŋndeŋ niŋ ni.
I wa niŋ ko mɛɛ waŋndo kendi nuaa ɔlifiiyaŋ mi ma lo lechoo ma pilɛŋ pilɛŋ yɛ,Vɛlɛ a mɛɛ teleŋ kendiaa makilepiiyo fuuluu nuaa o mɛɛlulaŋ, mi ma lo lechoo ma pilɛŋ pilɛŋ yɛ.
14 A cho diomnda ndalaŋ heelu choo choo,Nduyɛ ma deŋi choo choo a nyaaloo.
Chɔŋ o pee mɛŋma ihɛllo,* a wa niŋ suɛi a tɔɔmayɛi Chɛhowa ve okɔɔ.
15 Le sabu koŋ, a cho Chɛhowa saŋgala o tanda nyɛ teŋgaa.*O lɛŋii ibuŋgɛi cho o pee mɛŋma ihɛllo ve, a cho diola Chɛhowa laŋ saŋgala, Mɛlɛka Isɔluɛiya.
16 Ŋ cho chondoŋ tueiyɔɔ chɔnɔŋndo o lɛŋndeŋ mɛɛlulaŋ aa:
“Naŋɔɔ bɛndoo cho le Wana Cho Sakpo Wo!”
Kɛ mi dimi aa: “I cho tambɔŋndo! I cho tambɔŋndo!
Kpundɔɔ cho le ya! Wana hui waŋnda wo cho hiouwɔɔ lachi a waŋnda huiyo,Wana huiyaa cho waŋnda huiyo, nduyɛ mbo wa hiouwɔɔ lachi a nda huiyo.”
17 Nya wanaa cho o lɛŋndeŋ niŋnda, sɔɔŋ ŋsiooŋndoŋ, sooŋndo, a yaŋɔɔlaŋ la cho nya chumndo.
18 Wana o wana nyaanuŋ pɛ sɔɔŋ ŋsiooŋndoŋ, o cho delɔɔ o sooŋndo niŋ.Nduyɛ wana o wana fula pɛ o sooŋndo niŋ, o cho hau o yaŋɔɔleŋ.
Kanifuule mɛŋma bɛnduma cho choo choo waŋ ma cho kumbiŋ,Nduyɛ mi chiiyuŋ lɛŋndeŋ le sim choo woŋ ŋ hiiluŋ.
19 Lɛŋndeŋ le kumbiŋ,Lɛŋndeŋ le hiiluŋ,Nduyɛ lɛŋndeŋ le nyiiya woku woku.
20 Lɛŋndeŋ le yɔŋnuŋ mɛɛ wana kolaa kua naa taŋgaŋ taŋgaŋ yɛ,Le cho heeloo a tuusoo mɛɛ hueiye i mulu muluu nuaa yɛkpɔɔ yɛ.
Hakioo cho leŋ le lusulɛi choo kpiliŋ,Nduyɛ le cho delɔɔ, le nɔla lɛ niŋ mi le cheŋ te.
21 O paale leŋ choo, Chɛhowa cho puaa chɔuwaa cho o fondaŋnda filioŋ ndaŋ nda hɔlla mulul,Vɛlɛ a masaa cho o lɛŋndeŋ choo wa.
22 O cho nda chuuŋgiaa naapilɛ,Mɛɛ nda chuuŋgiaa nuaa wanaa cho o biyɔɔ niŋnda o sooŋndo niŋ yɛ,Nduyɛ mbo kinda nda kpiŋ o sooŋ koŋ niŋ.Te palɛi bɔɔbɔɔ hiou pɛ, o cho nda hɔlla mulul.
23 Chɛhowa, Mɛlɛka puaa chɔuwa o simnuŋ Masaa o Pembii Saayɔŋ Nde a o Chulusalɛm niŋ.O tosa niŋ masaleŋ a naŋɔɔ bɛndoo waŋ banaa wanaa nduaa lachi.Naŋɔɔ bɛndu masale ndɔleŋ le cho tosa hali paŋgei bɛɛ mi i kɛɛ le diondɔɔ,Nduyɛ mi paaleŋ bɛɛ le yɔŋnuŋ yim yim.
Tɛɛsiaalaŋ
^ Ɔɔ naapum, “le vesa sɛɛŋ.”
^ Ɔɔ “paandoo.”
^ Ɔɔ naapum, “ma vesa sɛɛŋ.”
^ Ɔɔ “ba paaleŋ le del lo.”
^ Ɔɔ “ba paaleŋ le chaŋ ndo.”
