Aisaya 25:1-12
25 Oo Chɛhowa, num cho Mɛlɛka nuu ni.
Num ya saŋgala ni, mi saŋgala diola numndaŋ,Kanifuule a tosa sɔɔŋ kɔndɔfilloŋ.Sɔɔŋ ŋ kɛɛsiaa sindɛ pa le tosaa woŋ,Ma tosa muŋ nduyɛ ma chɔm maa a cho wana wana nɔla ma tiindaŋ.
2 A siiŋguu chioo pouta bembelaŋ,Nduyɛ ma tosa mi chiee nda taŋgul o kala kala wo sɔla tambei.
Fondaŋ kala kala mialla ndaa viaŋnuŋ ndo o cho lɛ le,Nduyɛ fɛɛŋ bɛɛ o miiŋgu lɛ niŋ taŋgulɔŋ te.
3 Le sabu koŋ wanaa dialuŋ kalaa cho num bɛɛleŋ ke ni,Nduyɛ mi wanaa dɛnɛ wɔɔŋnda o lɛŋnde niŋ nɔ siooŋnde le num.
4 Kanifuule a simnuŋ naa viaŋnaŋaa kala kalaa le wanaa nɔ sɔla bɔɔ le wa,Naa viaŋnaŋaa kala kalaa le wanaa bala fonduaa cho o nyɛkindilaa niŋnda,Naa viaŋnaŋnda a teleŋ hueiyii bɛndu bɛnduei wa hɔŋndo wo,A wunduleŋ te paaleŋ le wa fulaa pɛ.
Te yaamɔɔwa hinul naa pɛ mɛɛ hueiyii fuku fukuei i kuaŋ nuaa kpakioo yɛ,
5 Vɛlɛ a mɛɛ haŋgullo wa nuaa o lɛŋnde vesɛileŋ niŋ yɛ,Ma tosa mi wooluŋ wooluŋ nda wa koŋ ndo mei kpili.
Mɛɛ yumbu yumbu ikpuŋgbaa tosa nuaa mi haŋgullo pɔlul lɛ,Lende ŋ tosa ni mi yaamɔɔwaa naa mei chondoŋ.
6 O pembei hei choo, Chɛhowa, Mɛlɛka puaa chɔuwa cho bɔŋaŋ diaa nyɛdiaa tosa,Le waŋnda kpou.Muɛima kɛndɛ kɛndiaŋ* ma cho wa o bɔŋaŋ diaa nyɛdiaa hoo,Visioŋ cho wa ŋ piaa cha o nyɛdiaa kɛndɛ kɛndɔɔ niŋ,A muɛima kɛndɛ kɛndɛma nda yuei yaŋ.
7 O cho kola waaŋgaa kumbu waŋnda kpou wo tɛɛmbuu* o pembei hei choo,Vɛlɛ a kola* simbul lɛŋnde kpou wo.
8 O cho piɔmndo miolɔɔ* le fɛɛŋ a fɛɛŋ,Nduyɛ Chɛhowa, Mɛlɛka Kpuluŋguma Bɛndoo cho waŋnda kpou mɛmiaŋ wɔɔsuu o hɔl fo.
Bɛɛla tambɛila wanaa nduaa sɔla o lɛŋndeŋ choo laŋ kpou, o cho laŋ faŋa.Kanifuule, Chɛhowa pila dimi lende ni.
9 O paale leŋ choo, a cho dimi aa:
“Mɛlɛka naa cho hoo ni!
Ŋ nɔ tiindaŋndo o ndu niŋ,Nduyɛ o cho naa piŋi.
Chɛhowa cho hoo ni!
Ŋ nɔ tiindaŋndo o ndu niŋ.
Ŋ waŋnuŋ a kɔl kɛndɛ miŋ dɔɔnuŋ nyaale le piŋi o cho naa wo.”
10 Kanifuule ba Chɛhowa wo cho wa o pembei hei choo,Nduyɛ ma niɔu niɔu Mowaabi o fondaŋ ndɔɔ,Mɛɛ nda niɔu niɔu nuaa billo mbo simnuŋ nyɛ nɛŋi tɔlɔɔlaŋ ndo yɛ.
11 O cho ba ndɔɔ siɛndi nduyɛ mbo lɔɔ Mowaabi,Mɛɛ wana saanaa luaa nuaa mɛŋndaŋ a bala ndɔlaŋ te o wa pɛ saanaa yɛ.O cho bala ndɔlaŋ soliŋ kpeku o nɛi chaa niŋ,Mbo tusi yoŋga ndɔɔ toolo.
12 O cho chiee nya cho o taŋgulaa o kala kala wo piɔlɔɔ,Nduyɛ mbo pɛl vɛlɛ kpakila ndɔla vilɛilaŋ.O cho ndu piɔlɔɔ mbo fuuluu lɛŋ di, okoŋ mbo simnuŋ chundoo.
Tɛɛsiaalaŋ
^ Ɔɔ “Muɛima nɔ kiiyo lebɛŋgu waŋ.”
^ Hibuluiye, “miolɔɔ.”
^ Ɔɔ “kola waaŋgaa.”
^ Ɔɔ “tɛɛmbuu.”
