Aisaya 26:1-21
26 O paale leŋ choo, waŋnda cho chondei hei soli o lɛŋnde Chuda leŋ niŋ aa:
“Ŋ nɔ chiee kala kalaa.
Nduyɛ, piŋi o piŋi naa wo cho ko maa kpaki kala kala balu chioo wo.
2 Kumbi diola kpakilaŋ le mi kaale cho sakpo leŋ le luɛi,Kaale cho hiouwɔɔ lachi a lo lechoo wo chɔmndo leŋ.
3 Wanaa dɔu tiindaŋ ndaa kpou o num niŋnda,* a cho nda manda.A cho hiouwɔɔ lachi a nda kɔl nyuloo kioo,Kanifuule o num niŋ nda tiindaŋ ni.
4 Dɔu tiindaŋndo o Chɛhowa niŋ le fɛɛŋ a fɛɛŋ,Kanifuule Pou Kpoowa cho le fɛɛŋ a fɛɛŋ ndo Chɛhowa cho ni.
5 O tusi wanaa cho ichali o chiee cho filioŋndo niŋnda toolo.
O tusi chioo hoo toolo,Mbo tusi ndu lɛŋ mɛ mɛ,Nduyɛ mbo fuuluu haaa o chundoo niŋ.
6 Pelei cho ndu niɔu niɔu,Peluŋ wanaa nda tusi nyɛpalaa choo wa, a peluŋ wanaa nɔ sɔla bɔɔ le wa.”
7 Nɛi wana cho sakpo wo cho sakpo.*
Le mɛɛ num Mɛlɛka cho wana sakpoo yɛ,A cho kpɔkɔsila cho o nɛi wana cho sakpo wo choo laŋ faaŋiaa.
8 Oo Chɛhowa, te ŋ tol pɛ nɛi numndo kɔɔli a mɛɛ ŋ kialu yamaŋ yɛ,Ŋ cho nɔ tiindaŋndo o num niŋ.
Ŋ che bɔɔ diola numndaŋ la sɔvɛ, nduyɛ yeemɛi cho naa bɔɔ le miŋ wa laŋ loonɔŋndo.
9 Ichɔl pii pii I lɔl yiyaŋndo a num okɔɔ a kɔl nuu kpou.A tonya, yeemɛi cho ya tau le mi hiou lachi a num nuuviaa.Kanifuule te a kilul pɛ lɛŋndeŋ ndeŋ yamɛi,Mi wanaa cho leniŋ nda pɛɛku a sakpoyɛi okɔɔ.
10 O yɔŋ bɛɛ ma tuiinuŋ wana dɛnɛ wɔɔŋndo inyiɛɛ,O nɔla mbo pɛɛku a sakpoyɛi okɔɔ le.
O yɔŋ bɛɛ mbo wa o lɛŋnde wanaa cho sakpo wa niŋ, o mel dɛnɛ wɔɔŋndo tosaa le,Nduyɛ o nɔla mbo che tɔɔmayɛi Chɛhowa ve le.
11 Oo Chɛhowa, a heelu ba numndo, kɛ a chi ndu le.
A cho chɔ sɛmbɛ ŋ nɔ le wanaa numnda wo, nduyɛ mi siɔmbulaŋ la bii nda.
A tonya, yiŋnde cho le yaamɔɔwaa numnda leŋ le cho nda tɛɛmbuu.
12 Oo Chɛhowa, a cho naa ke kɔl nyuloo,Kanifuule nyɛ o nyɛ naŋ tosa,Num mala naa ni miŋ sɔla batiuwaa.
13 Oo Chɛhowa Mɛlɛka naa, masaa cheleŋ keeku naa choo o fulawɔ o num kɔɔli,Kɛ num pilɛ kpe naŋ suaa a diola numndaŋ okɔɔ ni.
14 A cho niŋ a vilɛiya, nduyɛ a cho lɛ miiŋgu yoomu le.
A nɔ lɛ kpaaya kposoŋ te, nduyɛ a cho lɛ miiŋgu yoomu le.
Kanifuule a muli hɔlla o nda lo,Le nda tɛɛmbuuwo, nduyɛ ma tosa wana o wana suu lɛ a nda okɔɔ le.
15 Oo Chɛhowa, a tosa mi kaaleŋ le kui.A tosa mi le chɔɔlu kui.A tosa ma chɔɔlu bɛɛleŋ sɔla.
A chɔɔlu pɛŋgula lelɛŋndaŋ kpou kumbi.
16 Oo Chɛhowa, teleŋ nda wa o nyɛpalaa niŋndo, ma muliŋ naa num chua.Ma piɛi o numndo a kɔl ndaa kpou toolo toolo te a tusi nda pɛ nyɛpalaa choo.
17 Oo Chɛhowa, mɛɛ pulii vialɛi wa nuaa wana folioo* nɛiyo a teleŋ vialaa yɛ,Mbo wa o nyɛ nɛiyaa koŋ niŋ nduyɛ mbo wa chaŋndo yɛ,Lende ŋ tosa ni mi naa bɛɛ wa.
18 Ŋ wa a folioo, miŋ wa o nyɛ nɛiyaa niŋ mɛɛ pulii vialɛi i bii nuaa wana folioo yɛ,Kɛ mi i yɔŋnuŋ naŋ chaa hueiyii fonduei naŋ velu ni.
Ŋ nɔla miŋ tosa mi lɛŋndeŋ ndeŋ le sɔla pioŋɔɔ le,Nduyɛ ŋ vilu wana o wana mbo wa o lɛŋndeŋ ndeŋ niŋ te.
19 “Wanaa nyaa vilɛiya cho miiŋgu yoomu.
Dialuŋ vilɛi wanaa niaa* cho miiŋgu yoomu.
Nya cho o chundoo niŋnda,La tiondu mi la deŋi a nyaaloo.
Kanifuule, mɔm nyaa cho wa maa mɔm tual idii yo.*Nduyɛ lɛŋndeŋ le cho wanaa cho a vilɛiya malɔɔ ma miiŋgu yoomu.*
20 La kɔ wanaa niaa, mi la luɛi o lumuila nyalaŋ niŋ di,Mi la kiindiaŋ diolaŋ kɔɔli.
La vioŋnuŋ ndoŋ le teleŋ biŋgi,Haaa mi kɔl tuu Mɛlɛkaa hiou.
21 Kanifuule Chɛhowa cho chɔnɔŋndo o fondaŋ ndɔɔ mbo wa hunɔɔ,Le mbo kilul wanaa cho o lɛŋndeŋ choo wa yamɛi le yɔŋnda ndala wɔɔŋndaŋ.Lɛŋndeŋ le cho chɔɔmuu kooma sɔla tambei yaŋ,Nduyɛ le viŋ lɛ niŋ wana o wana nda dii le.”
Tɛɛsiaalaŋ
^ Ɔɔ naapum, “Wanaa feŋaŋ o yiyaŋ ndaa choo le wa.”
^ Ɔɔ “tɛlɛlɛ.”
^ Ɔɔ “yollo.”
^ Hibuluiye, “Dialuŋ niŋ vilɛiyoŋ.”
^ Ɔɔ naapum, “mɔm chuchu o tɔlɔɔlaŋ choo wo.”
^ Ɔɔ “le cho violɔɔ wanaa cho a vilɛiya.”
