Aisaya 27:1-13
27 O paale leŋ choo, Chɛhowa cho chua muɛi nduɛi luɛiyɛi kpaayɛi bɛnduei,Mbo tusi Liviaataŋ* nyɛpalaa choo, kɛu choŋnuŋ chuluku chuluku,Mbo wa vɛlɛ kɛu kuaŋnuŋ kɔŋgɔdi kɔŋgɔdi wo,Nduyɛ mbo dii visi bɛndu cho o pee mɛŋma ihɛllo niŋndo.
2 O paale leŋ choo, la solul ndu* chondei hei aa:
“Kpele makilepii muɛima kɔfuaŋ ŋ cho ni!
3 Ya Chɛhowa, ya cho ndu mandaa ni.
Teleŋ o teleŋ I cho ndu pɔɔliaa.
I cho ndu mandaa paaleŋ a nyumndaŋ,Le halikpeŋ wana o wana tosal ndu suɛi wɔɔŋ te.
4 I cho lɛ a kɔl tuu le.
Nɛɛnɛ nɔla yɛ mbo simul la a bil cho a yɔɔŋ mɔndɔ mɔndɔ wo o chɔuwo niŋ?
I cho ndu niɔu niɔu nduyɛ mi mal ndu o yiŋ.
5 Lelaŋ, o huŋ naa ya chua le mbo veŋnuŋ.
O tosa kɔl nyuloo a ya,O huŋ le miŋ wa o kɔl nyulu niŋ.”
6 O palɛi cho hunɔɔ ve niŋ, Chekɔpu cho puundoŋ wulɔɔ,Mi Isɔluɛi soli lɛuve nduyɛ mbo soli peeŋgelaŋ,Wanaa cho fula o pulale Chekɔpu leŋ choo wa cho lɛŋndeŋ pei cha a komɔɔlaŋ.
7 Baa a nɔ pa ma lɔɔ nda a sioŋnde wana cho nda lɔɔ leŋ?
Baa a nɔ pa ma sɔla piɔmndo mɛɛ wanaa ndaa sɔla piɔmndo yɛ?
8 A chaŋndo ŋ cho sɔŋga a ndu ni nduyɛ ma tou ndu.
A hueiyii fuku fukuei o cho ndu touwɔɔ ni. I wa niŋ ko maa hueiyii fuku fukuei ba paaleŋ le chaŋ ndo.
9 O nɛiyo hoo choo Chekɔpu cho malɔɔ hakioo sɔla ni le haki ndɔɔ.Nduyɛ, kɔmnde ndɔleŋ kpou le cho wa leŋ ni te haki ndɔɔ faŋaŋ pɛ:
O cho tosa mi pouta bandu luamaa lasalaa kpou simnuŋ,Mɛɛ nda chuii nuaa pouta vilɛilaŋ yɛ.Nduyɛ suŋgbule iyɔm* kɛ kɛ, ɔɔ bandu luamaa nyɛm chuŋ kɛndɛ kɛ kɛ cho lo le.
10 Kanifuule, chiee nda taŋgul o kala kala wo cho lo pɔm.Waŋnda cho malɔɔ fondaŋnda chɔluaa dia laŋ mi la simnuŋ lɛŋnde polteŋ.
Loŋ nauwa a wa niŋ diolaŋ ni ma hiniŋ,Nduyɛ ma wa lɛuwuŋ yɔmnde dioo.
11 Te lɛuwuŋ ndɔŋ vesa pɛ,Waŋ laanduaa cho hunɔɔ ma yimi muŋ,Le yiŋndeŋ kiisuuwo a muŋ.
Kanifuule, waŋnda haa nɔ sinapɛŋgu le.
Le sabu koŋ Wana Toosiaa nda wo cho nda inyiɛɛ tuiinɔŋ te.Nduyɛ Wana Toosiaa nda wo cho nɔ iyeema o nda niŋ te.
12 Nya waŋnda Isɔluɛi, o paale leŋ choo, mɛɛ waŋndo hiiluu nuaa tɔlɔɔ mi komɔɔ ndɔɔ deli nduyɛ mbo wa maŋ chɔuviaa ma pilɛŋ pilɛŋ yɛ, Chɛhowa cho nya chuuŋgiaa nya cho a saŋnaŋ chɔŋ o Pee Bɛndoo* mbo kua o Kpoloŋndo* Ichipi.
13 O paale leŋ choo, a cho bulu bɛndoo hɔŋ. Nduyɛ wanaa cho tambei sɔlaa o lɛŋnde Asiiliaa leŋ niŋnda, a wanaa cho a sɛŋiaŋ o lɛŋnde Ichipi leŋ niŋnda cho hunɔɔ ma beŋ Chɛhowa wulaŋ o pembii diandɛi choo Chulusalɛm.
Tɛɛsiaalaŋ
^ Tofa Tɛɛsiaa.
^ Naapum a Isɔluɛi nda cho suɛi okɔɔ ni, ma tuu ndu a kpele makilepiiyo.
^ Tofa Tɛɛsiaa.
^ Koŋ cho ni, Yufiluaati.
^ Tofa Tɛɛsiaa.
