Aisaya 29:1-24
29 “Kpundɔɔ cho le Aluɛɛ,* Aluɛɛ chiee Deeve wa o dɔɔŋgɔɔ niŋndo!
Hiou lachi a bɔŋaŋndaŋ biyɔɔ,Wa hei tosaa iwɔsi o iwɔsi.
2 Kɛ I cho Aluɛɛ nyɛpalaa tusi choo,Mɔnɛi a chaŋnda imɔnɔlaŋ la cho wa loŋ.Nduyɛ, o cho simnɔŋ maa fondaŋ kpeekpei nda luam salalaŋ o bandu luamaa lasala Mɛlɛkaa choo wo.
3 I cho num balɔɔ a dɔɔŋgɔlaŋ silɔ, le num chiŋalaŋndo,Mi balu kpakioo taŋgullo silɔ le num lueiyo o piŋndo niŋ,Nduyɛ mi simi kpakila kala kalalaŋ le num chiŋalaŋndo.
4 A cho tolɔɔ toolo, nduyɛ mi siɔmbulaŋ la bii num.Lɛŋ ŋ cho niŋ wa ni ma soo.Chundoo cho tosa wana tui lɛ niŋ nyɛ ŋ cho wa dimioo wo le.
Lɛŋ diom numndo cho niŋ wa fulaa ni,Maa diom wana ŋwaŋvilɛi.Nduyɛ chundoo cho tosa mi diom numndo wa fulaa toolo toolo.
5 Faŋga bɛndu yaamɔɔwaa* numnda wa niŋ ko maa chundu,Nduyɛ mi faŋga bɛndu wanaa kɔl vesɛiya wa mɛɛ hueiye kuaŋnuŋ nuaa a fueende yɛ.
O lepilɛ niŋ kpe hei cho yɔŋnɔŋ ni.
6 Chɛhowa, Mɛlɛka puaa chɔuwa cho hɔlaa nduaa muli o numndo,A taŋndaŋ, lɛŋnde nyiiyaa leŋ, bɔɔluu bɛndu bɛndoo,Hueiyii bɛnduei, hueiyii fuku fukuii huŋ a taŋndaŋ kɔɔli ve, vɛlɛ a yiŋnde wule wule bɛndu leŋ.”
7 Faŋga bɛndu cho fula o lɛŋnde niŋ kpou le Aluɛɛ chiŋalaŋndo a sɔŋgɔɔ wo,Wana o wana cho ndu chiŋalaŋndo a sɔŋgɔɔ,Bandula vilɛila nda cho simi le ndu lueiyo o piŋndo niŋndaŋ,Vɛlɛ a wana o wana cho ndu nyɛpalaa tusi choo,Muŋ kpou cho simnɔŋ maa lɔma sɔlaa, yilaŋii wana cha a nyumndaŋ nde.
8 A tonya, i wa niŋ ko mɛɛ waŋndo wa nuaa a yiaaŋ mbo sɔl luaŋ mbo wa nyɛdiaa dioo yɛ,Kɛ te o chɛŋ pɛ, yiaaŋ ma wa ndu nɛiyo.Nduyɛ i wa niŋ ko mɛɛ waŋndo wa nuaa a bolola vesɛilaŋ mbo sɔl luaŋ okoŋ mbo wa kolɔɔ yɛ,Kɛ te o chɛŋ pɛ, o wa o saŋgɛiyo nduyɛ mbo wa wɔ a bolola vesɛilaŋ.
Lende i cho yɔŋnɔŋ a faŋga bɛndu fula o lɛŋnde niŋ kpou,Le Pembii Saayɔŋ Nde chiŋalaŋndo a sɔŋgɔɔ wo ni.
9 La sim yi mi kɔndɔfillo bii nya,La suumiaa nyapila nduyɛ mi la simnuŋ a sumɛi.
A cho yiŋgi yiŋgi, kɛ o cho a mamuɛi le.A cho kɔlaŋ taŋgaŋ taŋgaŋ, kɛ a kol muɛima nɛiyaa le.
10 Kanifuule, Chɛhowa tosa mi la hiaunuŋ o luaŋ yikpi.Nya wanaa suaa le Mɛlɛka wa, o kinda nya hɔltaŋ,Nduyɛ mbo kumbu nya wanaa cha yilaŋndoŋ nda bolle.
11 Yilaŋii kɛ kɛ simnuŋ le nya maa diomnda cho o yau cho o kindaa kpɔku wo niŋ. Te a ke pɛ wana chaa diomndaŋ veeloo wo, ma dimul ndu aa: “Yandii veelul naa diomndaŋ choo choo,” o cho dimi aa: “I nɔla le, kanifuule o cho o kindaa.”
12 Nduyɛ te a ke pɛ wana chiee diomndaŋ veelu le wo yauwo hoo, ma dimul ndu aa: “Yandii veelul naa diomndaŋ,” o cho dimi aa: “I chiee diomndaŋ veelu kposoŋ te.”
13 Chɛhowa dimi aa: “A lasondo waŋnda haa cho hunɔɔ naa ya chua ni,Nduyɛ ma ke ya bɛɛleŋ a chɔchɔŋ ndaŋ,Kɛ kɔlta ndalaŋ la choŋnuŋ landaŋ a ya.Siooŋii nda nɔ le ya ve tɔlnuŋ o sawala waŋnda chieeya pɛɛku nda laŋ choo.
14 Lelaŋ, I cho sɔɔŋ kɔndɔfiliŋ bɛndoŋ tosa waŋnda haa tɛɛŋ,Sɔɔŋ kaamaŋ bɛndu bɛndoŋ.Sɔɔŋ taasiŋ wanaa ndaa taasiaa cho tambu,Nduyɛ mi sinapɛŋgu wanaa ndaa taasiaa lo pɛ.”
15 Kpundɔɔ cho le wanaa kindiŋ le Chɛhowa tuula* ndala dɛnɛ wɔɔŋndaŋ viŋndo wa.
O nyumndaŋ niŋ nda tosa sɔɔŋ ndaŋ ni,Ma dimi aa: “Nɛɛnɛ cho yɛ naa chɔɔ?
Nɛɛnɛ sina yɛ a naa okɔɔ?”
16 Nuawɔ se mɛɛ nya tundu tunduu sɔɔŋ* yɛ!
Baa ŋ nɔ pa miŋ che wana chuau kpɛɛnɛi puuluei yo a puulu o chɔu kpɛɛnɛi yo nyɛ pilɛ kpe?
Baa nyɛ nda toosiaa wo dimi pa a wana toosiaa ndu wo okɔɔ aa:
“O cho ndu le toosiaa ya le”?
Nduyɛ baa nyɛ nda chɔuwo dimi pa a wana chɔu ndu wo okɔɔ aa:
“O chɔm sinapɛŋgu le”?
17 O teleŋ biŋgi bɛŋgu, Lebanɔŋ cho simnɔŋ yɔmii kuamɛi,Nduyɛ yɔmii kuamɛi hei wa niŋ ko naŋ chaa bundɔɔ ni.
18 O paale leŋ choo, wanaa nila baŋulɛiya tuɛi niŋ diomnda cho o yauwo hoo niŋndaŋ,Nduyɛ mi wanaa sumɛiya wa chɔɔ o nyumma bɛndu bɛnduaŋ niŋ.
19 Wanaa tusiaŋnda wa niŋ a nyaale bɛndoo le Chɛhowa,Nduyɛ mi wanaa bala fonduaa waŋnda tɛɛŋ wa a nyaale le Wana Diandaa Isɔluɛi.
20 Kanifuule wana kɔl vesɛi cho lɛ wa le.Wana saŋgalaŋndo bɛɛ, mɛɛlula ndɔlaŋ la cho fuuluu,Nduyɛ, wanaa wa lahɔl teleŋ o teleŋ le sɔɔŋ kpundɔŋ tosaa wa kpou cho tambei sɔla.
21 Wanaa hɛɛnduu acheleŋnda sɔɔŋ lachoowaŋ choo wa,Ma yaŋ yaŋɔɔlaŋ le wana soli tonyaa o suɛi niŋ o dio kpaki chioo wo,Nduyɛ ma hiŋ a diomnda hiŋaŋnda fondolaŋ le kiɔɔ wana cho sakpo wo di ndɔɔ kioo.
22 Chɛhowa, wana piŋi Ebilaham ndo, nyɛ o dimi a yuŋgu Chekɔpu wo okɔɔ wo cho hoo ni:
“Siɔmbula cho lɛ Chekɔpu biyɔɔ le,Nduyɛ wana chi lɛ ndu niŋ kɔl tambɛi o hɔl te.*
23 Te Chekɔpu che pɛ chuauwaa nduaa ndu a balaa silɔ,A cho wali ya tosa a bala nilaŋ ndo,A cho tosa mi diola nilaŋ la wa la diandaa.A tonya, a cho tosa mi Wana Diandaa le Chekɔpu wa o diandaa,Nduyɛ a cho lasisi a siooŋnde le Mɛlɛka Isɔluɛiya.
24 Wanaa laasiaŋ o yiyaŋnda ndalaŋ niŋnda cho sinapɛŋgoo sɔla,Nduyɛ mi wanaa ŋɔɔchiaŋ nda chɛl nɛi chɔmaa.”
Tɛɛsiaalaŋ
^ Naapum o sim “Fondaŋ Luamaa Lasalaa o Bandu Luamaa Lasala Mɛlɛkaa,” naapum a Chulusalɛm okɔɔ nda cho suɛi ni.
^ Hibuluiye, “mialaa.”
^ Ɔɔ “kɛɛsiaala.”
^ Ɔɔ “tundu tunduŋ.”
^ Koŋ cho ni, o sɔla lɛ niŋ bɛɛla tambɛi mbo tambu kɔl te.
