Aisaya 3:1-26
3 Mala kɛ kɛ Chulusalɛm a Chuda wa sɔlaa,Chɛhowa, Mɛlɛka puaa chɔuwa, Masanɔ tonyaa cho tosa a sɔla lɛ ndu le.Ndu cho ni, nyɛdiaa* a mɛŋndaŋ,
2 Wanaa mayoomuaa a kuubaa chɔuwa,Wanaa kialaa ŋyamaa a wanaa suaa le Mɛlɛka wa, wanaa viamaa layawaa a waŋ banaa,
3 Masaa cho waŋnda 50 bolle wa, laŋgbaa kalla a wanaa silaa,Wanaa chaa maŋgalaa tau wa a wanaa duau kɛuwa o mandaa bɛŋgu wa.
4 I cho tosa mi puaambuaa wa laŋgbaa ndaa kalla,Nduyɛ mi wanaa cho yoloma yoloma wa simnuŋ masaa ndaa.
5 Waŋnda cho wa sɔɔŋ palaŋ tosalaŋndo vellaa velle,Mi wana o wana tosal chaaŋ ndɔ iwɔɔŋnde.
Poombɔ pɔmbɔɔ cho kaasoŋnɔɔ simul,Nduyɛ mi wanaa fonduaa kɛɛ bɛɛleŋ chɔmndo le wanaa waŋnda nɔ bɛɛleŋ le nda wa.
6 Wana o wana cho wanayɛi nduɛi o chiɛi finya ndɔ wo niŋ baa saa, mbo dimul ndu aa:
“Doma bɛndoo cho num o ba, lelaŋ wa masa naa.
Fonda simnuŋ hoo bembelaŋ ndo, num cho ndu chilaŋ ni.”
7 Kɛ o cho kɛɛ o paaleleŋ choo mbo dimi aa:
“O cho ya le cho wa nya pauve yiu yiu le.*I nɔ nyɛdiaa ɔɔ nyɛla chuɛɛnaŋ o ya lo chiɛiniŋ te.
Lelaŋ, siiŋguu ya masaa waŋnda choo le.”
8 Kanifuule Chulusalɛm komba,Nduyɛ mi Chuda del.A cho Chɛhowa simullo o nyɛ nda dimi wo niŋ vɛlɛ a sɔɔŋ nda tosa woŋ.A cho tɔɔmayɛi nduɛi simullo.
9 A cho hei chɔmndo kpendekele a mɛɛ nda tosa hɔlaa ndaa yɛ,Nduyɛ ma soo a haki ndaa okɔɔ kpendekele maa waŋnda Sodɔm,A kindiŋ pɛŋ le ndu vioŋɔɔ le.
Kpundɔɔ cho le nda, kanifuule ndapila cho dɛnɛ palaa veelɔŋndo choo!
10 La dimul wanaa cho sakpo wa maa sɔɔŋ cho wa nyɛkɛndɛi a nda,Nduyɛ maa a cho fandaa sɔla le nyɛ nda tosa wo.*
11 Kpundɔɔ cho le wana dɛnɛ wɔɔŋndo!
Dɛnɛ palaa cho ndu tolɔɔ choo,Kanifuule nyɛ bala ndɔlaŋ la tosal acheleŋnda wo, nyɛ pilɛ koŋ kpe cho ndu yɔŋnɔŋ ni.
12 Le wanaa niaa nda, wanaa cho wanaa walla chilaŋnda cho nda siɔmbulaŋ tusioo,Nduyɛ mi waŋ laanduaa wa nda choo ŋmasa.
Wanaa niaa, wanaa cho nya chilaŋnda cho tosaa mi la wa heeloo a tuusoo,La sina nɛi nya nɔ mi la kuɛ choo wo le.
13 Chɛhowa cho bɛɛndiaŋndo le kɔɔsɔɔ.O cho o bɛɛndiaŋndo le yamɛi kiolɔɔ.
14 Chɛhowa cho kɔɔsa a waŋ banaa, vɛlɛ a laŋgbaa kalla wanaa nduaa tɛɛŋ.
“La lom kpelela makilepiilaŋ,Nduyɛ nyɛm wanaa bala fonduaa nya chiimbuu woŋ, ŋ cho o chiɛila nyalaŋ niŋ.”
15 Chɛhowa, Mɛlɛka Kpuluŋguma Bɛndoo, o cho Mɛlɛka puaa chɔuwa wo dimi aa:“Yɛɛ hel lɛ nya mi la wa wanaa niaa tɛɛmbuuwo nduyɛ mi la chuka wanaa bala fonduaa hɔlla o chundoo niŋ?”
16 Mi Chɛhowa hiau lachi a dimioo aa: “Le mɛɛ chuaa laanduaa Saayɔŋ simnuŋ wanaa heelaŋ,Ma wa balɔɔ a hɔlla nda choo choo pɔ,*Ma kpeeŋiaa waŋnda yeemɛi a hɔlta ndalaŋ, ma kua a yimiŋndo,Mi kelaŋ cho nda ŋ bayiaa o ŋpelu woŋ kua a chomullo yɛ,
17 Chɛhowa bɛɛ cho chuaa laanduaa Saayɔŋ naa hulɔɔ o lebol mi kawalaŋ la deli nda.Nduyɛ Chɛhowa cho tosa mi tembeltaŋ la deli nda.
18 O paale leŋ choo, Chɛhowa cho nyɛm kɛndɛ kɛndɛŋ nda chuɛɛnuŋ ndoŋ poondiaa nda o laba.Kelaŋ labaŋ, nyɛm nda saa yiinde woŋ, nyɛm kɛvɛlɛŋ cho ŋ tuunduɛi maa wɔlɔtɔ woŋ,
19 Kelaŋ lanioŋ, kelaŋ cheleŋ nda wounuŋ o laba woŋ, kolala waaŋgaa laŋ,
20 Nyɛm nda handuŋ o lebol loŋ, kelaŋ nda wounuŋ o ŋpelu woŋ, nyɛla nda kumbu mɛɛyaŋ ndaŋ,Nyɛla nda wou chuɛima chuŋ kɛndiaŋ ndaŋ, nyɛm kɛvɛlɔŋ,
21 Kelaŋ sooŋ, kelaŋ nda wounuŋ o miliŋ ndoŋ,
22 Domala vilɛila nda wounuŋ o dunyaŋ choo laŋ, domala wuŋgbaŋ ndaŋ, domala bɛndulaŋ, bɔlɔla pɔmbɔla waŋ laanduaa bii o laba laŋ,
23 Tofaŋnda pɔmbɔlaŋ, domala lebɛŋgu laŋ,Mɔsiltaŋ, vɛlɛ a kolala waaŋgaa laŋ.
24 Yɔŋii chuɛima baasam ndaŋ ma wa nda chuŋndo fulaa lekɔɔ yɛ, chuŋ wɔɔŋndo cho nda fulaa lekɔɔ ni.Yɔŋii nda yiinuŋ yauleŋ yɛ, yooleŋ nda cho yiinɔŋ ni.Yɔŋii mi yiiŋii kɛndɛi wa nda o lebol lɛ, tembeltaŋ la cho nda delɔɔ ni.Yɔŋii nda wounuŋ nyɛla baa kalalaŋ yɛ, nyɛla labɛkilaŋ nda cho wounɔŋ ni.Nduyɛ tindilaŋ la cho nda wa o dialloŋ, mi naŋɔɔ ndaa lo.
25 A cho puaa nyaa diu diu a muɛi faŋnde,Nduyɛ ma diu puaa nyaa dialuŋ kalaa o chɔuwo.
26 Fondaŋnda ndɔla waŋnda luɛi laŋ la cho mɔnɛi biyɔɔ, mi la koŋul a chaŋndo.O cho hunɔɔ ichali lɛŋ wɔyɔŋ a dɛnɛ palaa cho ndu komal lo.”
Tɛɛsiaalaŋ
^ Hibuluiye, “beediiyo ɔɔ buloo.”
^ Ɔɔ “wana nya chiɔuwaa le.”
^ Hibuluiye, “a cho kɔmnde sɔɔŋ nda tosa woŋ dio.”
^ Hibuluiye, “a kɛsoŋ nda ŋ siɛndiaa.”
