Aisaya 30:1-33
30 Chɛhowa dimi aa: “Kpundɔɔ cho le chuauwaa bolii kalaa haa.A cho kɛɛsiaalaŋ tosaa kɛ o cho kɛɛsiaala ni le,Ma wa kpemalaŋ yiiyo, kɛ o cho hɛnaŋ ni le,*Le halikpeŋ ma chɔɔlu hakioo o hakioo choo.
2 A nyuna ya le ma kuɛ Ichipi,Le kɔlaŋ vioŋnɔŋndo Feloo o ba bɛŋgu le nda mandaa,*A le kɔlaŋ naa viaŋnaŋnda nuuviaa o wundule Ichipi leŋ bɛŋgu.
3 Kɛ tiindaŋ nya dɔu o Feloo niŋ le nya mandaa wo cho simnɔŋ suɛi lasiɔmbu,Nduyɛ mi fondaŋ viaŋnaŋndo o wundule Ichipi leŋ bɛŋgu simnuŋ suɛi bɛɛla tambɛi le nya.
4 Kanifuule laŋgbaa nduaa kalla kpou choŋnuŋ Sowaŋ,Nduyɛ wanaa nduaa viamaa fuuluu niŋ Hanɛsi.
5 Siɔmbulaŋ la cho wana o wana biyɔɔ le Ichipiaŋnda,Kanifuule wana sɔla tɔnɔ o tɔnɔ nda o ŋdial te.Wana sɔla nda mala o ba le, nduyɛ a chuu wana tɔnɔ le,Mɛɛ siɔmbulaŋ a bɛɛla tambɛilaŋ.”
6 Visiaa yonduaa cho ba tou wo wa, nyɛ dimiŋ a nda okɔɔ wo cho hoo ni:
Ma keeku o lɛŋnde nyɛpalaa a saŋgaa cho leŋ niŋ,Lɛŋnde kpɔkuŋnda* cho pɛɛliaa leŋ,Lɛŋnde hɔɔluaa a kɛuwaa leyiŋaa wɔɔŋ wɔɔŋaa huulu wa cho leŋ niŋ,Le kɔlaŋ a sulta ndalaŋ sofɛliaa o lakɔɔ,Vɛlɛ a nyɛm nda piɔu waŋnda woŋ nyɔɔmiaa o lakɔɔ.
Kɛ nyɔɔŋ muŋ chuu niŋ waŋnda tɔnɔ o tɔnɔ le.
7 Nyɛ fondoo fuu mala Ichipi yɔŋgu wo cho ni.
Le sabu koŋ ya veelu ndu ni aa: “Luehabi cho ichali o tosa nyɛ o nyɛ le wo.”
8 “Lelaŋ, kɔ ma kɔ poonyiaa ndu o pou yɛndɔɔ choo nda o hɔl,Nduyɛ ma hivi ndu o yauwo choo,Le mbo huŋ wa o chilaŋ niŋ,Maa sei cho le fɛɛŋ a fɛɛŋndo.
9 Kanifuule wanaa nila kaluaa nda cho ni, chuauwaa huiyaa,A nɔ iyeema le sawala* Chɛhowa laŋ tueiyɔɔ le wa.
10 Ma dimul wanaa cha wa aa: ‘La cha nyɛ o nyɛ le,’
Nduyɛ ma dimul wanaa cha yilaŋndoŋ nda aa: ‘La dimul naa yilaŋuŋ tonyaŋ te.
La dimul naa sɔɔŋ nɛŋi naa kɔllo woŋ,* vɛlɛ a yilaŋuŋ hui naa woŋ.
11 La faŋaŋ o nɛi tonyaa choo, nduyɛ mi la mal nɛi sakpoo.
La pɛŋgi suɛi o naa lo a Wana Diandaa le Isɔluɛi okɔɔ.’”
12 Lelaŋ, nyɛ Wana Diandaa le Isɔluɛi dimi wo cho hoo ni:
“Le mɛɛ nya kɛɛ diomndo hoo,Mi la duau tiindaŋndo o choolaŋ niŋ a sɔɔŋ hui wana woŋ,Nduyɛ mi la duau laalaŋ nyaa kpou o sɔɔŋ muŋ niŋ yɛ,
13 Lende yɔŋ nya wɔɔŋndo hoo wa niŋ ni mɛɛ kpakioo piɔl nuaa yɛ,Vɛlɛ a mɛɛ kpaki vilɛi vilɛiyo tɛɛndiaa nuaa mbo wa niŋ le delɔɔ yɛ.
Nduyɛ o cho piɔl o lepilɛ niŋ kpe.
14 O cho piɔl mɛɛ kpɛɛnɛi bɛnduii nda toosiaa a puuloo ve piɔl nuaa yɛ,Okoŋ mbo chuiinuŋ mululu, tɛndu ndɔɔ o pilɛ bɛɛ lo le,Hali le yiŋndeŋ kɔndɔɔ o yiŋnda chieele,Ɔɔ le mɛŋndaŋ kɔndɔɔ o sooŋndo niŋ.”
15 Kanifuule nyɛ Chɛhowa, Mɛlɛka Kpuluŋguma Bɛndoo, Wana Diandaa le Isɔluɛi dimi wo cho hoo ni:
“Te la yeema pɛ mi la sɔla pioŋɔɔ, la miiŋgu ya o ibuŋ nduyɛ mi la chum ya.Te la yɔŋnuŋ pɛ bɛɛŋ mi la dɔu tiindaŋ nyaa o ya niŋ, la cho kpaayaa sɔla.”
Kɛ nyaa nɔ iyeema le keŋ tosa le.
16 Kɛ mi la dimi aa: “Ɛ ɛ, ŋ cho nyaanɔŋ o suaa choo!”
Nduyɛ la cho nyaanɔŋ.
“Ŋ cho nyaanɔŋ o suaa nyaanuŋ nyaanɔŋ bɛndoo wa choo!”
Lelaŋ, wanaa cho nya nyaanɔŋndo kɔɔli wa bɛɛ cho wa kiltaŋ tau tau.
17 Wana pilɛ kpe cho waŋnda waapilɛ kɔŋgɔliaŋ ma nyiiya,Nduyɛ wanaa ŋuɛɛnu cho nya kɔŋgɔliaŋ mi la nyaanuŋ.Wana cho lo nya tɛɛŋ ndo cho wa maa yɔm vilɛi nda simi o pembii bɛnduei choo wo.O cho wa maa tamasioo o pembei choo.
18 Kɛ Chɛhowa cho nya biuwɔŋndo chumndo le mbo tosal nya sɔɔŋ kɛndɔŋ,Nduyɛ o cho la isisi le mbo tuiinuŋ nya inyiɛɛ.
Kanifuule Chɛhowa, Mɛlɛka sandu wo o cho ni.
Kɔl kɛndɔɔ cho le wanaa hiau lachi a ndu chumndo wa.
19 Te waŋnda wa pɛ Saayɔŋ a o Chulusalɛm niŋ, a cho lɛ chaŋ te. Te o tuei num pɛ chaŋndo le malaa, o cho num inyiɛɛ tuiinɔŋ. O cho num mulul te o tuei num ndɔɔ diom pɛ.
20 Mi che bɛɛ Chɛhowa cho nya nyɛpalaa ke maa nyɛdiaa,* nduyɛ mbo ke nya nyɛkindilaa maa mɛŋma kolaa, kɛ Wana nya Pɛɛkaa Bɛndoo cho lɛ nya vioŋnɔŋ te, nduyɛ mi la che Wana nya Pɛɛkaa Bɛndoo a hɔlta nyalaŋ pɛɛŋ.
21 Nduyɛ, te la bendu pɛ nɛiyo mi la kuɛ o ba kɛndɔɔ choo ɔɔ o ba miallo choo, la tuɛinuŋ niŋ diomndo kɔɔli aa: “Nɛiyo cho hoo ni. La kɔ lechoo.”
22 Piɔmaa nya sɛl mi la kumbu nda a kaniŋ humbuŋ nda, a piɔmaa ichiliŋaa nya toosiaa mi la kumbu nda a kooliiyoŋ nda, la cho nda siiŋguu nyɛm nɔɔlɛi. La cho nda viouwɔɔ mɛɛ waŋndo viau nuaa yuulu nɔɔlɛiyo* yɛ, mi la dimul nda aa: “La kɔ!”*
23 O cho tosa mi piɔɔ sia le kuluŋ nya tɔl loŋ, nduyɛ mi lɛŋnde nyaleŋ le soli nyɛdiaa* o hɔbɛi, okoŋ mbo wa o kɛndɛ kɛndɛ. A teleŋ koŋ, chɔluaa nyaa cho nɔ fondaŋndo tau le diolaŋ.
24 Nauwaa nyaa waa a sofɛliaa nyaa waa cho wa bil kɛndɛ kɛndɛ nda muuliaŋndo dioo, o nda soliŋ siɔbuiyo* kpeku a yɔm vilɛi nda toosiaa a chiŋndoŋ le ndu muuliaŋndo wo.
25 O pembii bɛnduii vilɛi kɛ kɛ choo, a o pembii pɔmbuɛi vilɛi kɛ kɛ choo, peelaŋ la cho wa, nduyɛ mi mɛŋndaŋ ma piɔl o fondaŋnda yɛ yɛlaŋ, o paale diyɔɔ bɛndoo wa niŋ ndeŋ choo, te bandula vilɛilaŋ la del pɛ.
26 Nyɛ teŋgaa paŋgii tiilaŋnde wa niŋ ko maa nyɛ teŋgaa lepalaa. Nyɛ teŋgaa lepalaa cho chɔɔlɔŋ lechoo bɛmbɔɔ le ŋɔmmɛu, maa nyɛ teŋgaa le palɛi i ŋɔmmɛu. O paale leŋ choo, Chɛhowa cho pauvii o yɔŋul wanaa nduaa ve yiu yiu, mbo siŋgi nda.
27 Diola Chɛhowa laŋ la cho chɔnɔŋndo o fondaŋ levil lo mi la wa hunɔɔ.La cho hunɔɔ a kɔl ndɔ tuuwo, vɛlɛ a yumbu yumbu ikpuŋgba bɛndoo.
O cho suɛi a kɔl tuu bɛndoo,Nduyɛ diɔɔmule ndɔleŋ le cho ko maa yiŋnde bɛndule tɛɛmbuu nyɔɔŋ ndeŋ.
28 Nyina ndɔɔ* cho ko mɛɛ mɛŋndaŋ ma huŋ nuaa a kpaaya bɛndoo mi ma fuuluu wana haaa o bololaŋ yɛ,Le lɛŋndeŋ hiiluuwo o nyɛ nda chachu nyɔɔ wo niŋ le nda tɛɛmbuuwo.Nduyɛ waŋnda cho nɔ chiliŋii nda kua a soo ve o lakuu, le nda tosaa ma mal nɛi tonyaa.
29 Te la wa pɛ bɛɛndiaŋndo* le bɔŋaŋnda nyalaŋ,Chonduŋ nyaŋ cho wa maa chonduŋ nda soli ichɔl loŋ.Nduyɛ la cho wa a kɔl kɛndɛ,Mɛɛ waŋndo wa nuaa kɔlaŋ a sɛŋndeŋ yɛ,Te o wa pɛ kɔlaŋ o pembii Chɛhowa ve choo, Pou Kpoowaa le Isɔluɛi.
30 Chɛhowa cho tosa mi la tuei diom ndɔ tɔɔma bɛndoo.O cho ba ndɔɔ chɔɔmuu te o wa ndu pɛ tusioo o kɔl tuu bɛndoo niŋ,A yiŋnde bɛndule tɛɛmbuu nyɔɔŋ ndeŋ,Piɔɔ bɛndu bɛndoo, taŋndaŋ, a looŋ kpuŋgbaŋ.
31 Siooŋii bɛnduei cho Asiiliaa biyɔɔ te o tuei pɛ diom Chɛhowa wo.O cho ndu kisɔɔ a sioŋndeŋ.
32 Teleŋ o teleŋ Chɛhowa kisu pɛ AsiiliaaA sioŋnde o cho ndu nyɛpalaa tusioo choo leŋ,Dundula pɔmbɔlaŋ a towalaŋ la cho fula diom,Nduyɛ mbo heelu ba ndɔɔ le nda chiŋalaŋndo a chɔuwo.
33 Kanifuule Tofɛti* ndɔɔ chuu niŋ bɛɛndiaŋ,Nduyɛ o cho niŋ vɛlɛ o bɛɛndiaa le masaa.
O dii yɔmnde kunda bɛndoo nduyɛ mi i wa i kuaŋnaŋ kɛ kɛ,Yiŋnde bɛndu bɛnduleŋ bɛɛ le cho loŋ.
Chɛhowa cho yoomu, mi hueiye fula maa yiŋnde tondo,Mi le mal ndi o yiŋ.
Tɛɛsiaalaŋ
^ Hibuluiye, “kɛ o cho a nyina ni le.”
^ Hibuluiye, “o fondaŋ kala kala Feloo wo.”
^ Ɔɔ “yalakanaa.”
^ Ɔɔ “nɛila chɔmaala.”
^ Hibuluiye, “sɔɔŋ sondo yeelɛiyoŋ.”
^ Hibuluiye, “beediiyo ɔɔ buloo.”
^ Ɔɔ “kola wana lanɔɔ wa o teleŋ ndɔɔ niŋndo.”
^ Ɔɔ naapum, “mi la veelu nda aa nyɛ nɔɔlɛi wɔɔŋ wɔɔŋndo.”
^ Hibuluiye, “beediiyo ɔɔ buloo.”
^ Ɔɔ “peeloo.”
^ Ɔɔ “Hueiyii nduɛi yoomɛi.”
^ Ɔɔ “nyapila dindioo.”
^ “Tofɛti” sim lewundu naŋ, le fondaŋ nda luam nyɔɔŋ ndo, nduyɛ o sim le tɛɛmbuuwo.
