Aisaya 31:1-9
31 Kpundɔɔ cho le wanaa kua Ichipi le malaa wa,Wanaa duau tiindaŋ ndaa o suaa niŋnda,Wanaa tiindaŋ nyɛm nyaanaŋ chɔu suaa naŋndoŋ le mɛɛ ŋ cho tau,A suaa chɔuwa* le mɛɛ nda nɔ kpaayaa yɛ wa.
Ma kɛɛ le muliŋndo o Wana Diandaa le Isɔluɛi lo,Nduyɛ ma kɛɛ le Chɛhowa nuuviaa.
2 Kɛ ndu bɛɛ nɔ taasioo nduyɛ o cho hunɔɔ a kpundɔɔ.O dimi suɛi mbo kɛɛ ndi tosa le.
O cho lasisi mbo chiŋalaŋ chiɛi wanaa dɛnɛ wɔɔŋnda,Nduyɛ mbo chiŋalaŋ wanaa mala wanaa tosa sɔɔŋ wɔɔŋndoŋ nda.
3 Waŋnda chieeya Ichipiaŋnda cho ni, a cho Mɛlɛka le.Visiaa suaa ndaa cho ni, a cho ŋnyina le.
Te Chɛhowa siɛndi pɛ ba ndɔɔ,Wana o wana yɔŋguŋ pɛ le malaa, o cho boŋ.Nduyɛ wana o wana nda mala pɛ, o cho delɔɔ.Nda kpou cho tambei sɔla a teleŋ pilɔɔ kpe.
4 Kanifuule, nyɛ Chɛhowa dimul la wo cho hoo ni:
“Mɛɛ kpɔkuŋndo* wa nuaa pɛɛliaa, mi kpɔkuŋ fɔŋndɔɔ wa pɛɛliaa visi o biiyo choo yɛ,Okoŋ ma veelu wanaa mandaa lasaa kunda bɛndoo le ndu hunɔɔ chiŋalaŋndo,Kɛ o tuei bɛɛ diom ndaa siooŋii bii ndu le,Kɛlɛŋgaa niŋ te, mi siooŋnde bii ndu le wooluŋ wooluŋ nda wa koŋ ndo,Lende Chɛhowa, Mɛlɛka puaa chɔuwa cho hunɔɔ chɔulaba ni,Le Pembii Saayɔŋ Nde a le pembii nduɛi pɔmbuɛi.
5 Mɛɛ youwa tual nuaa sululu yɛ, lende Chɛhowa, Mɛlɛka puaa chɔuwa cho hunɔɔ chɔ chɔ ni mbo suŋgu le Chulusalɛm.
O cho suŋgɔɔ le ndu, mbo piŋi ndu.
O cho ndu inyiɛɛ tuiinɔŋ, nduyɛ mbo manda ndu.”
6 “Nya waŋnda Isɔluɛi, la miiŋgu wana nya simul a hɔlta vesɛi sɛɛŋ ndo o ibuŋ.
7 Kanifuule o paale leŋ choo, wana o wana cho mɛlɛkaa nduaa fonduaa o toosiaa a kanii humbuei vɛlɛ a kooliiye wa kɛɛ, a o tosa hakioo mbo toosiaa a bala ndɔlaŋ nda.
8 Asiiliaŋnda cho piɔmndo sɔla a muɛi faŋnde, kɛ o ve niŋ wanachiee le dii niŋ nda le.Muɛi faŋnde cho nda tɛɛmbuu ni, kɛ o ve niŋ wanachiee le.
A cho nyaanɔŋ le muɛi faŋnde,Nduyɛ ma baŋ feleŋguaa ndaa le wali lechiɔɔ tosaa.
9 Wana cho maa pou le ndu wo cho nyaanɔŋ a siooŋnde,Nduyɛ mi siooŋnde bii laŋgbaa ndaa kalla le yɔm vilɛi nda simi maa tamasi wo.”Chɛhowa, o nyɛ teŋgaa ndɔɔ cho Saayɔŋ, mi yiŋnde ndɔle tondoleŋ le wa Chulusalɛm ndo dimi lende ni.
