Aisaya 34:1-17
34 Nya cho o lɛŋnde niŋ kpou wa, la sɔɔŋguu kpɛɛluŋ mi la tuei,Nduyɛ mi nya waŋnda haa yaŋ nilaŋ nyɛkɛndɛi.
Lɛŋndeŋ a nyɛ o nyɛ cho lechoo yaŋ nilaŋ,Lɛŋndeŋ a kɔmnde kɛ kɛ cho lechoo.
2 Kanifuule, Chɛhowa tuulu kɔl a waŋnda kpou o lɛŋnde niŋ,Nduyɛ o cho puaa chɔuwaa ndaa kpou chiŋalaŋ a kɔl ndɔ tuuwo.
O cho nda tɛɛmbuu.O cho nda diu diu.
3 A cho wanaa ndaa nda diu wa viouwɔɔ o bɛɛ,Nduyɛ dialuŋ vilɛi ndaŋ cho fula chuŋ siouwo.Kooma ndaŋ ma cho pembuŋ bɛndoŋ liiviaa miŋ komba.
4 Nyɛm Mɛlɛka toosiaa o choo choo niŋndoŋ kpou cho siɔ,Nduyɛ mi choo choo simbuluŋ maa yau simbulaa.
Nyɛm cho muŋ o choo choo niŋndoŋ kpou cho nyamala,Mɛɛ peele yɔm makilepiiyo le nyamala mi le del lɛ,Vɛlɛ a mɛɛ fikiileŋ le nyamala nuaa o yɔm mafikiiyo mi le del lɛ.
5 “Kanifuule, o choo choo niŋ muɛi nii faŋnde cho liwa ni.
I cho tolɔɔ le mi i kilul Idɔm yamɛi,Wanaa nɔ le tambei sɔlaa wa.
6 Chɛhowa nɔ muɛi faŋnde, i cho i kumbaa kpu a koowaŋ.
I cho vɛlɛ wa i kumbaa kpu a chuɛiyaŋ,Kooma saa piaanduaa fɔŋnduaa a chuiŋnda,A kɔl keluŋ saa konduaa.
Kanifuule Chɛhowa nɔ le salaa solioo o Bɔsilua niŋ,Nduyɛ o cho chɔluaa diyɔɔ tau o lɛŋnde Idɔm ndeŋ niŋ.
7 Nauwaa yonduaa cho lakɔ a nda latulu,Nauwaa piaanduaa fɔŋnduaa vɛlɛ a nauwaa nɔ yoomuaŋ nda.
Lɛŋnde ndaleŋ le cho liwa yɔ yɔ a koowaŋ,Nduyɛ mi chuɛiyaŋ ma liiviaa chundu ndaa.”
8 Kanifuule Chɛhowa nɔ paale o miŋgul niŋ yaamɔɔwaa nduaa maa leŋ,Wɔsi o cho wanaa tosal Saayɔŋ suɛi wɔɔŋnde wa nyɛpalaa tusi choo wo.
9 Peela ndɔla* pɔmbɔlaŋ la cho simnɔŋ maa lasooŋ.Chundu ndɔɔ cho simnɔŋ pouta leyiŋndaŋ,Nduyɛ mi lɛŋnde ndɔleŋ le simnuŋ sooŋ leyiŋndo.
10 Ichɔl ni, ipala ni, yiŋnde leŋ le nyum te.Le fɛɛŋ a fɛɛŋ, kumii yiŋnde leŋ le cho wa helɔɔ choo choo.
O cho wa o tambɛi le fɛɛŋ a fɛɛŋ.Le fɛɛŋ a fɛɛŋ, wana o wana keeku loŋ te.
11 Pɛlikaŋnda a sɛiya cho wa ichali loŋ ni,Nduyɛ mi huaa nila vilɛiya a basabasakuendiaa chal loŋ.
Mɛlɛka cho yoole tuwaaleŋ a nyɛ tosa mi taŋgullo sim sakpo wo soliŋ kpeku,Le chɔmndo maa lɛŋndeŋ ndeŋ le cho wa fondo nduyɛ maa le cho lɛ le sɔvɛ le.
12 Laŋgbaa nduaa kalla kpou, o pilɛ bɛɛ simnuŋ lɛ niŋ masa le,Nduyɛ chuauwaa lemasaa bɛɛ cho simnɔŋ wanaa fondo.
13 Yɔɔŋ cho wulɔɔ o bandula ndɔla kala kalalaŋ,Mi bil ŋyɔɔ a yɔɔŋ vil mɔndɔ mɔndɔ o kpakila ndɔla kala kalalaŋ.
O cho simnuŋ bɛmɛlta tuŋaa yonduaa,Vɛlɛ a fondaŋ ɔsiluichiiya cho wa wo.
14 Visiaa cho o pollo niŋnda cho bɔŋaŋ loŋ a visiaa kɔl tuuwa,Nduyɛ chuiŋaa yonduaa* cho chaaŋaa ndaa veelu loŋ.
Loŋ dolaŋdolaŋnda cho wa ichali ni, nduyɛ ma sɔla fondaŋ pɛŋgiaa.
15 Loŋ kɛu cho maa lechiŋɔ wo cho waaŋnde ndɔleŋ toosiaa ni, mbo dɔu peltaŋ,Mbo tɛɛnduu laŋ, nduyɛ mbo chuuŋgiaa chuauwaa nduaa o wundule ndɔleŋ bɛŋgu.
A tonya, loŋ siaaŋnda cho chuuŋgiaŋ ni, o piaandoo a o laandoo.
16 Yaasiaa o yau Chɛhowa wo niŋ, ma veelu diomndaŋ choo choo aa:
O kɛ kɛ luusiaŋ niŋ te.Nda kpou cho wa a ŋiɔɔŋ ŋiɔɔŋ, o piaandoo a o laandoo.Kanifuule Chɛhowa dimi lende ni,Nduyɛ nyina ndɔɔ chuuŋgiaa nda diompilɛ ni.
17 Ndu cho wana wuu kooŋ le nda wo ni,Nduyɛ ba ndɔɔ tuu fondaŋ o ke nda wo ni.*
A cho wa loŋ le teleŋ o teleŋ,Nduyɛ a cho wa loŋ le fɛɛŋ a fɛɛŋ.
Tɛɛsiaalaŋ
^ Naapum a Bɔsilua okɔɔ nda cho suɛi ni, chiee bɛndoo le Idɔm.
^ Ɔɔ naapum, “nyinaa wɔɔŋaa cho maa ŋchuiŋ nda.”
^ Hibuluiye, “ndu piɔu nda ndu tɛɛŋ a yoole tuwaaleŋ ni.”
