Aisaya 35:1-10
35 Lɛŋnde polteŋ a lɛŋnde vesɛileŋ le cho dɔɔnɔŋ nyaale.Lɛŋnde dɛŋgbɛleŋ bɛɛ le cho dɔɔnɔŋ nyaale, nduyɛ mi bilta peeŋgela kɛndɛ kɛndɛlaŋ la wa la piaa leniŋ cha.
2 A tonya, bilta peeŋgelaŋ la cho piɔ leniŋ cha.Le cho dɔɔnɔŋ nyaale, nduyɛ mi le deŋi a nyaaloo.
Le cho sɔla naŋɔɔ bɛndu cho Lebanɔŋ ndo,Bɛɛle bɛndule cho Kamɛɛ a Sialɔŋ ndeŋ.
Waŋnda cho chɔ naŋɔɔ bɛndu Chɛhowa wo, vɛlɛ a diondɔɔ bɛndu Mɛlɛka naa.
3 La luei wanaa vi ŋdial la yoomuaŋ,Nduyɛ mi la tosa mi wanaa wulaŋ la cho nyiiyaa wa sim yi.
4 Dimul wanaa buulaŋ bɛndoo cho o lakɔl la aa:
“La wa a dialuŋ kala, nduyɛ la yɔŋ isiooŋ te.
Mɛlɛka nyaa cho hunɔɔ maa miŋgi.Mɛlɛka cho hunɔɔ a nyɛpalaa.
O cho hunɔɔ mbo huŋ piŋi nya.”
5 A teleŋ koŋ, hɔlta wanaa sumɛiya cho kumbiŋ,Nduyɛ mi wanaa nila baŋulɛiya tuei.
6 A teleŋ koŋ, wanaa bɛvɛiya cho huulu maa kial,Mi bobuaa deŋi choo choo a nyaaloo.
Mɛŋndaŋ ma cho piɔl o pollo niŋ,Mi peela pɔmbɔlaŋ la tiu o lɛŋnde dɛŋgbɛleŋ niŋ.
7 Lɛŋnde vesɛile bɛnduleŋ le cho hunɔɔ piɔ cha a bil wa o pioo ikɛiyo,Nduyɛ mi peelaŋ la wa o lɛŋnde vesɛileŋ niŋ.
O bɛmɛlta tuŋaa yonduaa,Bil puiyaa kɛndɛ kɛndɔɔ, bil wa o pioo ikɛiyo, a tɔlɔɔ velaŋ a tɛiyo cho wa loŋ ni.
8 Nduyɛ nɛi bɛndoo cho wa loŋ.A tonya, a veelu niŋ nɛiyo hoo aa, Nɛi Diandaa.
Wanaa dindu le wa kue niŋ lechoo le.
Wanaa nɔ dioo le kɔlaŋ o nɛiyo hoo choo wa, le nda nɛiyo hoo cho ni.Diɔm o diɔm kue o nɛiyo hoo choo le.
9 Kpɔkuŋ* cho wa loŋ te,Nduyɛ visiaa yonduaa wɔɔŋ wɔɔŋnda cho hunɔɔ lechoo le.
Visiaa haa kpou, o kɛ kɛ ve niŋ loŋ te.Wanaa Mɛlɛka miŋgi piondɔɔ wa kinɛi kua niŋ lechoo ni.
10 Wanaa Chɛhowa baŋa wa cho miiŋgu Saayɔŋ a chaŋnda kɔl kɛndɛlaŋ.
Kɔl kɛndɛ bɛndoo wa niŋ le nda lefafɛɛŋ, mɛɛ nda handu nuaa waŋndo mɔsil lemasaa o lebol lɛ.
Nyaaloo a kɔl kɛndɔɔ cho wa le nda ni,Nduyɛ mi mɔnɛi a kɔl tambɛiyo kuɛŋnuŋ landaŋ a nda.
Tɛɛsiaalaŋ
^ Ɔɔ “Yalakana.”