Aisaya 37:1-38
37 Dimioo nuaa Masaa Hɛsikaya tuei hei, mbo sɛɛsiaŋ nyɛlaŋ lekɔɔ, mbo wounuŋ nyɛla labɛkilaŋ, nduyɛ mbo kua o chiɛi Chɛhowa wo niŋ.
2 Mbo viam Iliaakim wana wa chiɛi lemasaa hɔlteŋ ndo, Siɛbina wana poonyiaa, a waŋ bɛnduaa wanaa soliaa lasalaa, ma wounuŋ nyɛla labɛkilaŋ ma kua o Aisaya lo wana suaa le Mɛlɛka wo, po Amɔɔsi wo.
3 Ma dimul ndu aa: “Nyɛ Hɛsikaya dimi wo cho hoo ni, ‘Paaleŋ ndeŋ hau, paale kɔl tambɛi leŋ le cho ni, paale naŋ sɔla yioulaŋ a bɛɛla tambɛilaŋ ndeŋ. Ŋ cho ko maa wana lanɔ pulii vialɛi cho nɛiyo, kɛ o nɔ kpaaya le violɔɔ le wo.
4 Naapum Chɛhowa Mɛlɛka numndo tuei diomnda Luabsiakɛ dimi laŋ. Ndu masanɔ ndɔɔ, masaa le Asiiliaa vem le Mɛlɛka cho yoomu wo yeiyo ni. Naapum Chɛhowa Mɛlɛka numndo cho ndu nyɛpalaa tusi choo le diomnda o dimi laŋ ndaŋ. Lelaŋ yandii, piɛi le naa lo haa yoomu wa.’”
5 Mɛɛ wanaa Masaa Hɛsikaya vem nda dimul Aisaya yooŋgoo hoo,
6 mi Aisaya dimul nda aa: “La kɔ dimul masanɔ nyaa aa, ‘Nyɛ Chɛhowa dimi wo cho hoo ni: “Yɔŋ isiooŋ le diomnda ŋ tuei laŋ te, diomnda masaa le Asiiliaa vem buɛiyaa nduaa le ma huŋ yei ya laŋ.
7 I cho ndu yiyaŋndo dɔwɔɔ o kɔl mbo tuei yooŋgoo, okoŋ mbo miiŋgu o lɛŋnde ndɔleŋ niŋ. Nduyɛ mi tosa ma dii ndu o lɛŋnde ndɔleŋ niŋ a muɛi faŋnde.”’”
8 Mɛɛ Luabsiakɛ tuei maa masaa le Asiiliaa faŋaŋ Lakisi, mbo miiŋgu o ndu lo, nduyɛ mbo komal ndu o chɔuwo Libina.
9 Mɛɛ masaa tuei maa Tahakaa, masaa le Itoopiaa hiŋ le ndu chiŋalaŋndo a sɔŋgɔɔ, mbo yɔŋ vɛlɛ waŋnda o Hɛsikaya lo. Mbo dimi aa:
10 “La dimul Hɛsikaya masaa le Chuda aa: ‘Chɛl mi Mɛlɛka ŋ tiindaŋ ndo hui num mbo dimul num aa: “I mel niŋ Chulusalɛm masaa le Asiiliaa o ba le.”
11 Numpila tuei nyɛ masaa keeku Asiiliaa wa tosal lɛŋnde kpou, ma tɛɛmbuu ndi wo. Baa num koni cho pioŋɔɔ sɔla ni?
12 Lɛŋii finyaa niaa mamaa tɛɛmbuu ve, baa mi mɛlɛkaa ndaa piŋi ndi pa? Kuɛɛnɛ waŋnda Kosaŋ, Haluaŋ, Luɛsifi, a waŋnda Idɛŋ a wa Tɛli-asaa wa cho yɛ?
13 Kuɛɛnɛ masaa le Hamaati, masaa le Apaadi, a masaa le chieeŋ bɛndoŋ Sɛfavem, Hena, a Ivaa cho yɛ?’”
14 Mi Hɛsikaya bii yaulaŋ wanaa nda vem nda o ba, mbo veelu diomndaŋ leniŋ. Okoŋ mbo kua o chiɛi Chɛhowa wo niŋ, mbo kɔ pɛŋgɛla laŋ* Chɛhowa lachi.
15 Okoŋ mi Hɛsikaya kandu piɛileŋ o Chɛhowa lo, mbo dimi aa:
16 “Oo Chɛhowa, Mɛlɛka puaa chɔuwa, Mɛlɛka Isɔluɛiya, o cho ichali chɛlɔbiiya choo wo,* numpilɛ kpe cho Mɛlɛka tonyaa le masɛi kpou o lɛŋndeŋ choo ni. Num toosiaa choo choo a lɛŋndeŋ ni.
17 Oo Chɛhowa, yaŋ nilaŋ ma tuei! Oo Chɛhowa, tofa ma che! Yaŋ nilaŋ ma tuei diomnda Sɛnachɛluibi dimi le num Mɛlɛka cho yoomu wo yeiyo laŋ.
18 Oo Chɛhowa, I cho tonya maa masaa le Asiiliaa tɛɛmbuu lɛŋnde kpou vɛlɛ a lɛŋnde nda leŋ.
19 Nduyɛ, ma vii vii mɛlɛkaa ndaa o yiŋndeŋ niŋ, kanifuule a ve mɛlɛkaa kpeekpei le. Kɛ yɔmnde a poutaŋ waŋnda chieeya soliŋ kpeku ni le nda toosiaa. Le sabu koŋ nda tɛɛmbuu nda ni.
20 Oo Chɛhowa Mɛlɛka naa, yandii piŋi naa ndu o ba, le mi masɛi kpou o lɛŋndeŋ choo sina maa numpilɛ kpe cho Mɛlɛka ni, Oo Chɛhowa.”
21 Okoŋ, mi Aisaya po Amɔɔsi wo yɔŋ Hɛsikaya yooŋgoo hoo aa: “Nyɛ Chɛhowa, Mɛlɛka Isɔluɛiya dimi wo cho hoo ni, ‘Le mɛɛ ŋ piɛi o ya lo a Sɛnachɛluibi, masaa le Asiiliaa okɔɔ yɛ,
22 nyɛ ya Chɛhowa dimi a ndu okɔɔ wo cho hoo ni:
“Chua laandu yufuaanɔɔ Saayɔŋ o tul num leyɛ, o mam num fɔ.
Chua laandoo Chulusalɛm hiŋ bolleŋ mbo pɛɛsa num.
23 Nɛɛnɛ ŋ mam yɛ ma yei?
Nɛɛnɛ ŋ deŋi yɛ choo?Nduyɛ, nɛɛnɛ ŋ tofa yɛ ŋɛlɛŋ?
Wana Diandaa le Isɔluɛi ŋ tosal sɔɔŋ muŋ ni!
24 A vem buɛiyaa numnda le ma huŋ yei ya Chɛhowa, ma dimi aa,‘I cho hunɔɔ a nyɛm niŋ nyaanaŋ suaa naŋndoŋ ŋ hɔbɛi,Mi hel o pemboŋ tullo,Mi kuɛ o fondaŋnda cho landaŋ landaŋ o Lebanɔŋ niŋndaŋ.
I cho yɔmii sida ve i vilɛi vilɛiye kioŋ, nduyɛ mi keŋ yɔmii chunipaa ve i kɛndɛ kɛndɛi.
I cho luɛiyɔɔ o fondaŋnda ndɔla viaŋnaŋnda cho filioŋ ndaŋ niŋ, a o bundɛla ndɔla bɛndulaŋ niŋ.
25 I cho sooŋnda mamɛŋndaŋ touwɔɔ, nduyɛ mi kol mɛŋndaŋ.I cho peela pɔmbɔlaŋ o Ichipi niŋ* kpou veeliaa a peluŋ niŋ kɔlloŋ.’
26 Baa a tuiyɔ a ndi okɔɔ le? Le teleŋ vilɛi niŋ ya kɛɛsiaa a ndi okɔɔ ni.*
O sindɔɔ niŋ pa ya kɛɛsiaa a ndi okɔɔ ni.
Lelaŋ, I cho ndi niko tosa.
Chieeŋ cho a kpakila kala kalalaŋ ndoŋ, a cho muŋ siiŋguu bembelaŋ.
27 Wanaa cho o chieeŋ muŋ niŋnda nɔ niŋ wana malaa le.Siooŋnde cho nda biyɔɔ, nduyɛ mi siɔmbulaŋ la bii nda.
A cho simnɔŋ mɛɛ bil yondoo o cho nuaa yɛ,Mɛɛ hueiye fula nuaa ba paaleŋ le chaŋ ndo mi i hɔŋ bil wul o yindɔɔ choo wo, mbo nyamala yɛ.
28 I sina teleŋ ŋ chal lo, teleŋ ŋ fula wo, a teleŋ ŋ luɛi yo.Nduyɛ te a dɔɔnuŋ tumbe a ya pɛ, I sina.
29 Kanifuule, I tuei tumbe ŋ dɔɔnuŋ a ya nduyɛ ma wa kuuliaa wo.
Lelaŋ, I cho num doliŋii nii baa o miliŋ a chiliŋii pɔmbuɛi o ŋ chɔ chɔ,Nduyɛ mi miŋgi num naa ŋ chɛŋ nda pila.”
30 “‘Tamasioo cho hoo ni le num:* Naŋndee, tɔlɔɔla vil a ba ndɔ laŋ* nya cho dio ni. Nyilasiaŋ bɛɛ, tɔlɔɔla pilɛla laŋ nya cho dio ni. Kɛ o wɔsi yaa ndɔɔ niŋ, la cho chiɔɔŋ tosa mi la kou, nduyɛ mi la tɔl kpelela makilepiilaŋ okoŋ mi la de maŋ.
31 Wanaa nda mɛi o chiɛi Chuda wo niŋnda cho puundoŋ wulɔɔ maa yɔm, nduyɛ ma yɔŋgu kɔmndeŋ.
32 Wanaa lo wa cho fula o Chulusalɛm niŋ, nduyɛ mi wanaa sɔla chindaa wa fula o Pembii Saayɔŋ Nde choo. Chɛhowa, Mɛlɛka puaa chɔuwa cho hei tosa a dialuŋ fulaa.
33 “‘Lelaŋ, nyɛ Chɛhowa dimi a masaa le Asiiliaa okɔɔ wo cho hoo ni:
“O luei o chioo hoo niŋ te,Kɛlɛŋgaa niŋ te mbo wuu chiŋɔleŋ ndoŋ,Ɔɔ mbo chiŋalaŋ ndu a boo chɔuwo,Ɔɔ mbo luei ndu o piŋndo niŋ.
34 Nɛi o cho fula wo, loŋ o cho miiŋgu ni.O luei o chioo hoo niŋ te.” Chɛhowa dimi lende ni.
35 “I cho chioo hoo manda nduyɛ mi piŋi ndu le diola nilaŋ,A le diola buɛi nuu Deeve laŋ.”’”
36 Okoŋ, mi maalikɛinɔ Chɛhowa wo huŋ o dɔɔŋgɔ Asiiliaŋnda niŋ, mbo diu puaa 185,000. Mɛɛ waŋnda chɛŋ idiiyo puŋ, ma cha waŋ vilɛiya a tiuwaa ba o ba fee.
37 Okoŋ, mi Sɛnachɛluibi masaa le Asiiliaa miiŋgu Ninivɛɛ, mbo kɔ chal loŋ.
38 Paale pilɛ, mɛɛ o baŋ wulaŋ o maaŋndo niŋ o mɛlɛka ndɔɔ Nisilɔki lo, mi puaa nduaa Aduluamɛlɛki nda Sialuɛsa dii ndu a muɛi faŋnde. Okoŋ, ma nyaanuŋ o lɛŋnde Alualuati leŋ niŋ. Nduyɛ mi po ndɔɔ Ɛsa-hadɔŋ miiŋgu o masaleŋ choo o foofo ndɔɔ.
Tɛɛsiaalaŋ
^ Hibuluiye, “ndu.”
^ Ɔɔ naapum, “tɛɛŋ ndo.”
^ Ɔɔ “peela pɔmbɔla huŋ del Nail choo o Ichipi niŋndaŋ.”
^ Hibuluiye, “ya tosa ndi ni.”
^ Koŋ cho ni, Hɛsikaya.
^ Ɔɔ “miiŋguu woŋ.”
